葛事訪問 – 4A like Black x Tarmac Works Art Car

上兩個星期Tarmac Works於柴灣總壇舉行了Art Car Exhibition展覽,展出與4A like Black主腦葛民輝(阿葛)聯乘的1/1 Audi R8 LMS賽車以及1/64 Area 64賽車場,三款聯乘的限量版賽車更火速售罄。究竟是甚麼原因促成這兩個風馬牛不相及的本地品牌合作?當中又有甚麼火花?

DSCN3868.JPG

「認真」做1/64賽車場

「最初以為火柴盒車仔只係玩具,但細睇又有鋼絲軨、輪胎又可以換,以往只有大比例模型車先有咁細緻。」阿葛從本地賽車運動員李英健(Marchy)認識Tarmac Works這個品牌,他眼見車模製作認真,於是產生聯乘的想法,「記得由去年暑假閒談時講起,既然Tarmac Works認真造車,不如like Black認真地幫忙做包裝、推廣,所以我提議做1/64賽車場供Tarmac Works試車,讓品牌每次展銷都有焦點。」這個名為AREA64的場景份量十足,面積較餐桌還要大,除了有賽道、維修區、隧道以至麥當勞外,更安裝多支針孔鏡頭,通過畫面讓人猶如置身賽場之中,「今次聯乘的切入點是『認真』,因為鮮見有品牌會認真製作賽車場場景擺放模型車,最多都是靜態場景,但我們目標不只如此,我們想將郁動賽車,然後大家可以在網站上看到賽時直播。」如果大家有留意德國漢堡的Miniatur Wunderland,大概可以想像完成品是甚麼模樣。

WhatsApp Image 2018-01-28 at 8.49.46 AM.jpg

阿葛為AREA64賽車場拍攝了25條花絮片段,每條縮時短片長約20至25分鐘,粗略估計用了至少260小時純粹安裝,包括鋪設草粉、連駁電線、上啤軨、界木板、開弧位等,同時因唔識接駁電線及計算電壓,最後有木工、持牌電工以至油漆師傅一同完成第一階段,「第二階段的動力組件如摩打等均未完成研發,我們希望能做到將磁石如迴轉壽司轉動,減輕重量之餘要唔貴,可惜市場上並無相關配件,跟道具朋友傾過佢哋都無辦法做。」阿葛坦言最喜出望外的是購自鴨寮街、每支約$200的針孔鏡頭,因為GoPro未法如針孔鏡頭輕易收藏在場景中,他沒想過鏡頭能夠調校焦距,但同樣地鏡頭也是他不滿意的地方所在,「鏡頭感光度不足時畫面會自動轉成黑白,加上每支鏡頭的色溫均有偏差,打燈時要逐支調校。」據知阿葛正努力趕工,希望在暑假前完成第二階段。

沒有「特色」的特色

「你怕唔怕到你個女嫁人後聖誕禮物都仲係嗰部車模?」阿葛對Tarmac Works首腦Felix笑言怕車模銷量欠佳,因此參考製作限量版Tee的經驗,一口氣推出3款不同顏色,「設計概念源自同一花紋,特色可以話係無。」不過,單單是披上4A like Black拉花就已經係最大賣點,「我份人比較心懶,全黑色就好,但黑色都有分深淺反光啞色,有啲質次會幾好睇。至於純啞色又太低調,最好都係黑底反白,形成強烈對比。」他透露曾希望用對比最高的黃色,然而好難控制,而紅色在4A like Black前作曾經用過,放在賽車上可帶出火辣的感覺,於是今次合作只推出黑、白及紅三款顏色。至於專屬貨櫃箱就希望重塑1/64的效果,因Tarmac Works原裝紙盒設計相對扁身,未能反映現實情況。膠貨櫃設有軌道可將車模連底座原架推入,前海面板亦可更換透明膠片作展示用途,一舉兩得。

被問及4A like Black會否與Tarmac Works作第二次合作,阿葛表示開放態度,「我們有好多概念,但最後是否成事卻要看大家配合,特別是開發情況及成本,甚至是時機是否適合或市場是否接受。」

DSCN3880.JPG

「係你玩車唔係車玩人你」

唔少朋友都知道葛文輝是愛車之人,但唔知模型車又是不是他的那杯茶呢?「我無刻意儲模型車,好多模型車買咗之後唔捨砌佢,因為唔去舊化、改裝就只不過係純粹測試模型是否可以結組合。退休後會的起心肝慢慢砌,以往買的模型全部擺放在貨倉之中。模型砌完之後要搵地方擺,需要好啲空間、時間去慢慢享受,與畫畫一樣。」阿葛直指只要模型車做得精細、線條優美就會購買,無特別傾向。以為阿葛對真車的要求嚴謹得多,他現時的座駕由97年開到現在,朋友也不斷叫他換車,「儘管沒有電門,但這個款式我覺得最順眼最耐看,反而現在的新車太科幻,好似過眼雲煙。」他對收藏都很長情,惟獨絕大部份是棍波型號,「愈簡單愈鍾意」,如蓮花的Elise及Exige,「車手感覺無得頂」,並笑言如果只得一個泊位的話他寧願放棄保時捷、日產GTR而保留一台fun car。不過,工作用車最重要的還是的乾淨企理、載客量大足時能夠載貨,代客泊車亦不會心痛。阿葛總結玩車的心得,「簡單、能和車手溝通、精神、唔易壞,唔係就係車玩你唔係你玩車。」

無論玩真車定係模型車,道理都是一樣吧。

Advertisements

2017年車壇大事回顧

仲有幾個鐘就踏入2018年,不如等我哋盤點一吓2017年嘅車壇大事。2017年可算係迎新不送舊嘅一年,除咗有新品牌磨拳擦掌打入市場,傳統大牌被迫積極回應,但QC(質量監控)、貨期仍然係挑戰。即刻盤點17年車壇大事:

簡報1.jpg

1) 車價大升上車難

20170910_160115

2017年,唔只樓價升物價升,連1/64車仔價錢都升咗唔少。新車價錢與往年分別唔算太大,高(Tarmac Works HOBBY64、Tomytec、京商)、中(Tarmac Works GLOBAL64、Greenlight、Tiny微影、Tomica Premium)、低(Majorette、Tomica、Hotwheels)三級壁壘分明,百貨應百客。反而中古車款價錢就幾級跳,今時今日是但買部中古CM’S、Hotworks索價閒閒地逾百,京商就更誇張,除咗盒蛋中不受歡迎嘅車款,中古車入場費差不多要$70,受歡迎嘅由$100起,部份經典款或罕有款如Lancia Strato HF、Maserati MC12等連盒索價$250以上,去到東京雖然車款較多車價較平,但亦較兩、三年前升一倍以上。部份鋪家指出近年來自內地、台灣、馬來西亞等地的買家持續掃車,未來經典車款易手價有機會再搭級上升,想入平車就更有難度。點解CM’S、Hotworks要摺得咁早呢?唉,18年都唔知點買,買新車似乎更抵玩。

2) 18年見真章 – MINI GT

25395778_1560678940681107_2062127379212073356_n.jpg

今年有多個新品牌加入戰團,講驚喜莫過於TSM以MINI GT加入戰場,受惠廠方坐擁多家車廠如美國Honda(Acura)、Ford、Maserati、McLaren、Jaguar、Bentley的CAD圖檔,因此MINI GT能於4個月內落實12個品牌、29款車模的版權,12月公佈時震撼車壇。MINI GT亦是少數使用合金車底的廠商之一,當然萬眾矚目嘅本田CIVIC TYPE R 2017 (FK8)及日產GTR R35將於農曆年前後派貨,屆時勢將與Tarmac Works正面對撼,呢場戲碼千祈唔好錯過。TOYSOUL期間MINI GT亦展出其他車款,但最吸引嘅吳莫過於Land Rover Defender,除咗Schuco部90之外基本上無對手,希望18年出得切。香港車款方面,應該會有,但未有期,繼續等。

3) 多線發展 – Tarmac Works

20171004_184933

繼年前車海攻勢後,Tarmac Works今年除了正式推出副線GLOBAL64及加入更多歐洲車款如Mercedes-AMG GT3、BMW M3 E30、外,更與多個品牌合作,如Cody Walker、Sony Playstation、Deep Lifestyles Supply Co、Initial P合作推出別注版車模以至Tee,實行多線發展,成功開拓東南亞市場。18年HOBBY64將會推出TCR、GT3等賽車,GLOBAL64則以歐洲車為主,街車、警車、Place Car、Safety Car等都有選擇。Tarmac Works來年會與葛文輝合作推出貨櫃箱,不難成為追捧對象。17年品牌受QC問題困擾並公開致歉,廠方指未來會加強抽檢工作及密度改善情況,亦歡迎買家將有問題的產品(非人為損壞)作更換。Tarmac Works對推動車仔文化嘅熱誠相信大家都睇到,希望18年QC質素續有改善,咁大家科水都會科得更爽手。

4) 法「動」驚喜 – Majorette

20171006_214403

2017年Majorette成功回歸香港,並帶來多款新車款以至地區限定版本,如年中的泰國、印度的士以至年尾的杜拜警車都廣受市場歡迎。不過儘管玩具反斗城、Aeon及各大小玩具店都有派貨,熱門車款如VW Polo R WRC及Subaru WRX STI等仍然影都唔多見,品牌同代理睇嚟都要諗諗計睇吓點樣可以解決呢個問題。另一個問題係車款更新速度唔夠快,暫時未可以好似Tomica咁每月幾款新車等粉絲月月買。至於車轆方面廠方開始陸續為新車換上新轆,儘管仲未換上軟軚,但賣相已經好得多,18年款嘅Audi R8 Spyder應該係首款新轆車,其他款可能仲要再等等。香港特別版方面唔知今年又有無機會呢?

5) 動作多多 – Tiny微影

25353948_1560548637360804_2911057511184540256_n.jpg

介紹Tiny微影其實有啲難度,雖然佢啲新車次次都好吸引,但係出街例遲同QC問題往往令人對佢嘅形象打折扣,當打過和。以最近嘅TOYSOUL為例,包括TVB採訪車、廣播車、韋川拖車、豐田Prado、電單車以至一系列貨車車仔讓人眼前一亮,Tiny Q亦首度登場,為人詬病嘅排隊問題也得到改善。不過每次訂車後都係漫長等待,QC亦往往成為網友熱話,結果好多時落門市買車都要即場拆盒驗車,無論係對品牌形象抑或係買家觀感都唔理想,不過呢啲都係老生常談,建議品牌適時公佈產品開發進度等,以及加強對廠方的監察,減低壞件率。坊間太多對Tiny微影嘅討論,我亦不必在此寫太多。總之香港品牌我一定支持,但絕非盲撐,希望品牌切記要對得住支持你嘅買家。

6) 東洋大軍 –  Ignition Models

24852319_889365514560884_5561098806215126268_n.jpg

12月Ignition Models公佈將首推1/64系列,並與Tarmac Works合作市場推廣及分銷事宜。IG的1/18、1/43車模有口皆碑,價錢亦非入門,1/64系列是廠方自家設計及生產,質素有保證,至於價錢呢?應該$200有找,18年率先推出的1/64 Rocket Bunny / PANDEM 豐田86及日產GT-R R35,要成為年度之車相信毫無難度。不過,AE86幾時出呢?

7) 澳門過江龍 – Zoomer Miniature Models

DSCN1199

今年上半年來自澳門的Zoomer Miniature Models走勢凌厲,推出多款包括福隆新街、澳門大賽車維修站、貨櫃場等場景及1/64 澳門治安警人仔打入市場,場景以厚卡紙製作較台灣作品更容易安裝及收摺,成為蝸居因物。然而踏入第三季後品牌未有新作消息,希望18年品牌能夠堅持落去,製作更多不同的場景,等我哋有多啲唔同嘅配搭。

8) Brand in China – 拓意模型玩具

TB2DAKtXvxNTKJjy0FjXXX6yVXa_!!83919010.jpg

話說年中上淘寶搵場景時竟然搵到有1/64中石化油站賣,仲要係拎Full License,原來呢間拓意模型玩具之前出過其他比例嘅玩具車,然後投身場景市場,「日本有Tomytec、香港有微影,內地應有自己的品牌,我們的目標是做內地的微影」,由授權、設計到生產用了差不多一年時間,並以二百多元的訂價成功搶灘,質量亦獲外界肯定。廠方食髓知味推出1/64公安、消防公仔以及鐵模1/76油罐車,未來會推出8款公仔、14款包括金杯、捷達、五菱等內地常見車型及更小巧的場景,「內地沒有企業做小車,對1/64的發展充滿信心。」雖然內地車型唔多熟悉,但場地同人仔值得留意。

9) 大失所望 – 7-ELEVEN保時捷經典911系列

DSCN1322

之前幾套都好哋哋,一掛京商牌頭就出事,仲要呢間京商同日本京商又有分別,呢套車淨係入咗兩部京商無出過嘅911 Carrera RS 3.8(964) (964只出過911 RS版本)以及911 GT3 RS(991/1),一部車太短另一部車轆太大,幾十蚊貨仔都唔預佢推得郁但QC(或者設計有問題)都唔好差成咁,之前累積落嚟嘅好評咁就一鋪清袋,唔知18年又係點呢?

10) 唔打香港市場嘅本地品牌 – RMZ City

IMG_0299

究竟香港市場係咪太細所以連香港品牌都睇唔上眼呢?呢個問題我唔識答,自從官網喺11月摺埋之後,買RMZ City城市套裝就只可以上淘寶之外我都諗唔到有咩辦法。其實幾十蚊套RMZ City城市套裝性價比唔錯,奈何香港竟然買唔到,有啲唏噓。

11) 法拉利隔周登場 – Ferrari GT Collection雜誌

DSCN2827

繼Rally Car經典收藏誌後,Pansing Hobby Shop 再接再厲,引入Ferrari GT Collection雜誌推1/43法拉利車模,大部份熱門車款如F40、450 Italia、360 Modena、Enzo Ferrari都有份,加上雜誌英文用字手淺白,自己睇或者買俾小朋友睇再自己抽起均可。踏入18年已經翻譯成中文的DeAGOSTINI 1/24 Ferrari經典收藏誌相信有機會來港,至於1/43 Formula 1雙周刊似無仲未有聲氣,惟有繼續觀望吓。

12) 紀律部隊生力軍 – AURORA

DSC04470

「瘦田無人耕,耕開有人爭」,以往紀律部隊車輛主要集中在1/76市場,但今年包括AURORA、Tiny微影以及新加坡Masterpiece Collectibles同時搶攻1/43消防車市場,獲EMS監修的AURORA除推出DENNIS Sabre泵車及警隊水炮車打響名堂,年中又公佈1/43平治519 CDI衝鋒車、交通部衝鋒車、機場警區警車以及警察全頻無線電干擾車,價錢仲要平消防車一大截,與Tiny微影嘅平治Sprinter系列分庭抗禮,大賣自然係意料中事。至於下款軌路兩用車就要等吓官方有咩update喇。

13) 捨易行難 – BusByBono

DSCN1429

巴模市場百花齊放,幾乎月月都有新車出,要脫穎而出惟有以質取勝。BusByBono捨易取難採用生產成本高、開發時間長的ABS注塑,精緻度更高之餘,同時能避免「谷模」、「起泡」情況,上油光澤度亦可媲美金屬。造功方面亦一絲不苟,每盞車燈也是人手裝嵌,為了達到最佳上色效果,某部分車身是用印刷機打印出來,因此線條會比較直和幼細,平均買家在2架內已經挑到心頭好。BusByBono更首創金属製QR code取代了紙製證書,QR code 是配對的,一個在車底、一個在展示座上,只要用手機 QR scanner app 便可以讀取模型資訊。儘管車價唔算便宜,但對有要求的收藏家而言,自然願意多付一點換取更佳的質素。

高度戒備

2017年已踏入尾聲,今年車壇有唔少生力軍加入。除1/64外,1/43市場同樣熱鬧,就如年頭推出DENNIS Sabre泵車及警隊水炮車的AURORA,年中就公佈1/43平治519 CDI衝鋒車、交通部衝鋒車、機場警區警車以及警察全頻無線電干擾車(ECM),為市場帶來驚喜。

DSC04455.JPG

乜AURORA唔係專做消防車架咩?「我哋無限自己只做消防車,一來題材較局限,二來市場太細。我哋一開始計劃係推出兩款消防車再出一款警車,希望先打好形象再推出更多特別車種滿足收藏家需要。」不過負責人Paul指論製作難度消防車明顯難得多,「車體外部比較多燈號及各式各樣裝備,特別係車頂同車尾兩條梯,唔用蝕刻件好難做到與真車相同的質感,然而每件蝕刻件都需由人手屈曲至同一弧度,有一定偏差,連包裝都要小心設計希望不會在運輸過程中脫落及損毀,極花人力、時間及成本。」警車方面需要考慮的部份比較少,相對四平八穩,因此兩者車價有明顯差別。

另外,AURORA警車每款產量只有200部,顯然不是走大眾市場,Paul亦明確表示車款出完不會翻出,亦避免與其他品牌做相同車款,「AURORA因為產量少及人手加工,著重精緻度,重質不重量。」他又透露會推出配件及水貼供買家自由發揮。暫時網友收車後反應正面,而一早遭訂購一空的警察全頻無線電干擾車(ECM)即將上市。出完兩款消防車及警車,AURORA下款大作將會是消防處軌路兩用車,查實呢部車較DENNIS SABRE更早設計,但因故需要延後,不過最終仍決定正式投產,廠方期望農曆年前出貨,值得期待。

AURORA憑出色造工及高性價比成功打進收藏家市場,然而其他對手亦絕非省油的燈,2018年相信會有更多款色更好的作品供市場選擇,不怕無得揀,只怕財力驚買唔晒。

法式驚喜

自從新代理Asia Goal今年接手Majorette代理權後,品牌走勢凌厲,先後引入泰國及印度的士系列,就連原本杜拜限定的警車系列亦登陸香港,究竟出年品牌又會帶給我們新驚喜?

20171006_214403

「我哋相當大部份嘅買家都係Collectors。」不出所料,Majorette憑藉出色的性價比及罕見車款成功於本地市場殺出一條血路。然而,Majorette仍然以玩具為定位,若要「升級」至車模水平,無論在造工及車款上均需要進一步提升,值得慶幸的是,廠方將於明年陸續換轆,以及加快更新現有車款,以即將推出的Audi R8 Spyder為例,驟眼睇仲以為係用上橡膠軚,「橡膠軚係我哋考慮之列,但暫時未有時間表。」廠方又指會推出更多新車色可供選擇,如平治G63 AMG除了黑色及黃色外,其他車色將會陸續推出。明年廠方將以日本及韓國車為重心,並會推出更多地方限定車款,「除了杜拜警車外,澳洲警車、泰國tuk tuk Series 2等都會相繼推出,台灣地區更會有的士、救護車系列。」個別地區如印尼等更會有度身訂造推出的Brabus B63s車款,至於香港車款何時登場?「呢層就要睇市場反應喇。」

以往代理純粹只係賣車,對產品開發及設計幾乎無任何話語權,但據知早排Majorette母公司Simba Dickie Group召開年度會議,邀請亞洲區各代理出席並就車款、造工等提出意見,意味即使香港買家的意見也有機會傳到總公司的耳中,也證明香港是一個不容忽視的市場。代理亦透露會開設online store,方便買家補購熱門型號,希望大家都可以買到心頭好。

20171006_214626

聖誕驚喜

原本諗住TOYSOUL前都無乜新聞可以舒舒服服清吓手頭啲訪問稿,殊不知上星期TSM宣佈推出主打1/64車仔的新品牌MINI GT,並以本田CIVIC TYPE R 2017 (FK8)及日產GTR R35打頭陣,震撼程度仲勁過金仔射導彈。《手推車》當然唔執輸,搵嚟項目推手、TSM香港總代理TOYEAST LTD.(即係TINY母公司)的負責人Steve問過究竟。

24059725_1907361949575665_1797943145230041880_o

TOYEAST LTD.取得TSM香港代理權已經十年,當中好似Land Rover Defender香港警車、爆炸品處理車都係Steve等推動的成果,但唔講唔知品牌想進軍1/64市場多年,直至今年先成事,「TSM美國總公司Sunrich銷售點都係模型店,不太適合賣1/64車模。直至我們認識另一經銷商、它除了是大型分銷商外,更負責是Greenlight的銷售工作,聯同Tiny在香港的銷售網絡,有望衝破Minimum Order Quantity,因此開始了MINI GT這個品牌。」因為車仔唔係話造就造,每款車模都牽涉設計、起模、鑄造等流程,記得每套模具成本約10萬左右,「如果每部車定價幾十蚊,賣唔到1、2萬部肯定回唔到本。」這也難怪以前京商不停重出法拉利、林寶堅尼系列。

8
MINI GT屬少數品牌用上合金車底

廠盒優勢像真度高

不過TSM有得天獨厚的優勢,就是品牌為美國Hond(Acura)、Ford、Maserati,、McLaren、Jaguar、Bentley的廠盒模型車生產商,因此TSM擁有由車廠提供的CAD圖製作車模,毋需用1/18、1/43等回來左抄右抄左改右改,「Tiny淨係部平治Sprinter都搞咗一年半載,TSM只需將CAD圖用一星期拆散配位就可以,所以才能於短短4個月內落實12個品牌、29款車模的版權。」正因如此,在廠方需求、美國及香港分銷渠道都打通後,MINI GT正式啟動。在即將舉行的TOYSOUL上,MINI GT更會展出十多款的手板及色板,另外特別版產品目錄更收錄了即將推出的3、40款新車,讓各位先睹為快。Steve更透露MINI GT未來會推出各家車廠的最新車款,平均每月推出兩個車款,連同不同拉花顏色每月新車數目可達6至7部。

6
廠方初步已落實12品牌29個車款

定位為Semi-hobby的MINI GT,除了獨立燈組、側鏡及橡膠軚外,亦起用成本高得多的合金車底,「合金底的開發成本高,較膠貴不只兩至三倍,單係原材料今年已經升了3成。MINI GT定位類似Tomytec都,但價錢則徘徊在Tomica Premium,性價比好高,而且會爭取足夠數量讓廠方生產右軚版本。」的確,在今時今日京商都賣逾百的情況下,$75的定位相當進取,同時亦難以避免與另外1/64品牌Tarmac Works作比較。

5

一齊做大個餅

「我們唔係直接競爭,如Tarmac Works推出的Benz GT及Audi GT我們都無出,反而會考慮推出其他款式。我們相信1/64市場好大,無一間車廠可以拎晒所有車款License,而且佢地強Racing,長遠睇唔到會有好大競爭。」他指未來雙方或可就香港、澳門賽車進行合作,例如Tarmac Works有車隊拉花、MINI GT提供對應車款等。

至於在Facebook提到的高速公路場景則仍然在起稿階段,方向與Tiny的道路場景一樣,可以自行拚砌,「公主道又得,東區走廊又得,之後可以加燈加路牌。始終MINI GT都係街車、辣跑為主,泊街邊唔夠型。」Steve又表示未來各大百貨公司將有高速公路展示。至於會唔會同Tiny crossover?Steve指出暫時無相關計畫,TINY主攻公眾交通、貨車及政府部門車輛,MINI GT則針對街車、跑車、SUV等,互補不足,惟一兩個品牌都不會涉足到家庭車市場,「因為Tomica本身做Alphard、Noah、Stepwgn、Jazz之類的家庭車很強。」未來有關的香港車款,特別是TOYEAST沒有授權的品牌如Land Rover等,將會由MINI GT推出香港特別版如警車等。

7
LB Nissan GTR R35 ZERO FIGHTER 零式香港特別版於TOYSOUL期間接受訂購

Steve認為隨著生產成本愈來愈高,大比例車模定價隨之上升,會吸引更多人轉投車仔市場,MINI GT希望能夠滿足最低生產量,推出更多車款為市場帶來選擇。「香港車仔市場開始熱鬧,東南亞市場也在關注,希望香港能夠成為車仔設計及生產基地,為買家帶來更多選擇。」

2

駿馬奔騰

Rally Car經典收藏誌後,Pansing Hobby Shop 再接再厲,引入Ferrari GT Collection雜誌,一系列1/43法拉利車模陸續登場,聯同同期推出二戰傑作機經典收藏誌,實行雙線夾擊吸客。

DSCN2833

今年較早時間曾提過法拉利系列將於今年登場,原以為係DeAGOSTINI Ferrari經典收藏誌或者係Hachette Collections Japan嘅公式フェラーリF1コレクション,點只搶灘嘅卻係來自意大利Centauria去年推出嘅Ferrari GT Collection英譯本,75期雜誌包括多款熱門型號如458 Italia、LaFerrari、Enzo Ferrari以至1940年推出的Auto Avio Costruzioni 815及125 S等等,粉絲不難覓得心頭好。

與Rally Car 經典收藏認不同,每期Ferrari GT Collection雜誌只會專注介紹單一車款,如創刊號的內容正正圍繞458 Italia,不單介紹發展淵源,又剖析Pininfarina的車身設計哲學、車廠造車技術,即使細微如進氣管設計、頭燈形狀都有提及,讓讀者可以更詳細了解車輛特性。不過提提大家,呢本係英文雜誌,好彩用字唔算深而且寫得淺白易明,較睇日文版雜誌好得多。

至於大家最關心嘅1/43車模部份,當發現唔係Bburago生產時都有啲驚喜,但因為吸塑底部以東歐語系書寫,翻查後發現應該是捷克方面的生產(或代理,真係唔識睇)。不過邊個生產都好,最緊要部車嘅質素過得去,先睇頭、尾燈都係由獨立透明膠件製作、V8引擎艙處理不俗、輪圈亦能轉動,惟一挑剔的是油漆略厚,而且拆除膠塑後需要考慮收藏問題,我就淘寶訂咗亞加力膠盒擺入去,呢啲都係小問題。以百餘元的價錢有得睇有得玩,一係用「買車仔學英文」,應該可以殺出一條血路。

至於1/24法拉利以至1/43一級方程式雜誌幾時返呢?呢個問題,我都想知。

20171010200737_00004-horz

讓奇妙繼續飛翔

「我哋嘅心態唔會停落嚟,會不斷試新嘢,好似超級跑車、SUV、貨車、電單車以至場景都屬於我哋考慮之列。」Tarmac Works剖析17至18年品牌企劃,「希望為這個沉悶的事市場帶來Magic(魔法)!」

20171004_185650.jpg

在不起眼的工廈門口背後,原來是Tarmac Works的總壇所在,寬廣的工作空間擺放了1:1的駿馬模型及賽車模擬器,然而重點當然是散落不同工作檯上的1/64鐵模,預告未來一季推出的新車及品牌企劃。品牌大腦Felix透露,「(品牌)推出一段時間,聆聽市場訴求後,新車推出周期將由20日增加至30日左右,每次推出的新車不多於4部,與Tomica相近。」未來每月新車將出現更多車款,一改現時一車多花的推車策略。

20171004_184933.jpg

18年新作陸續曝光

Tarmac Works早前直播時率先公佈將會推出本田Civic EK9及豐田Supra,「推出EG6後收到很多查明關於EK9消息,我們推出的EK9將偏向賽車版,唔會同Tomica正面對撼。至於Supra則會與Cody Walker(Paul Walker的弟弟)合作推出慈善版本,其他版本將於稍後推出。」Felix透露Civic Type-R(FK8)也在名單之上,但不急於一口氣盡推,「唔想不斷推本田車推死個市,將維持每隔幾個月推出一款本田車的計劃。」品牌近期推出Mercedes-AMG GT3、BMW M3 E30等,測試市場對歐洲車的接受程度,積極開拓新客源。除了日本車款外,短期內品牌將於澳門大賽車期間推出兩款特別版,未來HOBBY64將會推出TCR、GT3及超級跑車如Koenigsegg、Pagani等,其他如SUV、運輸車、車房及其他場景等都在考慮之列。至於入門級GLOBAL64則以歐洲車為主,街車、警車、Place Car、Safety Car等都有選擇。

驗屍官團隊

Tarmac Works的團隊中不乏儲車逾千部的專業車友,更有賽車的活字典,因此對車模都一絲不笱,製作部份就佔去6至7成時間,「賽車於排位賽、正賽時的拉花有可能有細微變化,每時出圖後同事會與真車圖片比較求證,淨係睇都睇幾日。」因車身大小有限制,贊助商貼紙會縮到幾乎睇唔到,但團隊反而會說服Felix如實印製,Felix笑言賽車拉花的滿意度有90分,「效果值得appreciate(欣賞)」。他們的執著同樣反映在質量控制上,試過有批1/43三菱Evolution X貼紙出現問題,Felix與同事去貨倉逐架驗車,結果向廠方成批退貨,導致交車時間大大延遲。「要對消費者負責任。」他指出車模有機會有一定比例的瑕疵品,谷油等屬個別事件,如非人為損壞均接受換貨。

Crossover誕火花

除了AAPE外,Tarmac Works更與多個品牌洽談合作,製作更多聯乘作品,「我們希望合作能夠製造火花,而非製造敵人。」因此除了車模之外,最近品牌更與服裝品牌Deep Lifestyles Supply Co合作推出品牌Tee及與Initial P推出手機殼,「市場有一群人願意俾錢買靚的車Tee及周邊產品,但以往日本車Tee價錢不是太貴就係只得一個Logo幫人賣廣告,所以希望為車友們提供多一個選擇。」除了首批EG6車款外,未來將推出灰色澳門賽車特別版以及Lancer Evolution V款式,務求一款車有一件專屬Tee。

至於剛公佈與Sony Playstation為Gran Turismo Sport推出的1/64別注版賽車更係一大突破,儘管不是與遊戲一同出售的同綑裝,但同樣需要獲日本官方及Polyphony digital認可,連創作人山內一典也要親自確認,咪話唔犀利!

「好多人都話(車模市場)好悶,我哋就係要將Magic帶俾大家!」

 

 

新‧東京攻略

記得幾年前去寫過幾篇東京攻略(),事隔幾年再去東京梗係學閃令令旅遊書咁Update吓啲入貨點同埋發掘一吓「新景點」(其實都唔算新)啦!

20170909_123236.jpg

出發東京前曾經問過多位網友有關東京的買車資訊,但因東京實在太大行唔晒,加上係家庭旅行,只可以安頓家人喺商場後極速搵車,所以後面所列嘅鋪頭唔係間間都去過,有啲係直接喺minicar magazine入面抄出嚟等大家參考一下,方便大家計劃行程。


Post Hobbyポストホビー新宿店

20170906_183435.jpg

因為喺新宿訂酒店,順理成章由新宿開始寫起,由原宿搬到Post Hobbyポストホビー新宿店主打1/18及1/43嘅模型車款,佢按真車生產商英文字母排列新車,所以如果搵特定車款嘅話呢度會比較容易,但價錢唔算親民,所以空手而回。

  • 優點:1/43款式多而且齊,另有1/18可供選擇
  • 缺點:1/64欠奉,價格不便宜
  • 貼士:因為入口位處冷巷唔易搵到,見到氣功招牌搭軨上3樓就係

Post Hobbyポストホビー新宿店

  • 地址:東京都渋谷区代々木2-11-20 新宿成和ビル3階
  • 營業時間:12:00-20:30(逢星期一休息)
  • 電話:03-6383-4255
  • 交通:JR、私鉄各線 新宿駅 南口より徒歩4分。

ヨドバシカメラ(Yodobaashi)新宿西口本店ゲーム・ホビー館

幾年前去大阪梅田Yodobashi買到一袋二袋,諗住東京店應該一樣,不過竟然大失所望,如果買鐵道模型都仲好啲,首先Tomica車仔選擇唔多,即月款全部售罄,1/43、1/18模型都係寥寥可數,反而1/24組合模型就有啲選擇,所以同Post Hobby一樣無貨執。

  • 優點:位置方便,除咗車仔之外仲有大量好似高達等玩具
  • 缺點:選擇不多
  • 貼士:新宿Yodobashi分好多棟,只有ゲーム・ホビー館係賣玩具,其他係賣家品、電器之類

ヨドバシカメラ(Yodobaashi)新宿西口本店ゲーム・ホビー館

  • 地址:東京都新宿区西新宿1-11-1
  • 營業時間:09:30-22:00
  • 電話:03-3346-1010
  • 交通:JR、私鉄各線 新宿駅西口

BICQLO BIC CAMERA 新宿東口店

20170904_161728

呢間BIC CAMERA其實都係因為去GU所以無意中上埋去6樓,但估唔到竟然佢竟然比Yodobashi更多車仔賣,單計盒蛋都多一大截,行開伊勢丹可以上去睇吓有無筍嘢買。

BICQLO BIC CAMERA 新宿東口店

  • 地址:東京都新宿區新宿3-29-1
  • 營業時間:10:00-22:00
  • 電話:03-3226-1111

Minicar shop GLOBAL

20170906_111156.jpg

Minicar shop GLOBAL位於JR山手線駒込駅旁邊,因為對正鐵路,就算喺月台都望得到,呢間舖頭唔少香港人都會去入貨,1/43、Tomica等車仔各佔一半半,另有貨車、巴士等另類選擇,格仔箱就乜都有啲。店舖門口有貨架擺放特價車款,結果就平買J Collection 豐田Crown的士同RAI’s 警車。值得一提,呢度啲RAI’s警車選擇比較多,鍾意警車嘅朋友建議嚟碰碰運氣。

  • 優點:價錢平選擇多
  • 缺點:分類有啲亂、除咗Minicar shop GLOBAL之外駒込駅側邊無嘢好行
  • 貼士:搵真啲可能有意外驚喜

Minicar shop GLOBAL

  • 地址:東京都豊島区駒込1-34-3 山中ビル1階
  • 營業時間:11:00-20:00(逢星期二、每月第3個星期一休息)
  • 電話:03-3941-3110
  • 交通:JR山手線 駒込駅出向左行

Mandarake中野 大車輪

20170906_124518.jpg

好多網友都話大車輪俾買手掃得七七八八無乜嘢睇,不過舖頭地下有幾盆京商,大部份都係法拉利同林寶堅尼,好此道者不妨過嚟行吓,我就喺度執咗部搵咗好耐嘅京商粉紅色Crown。另外1樓書局隔離間舖都有京商日產系列賣,門口貼晒價錢,明碼實價。Mandarake仲有唔少超合金、Figure可以睇,加上買滿5,400円可以退稅,變相抵上加抵。

  • 優點:價錢相對平、有京商1/64揀、可退稅
  • 缺點:啲貨亂咁擺,要時間搵
  • 貼士:店員英文水平唔錯,可以直接問佢有無心水車款。退稅Counter要上4樓。

20170906_124124

Mandarake中野 大車輪

  • 地址:東京都中野区中野5-52-15 ブロードウェイ BROADWAY 2/F
  • 營業時間:12:00-20:00
  • 交通:JR中野駅北出口步行5分鐘

Tomica Shop東京店

真係要講句喺香港買Tomica隨時仲易過去日本買,好似東京駅一番街間Tomica Shop都買唔到8月新車Mercedes-AMG GT R,Tomytec價錢亦貴過香港,除非你要買Tomica Shop車款、Tomica餐具、嬰兒服等周邊產品,唔係都唔需要刻意過嚟,隔離舗就主力賣PLARAIL火車。不過,東京駅一番街仲有好多好似比卡超、蒙面超人、Minions等卡通人物嘅精品賣,加上旁邊有大丸,一家大細都可以買到心頭好。

  • 優點:其實無乜,當潮下聖同買限定版Tomica
  • 缺點:款式唔多齊

Tomica Shop東京店

  • 地址:東京都千代田区丸の内1-9-1 東京駅一番街 東京キャラクターストリート Shop 7
  • 營業時間:10:00-20:30
  • 電話:03-5220-1351
  • 交通:JR 東京駅 八重洲地下街出口

Akibaリバティー秋業原11號店

幾年前東京攻略已經介紹過Akiba,但當年京商仲未炒起,唔少車款都可以用300至500円入手,今次去到京商1/64由1樓搬落地下,面積比以前大兩部,車款由F1、法拉利、林寶堅尼、蓮花、賓利、Subaru同AMG不等,但入場費由600円起,因為擺放無序,逐部逐部睇都頗花時間,今次就買咗Lancia同埋Alfa Romeo返去,或者之前買買埋埋都唔少京商,變咗今次去無乜驚喜。

  • 優點:款式極多
  • 缺點:罕有款式少
  • 貼士:1樓有鐵道模型、京商1/64如果要有紙盒價錢貴好幾倍

Akibaリバティー秋業原11號店

  • 地址:東京都千代田区外神田4-7-1(8号店となり)
  • 營業時間:11:00-20:00
  • 電話:03-5294-5661
  • 交通:地下鉄 東京メトロ銀座線末広駅下車1號出口

Tam Tam Hobby Shop秋葉原店

喺Akiba斜對面嘅Tam Tam Hobby Shop佔地兩層,一層賣高達、氣鎗,另一層就賣車模同埋鐵道模型。因為價錢唔算平,而且1/64車款好少選擇,每次嚟Tam Tam都係嚟睇嘅居多,唔知係咪我錯覺,硬係覺得鐵道部愈來愈大,車模就愈縮愈小。

  • 優點:地方大行得舒服
  • 缺點:價錢唔平、無乜1/64
  • 貼士:買車貼士就無,但Tam Tam對面有間牛かつ壱弐参嘅炸牛扒幾好食,成日都排長龍

Tam Tam Hobby Shop秋葉原店

  • 地址:東京都千代田区外神田6-14-2 さかい末広ビル4F、5F
  • 營業時間:11:00-PM9:00
  • 電話:03-5816-5668
  • 交逍:地下鉄 東京メトロ銀座線末広駅下車4號出口

IIADOアイアイアド・カンパニー

20170907_123355

去完築地食魚生之後有咩做好?有時間不妨行幾步過歌舞伎座旁邊嘅IIADOアイアイアド・カンパニー買車仔。淡黃的燈光加上悠閒的音樂讓這家店像Café更多於模型店,店內較多懷舊車仔、中古Tomica、Minichamps、Autoart的1/43都有唔少,京商1/64反而屬於少數,大多數散落在檯的不同位置,要花啲時間睇真啲。

  • 優點:多懷舊款式
  • 缺點:1/64選擇唔多
  • 貼士:建議最好12點後去,因為有網友報料11點去仲未開門

IIADOアイアイアド・カンパニー 【銀座本店】

  • 地址:東京都中央区銀座4丁目14-4 ファミールグラン銀座4丁目1F
  • 電話:03-5148-1582
  • 營業時間:(逢星期一休息)12:00-20:00
  • 交通:地下鉄日比谷線東銀座駅5番出口步行1分鐘

京商ビレッジ

喺台場除咗高達同埋豐田MEGA WEB之外仲有呢間位於VenusFont3樓嘅京商ビレッジ,過往聽朋友講試過半價買京商盒蛋,但今次去無呢隻歌仔唱,新Honda NSX同S660都以正價出售,另有法拉利及蓮花系列,可以買盒嚟抽一過手癮,以及精裝版模型。其他比例嘅京商模型價錢亦不吸引,或者廠方目的其實係主推遙控車系列,所以連賽道都砌埋出嚟。不過可以見到傳說中的1/64 Alfa Romeo 156真身總算不枉此行。

  • 優點:京商1/64全新盒、精裝版現場發售。可以一睇京商1/64盒蛋全車系列陣容
  • 缺點:價錢唔係特別平

京商ビレッジ(KYOSHO VILLAGE)

  • 地址:東京都江東区青海1丁目3番15号 ヴィーナスフォート(VenusFont)3F
  • 營業時間:11:00-21:00
  • 電話:03-3529-0941
  • 交通:海鷗線青海(あおみ)駅下車步行5分鐘

Grease

喺VenusFont隔離仲有History Garage等大家睇吓經典名車,樓下仲有間模型店Grease,不過價錢相當貴,都係留返時間睇真車好過。我去嗰陣隔離仲做緊WRC展覽,展出多部豐田、Subaru組典賽車,值得行吓。

20170907_163310

Grease

  • 地址:東京都江東区青海1-3-12
  • 營業時間:11:00-21:00
  • 電話:o3-3599-o6o1
  • 交通:海鷗線青海(あおみ)駅下車步行5分鐘

今次因為時間所限未能夠一一行晒咁多間模型車店,以下係整理名單大家可以參考一下,建議大家出發前再上網站更新一下營業時間及休息日以免白行一逛。

20170910_160115

其他東京玩具車店

SHU-STOCK(シューストック)

  • 地址:東京都港区南麻布5-5-9 ゴトウハウス2F
  • 營業時間:13:00-20:00(逢星期一休息)
  • 電話:03-3440-6035

DreamBox (ドリームボックス)

  • 東京都墨田区業平1-12-7 石塚マンション 1F
  • 營業時間:11:30~19:00(逢星期一休息)
  • 電話:03-3621-0238

Gulliver

  • 地址:東京都豊島区巣鴨1-15-2 アーバンハイツA棟 1階
  • 電話:03-3943-3286
  • 營業時間:11:30-21:00(逢星期二休息)

ミニカーショップ ケンボックス(KENBOX)

  • 地址:東京都新宿区西新宿7-23-9西新宿小林ビル1F
  • 電話:03-5348-7033
  • 營業時間:12:00-19:00(逢星期一休息)

minicar shop IKEDA (ミニカーショップ イケダ)

  • 地址:東京都荒川区西日暮里2-15-9 大藤ビル
  • 營業時間:12:00-19:00
  • 電話:03-3806-1219

Minicarshop KOJIMA

  • 地址:東京都品川区西大井6-9-3 ヴィラロトンダ1F
  • 營業時間:13:00-18:00 (逢星期二休息)
  • 電話:03-5743-7222

MODEL AUTO ENWA

  • 地址:東京都渋谷区渋谷3-10-1  渋谷MJビル8F
  • 營業時間:13:00-19:00(逢星期三、四休息)
  • 電話:03-5766-0188

サンハイム南青山

  • 地址:東京都港区南青山5-14-5 サンハイム南青山2F
  • 營業時間:11:00-20:00(逢星期二、每月第個星期三休息)
  • 電話:03-3498-9876

買拉花

話咁快2017年已經過咗4分3,但感覺上好似已經買咗舊年成年買嘅車仔,無他,Tomica轉強、Majorette重新供港、京商又再出車,再加埋Tarmac Works新車浪接浪,年尾埋數都咪話唔肉赤!

DSCN2211.JPG

以Tarmac Works為例,佢每次兩部兩部咁出,通常一部賽車花一部標準色,絕大部分車款我都係淨入賽車花,但最近推出嘅三菱Lancer Evolution X,淨色仲靚過ADVAN賽車花,兩部車連內裝都有不同,最後當然係兩部都帶晒返屋企。

Tarmac Works現時分高質HOBBY64及入門GLOBAL64系列,前者行精緻化路線,質素與大廠Tomytec有得fight,有齊頭尾燈、軟軚,不過車款多一大截,連Mercedes-AMG GT R、Audi R8 LMS、BMW M3等跑車都有涉獵,加上不時與AAPE等品牌及車手Crossover,吸引愈來愈多捧場客。今次推出嘅2008年JRC三菱Lancer Evolution X ADVAN賽車(九州唐津站)同埋Final Edition,前者一身招牌ADVAN紅黑拉花及Ralliart字樣,後窗則有車手奴田原文雄及領航員的姓名,賽車編號及贊助商則印在車門位置,前座設有五點式安全帶,上色、完成度及精細度都一貫的高水平,美中不足係後座未有換上Rally賽車的防滾架。藍色則屬於Evo X的最終版本,銀底藍的車色討人歡喜,除了在加入霧燈外,車櫳則換回標準座椅,輪圈款式亦有不同,但唔知係咪軟軚軚紋嘅問題,從車側睇埋去會以為用咗硬膠軚,不過對整體的影響唔大。就係因為種種分別,結果兩部都入晒,CIVIC Type R情況完全一樣,但拉花更多……

記得上次訪問官方提過會推出其他Evo型號,唔知而家進度點呢?

大軍壓境

人人玩場景唔通人人都想玩場景咩?當然場景定義人人唔同,有啲就咁部車加背景就叫場景,有啲一絲不苟到玩晒燈光街景人仔,以往人仔多數係外國廠出所以難夾香港街景,好彩最近有品牌推出1/64人仔系列,唔只香港警察,就連澳門治安警都有得玩,玩法自然更多元化!

DSCN1917.JPG

玩香港場景,唔少人首先會諗起本地品牌的唐樓系列,但有車有樓但無人始終欠缺靈魂,不過人仔模型多以1/87(H0)或者1/150(N Scale)為主,1/64則只有Greenlight及Tomytec可供選擇,惟前者偏向美式風格,後者則隨場景附送,價格不非。今年推出紙板澳門賽車、貨櫃場場景大獲好評的Zoomer Miniature Models最近踩過界,首推3套1/64人仔套裝,一套3隻1/64人仔,包括交通警、軍裝警察及市民,另外更有澳門治安警察塗裝,可以配搭品牌推出的福隆新街場景,不過要做到「人在人往」的效果,睇怕都要買到幾盒。

論質素,1/64人仔難以與1/43以至1/18比較,不過廠方以動作多多取勝,如交通警分抄牌及指揮交通兩種,路人則有截的士、商人、煙民3款造型,唔知係有心定無意,煙民左手支煙大到同隻手一樣粗,不過正因為動作多多,所以與背景、車仔有更多互動。惟憾的是Zoomer這套1/64人仔系列未能與比例可能是1/64或1/76的另一品牌紀律部隊人仔拍埋一齊玩,一拍埋高度即刻睇到有分別,可惜。未來Zoomer會推出如車房工人、賽道工作人員等人仔,屆時其他場景都有人可玩,連同其他如車床、金屬貨櫃等,仲唔係大軍壓境?