愛之深恨之切

剛過去的香港玩具節幾乎讓My Tiny搶盡風頭,無他,本土品牌香港車款加集體回憶,整個佈局根本無得輸。雖然首日安排失當引起天下圍攻,不過品牌迅速道歉及於翌日改善排隊安排,加上「回水」方案,暫時化解一場關公災難,點解係「暫時」?找數先見真章。

DSCN7494.JPG
My Tiny在玩具節搶盡風頭

一連三日的第二屆香港玩具節終於曲終人散,除了My Tiny接近30款新車輪流上陣外,Daboxtoy也全球首展Tarmac 1/64 Honda Civic EG6 Racing及首賣Greenlight Chevrolet Camaro SS Gulf特別版,連同Kenbox、玩巨帝國、鴻興、日昇、Minicars、80M、頑童及主辦的Tomica等,半場都係車天車地,亦成為唔少收藏家的尋寶地。

DSCN7668.JPG
熱狗套裝好可能係九巴LOGO最後一次出現在My Tiny的車仔身上

不過大家重點都係落喺MY Tiny度,展前連續18日造勢,開Show果然無令人失望(睇片),買得走的包括一套三款的熱狗套裝、雪山雪糕電單車、平治Sprinter救護車及天文台車、紅色豐田Comfort的士、印有水貼的紅Van及小巴路線牌鎖匙扣等,其他包括1/18閃燈發聲救護車、1/43警隊指揮車、EMS監製St. John救護車一律需要預訂。不過就算即場買到都唔算皆大歡喜,只因唔少車友都投訴車模出現以下問題:

  1. 熱狗套裝冧車(櫳)頂(部)
  2. 救護車、天文台車尾避震過軟,導致車身側向一邊
  3. 救護車由絲印再用水貼
  4. Comfort的士仍然用旋風轆

可能我比較好彩,熱狗套裝未有遇上上述冧頂情況;救護車、天文車避震冧相信係整個批次的問題,一時三刻難以解決,只有希望下一批次可以做返好啲;水貼問題我都想知道原因,因為呢點的確讓好多粉絲包括筆者失望;豐田Comfort的士據知未來會用橡膠輪胎但未有時間表,惟有袋住先。不過又咁講,相信My Tiny會聽到大家對車模質素的訴求,始終它是少數願意「落地」與車友交換意見的品牌,從去年推出首批車仔開始,可以見到My Tiny的車模持續改善,如果要將My Tiny直接與Tomica、京商等造車數十載的大廠比較未免不太公平,如果大家於玩具節中有幸與忙到出煙的負責人Steve傾兩句的話,相信都會俾佢份毅力同熱誠所打動,儘管產品未能未臻完美,但大家仍然願意真金白銀俾多次機會這個香港品牌,希望佢唔好再令大家失望。

如果大家買咗、訂咗My Tiny車仔嘅話其實可以skip咗呢段,講番呢套熱狗套裝,限量3,000套,其中約700套獲九巴、Roadshow預留,派街的只有2,100套,睇返新聞Steve指呢套車仔好有可能係My Tiny最後獲九巴授權的巴士車模(巴士廠有辦你睇,新款已經無九巴Logo),三部1:110巴士包括烏嘴狗(2C往尖沙咀碼頭)、圓頂寶(5號線往彩虹)及利蘭勝利二型(70號線往上水),紅色包裝盒面除了有齊My Tiny、九巴及Roadshow Logo外,右邊更有凹凸「熱狗」字樣,背面是關於三台巴士的介紹。三台巴模均以合金鑄造,只有烏嘴狗水箱及圓頂寶的車尾部份改以塑膠製造,份量十足。圓頂寶及利蘭勝利二型的車身是九巴經典車色並有舊款圖案,一格格類似真車的鐵皮設計,手感不俗,美中不足內櫳像真度不算高、輪圈也是相同款式,不過以此價錢總不能要求太多,至少它可以推前推後唔係得個擺字。

至於Comfort的士像真度甚高,從車頭造型、車身比例均與真車似到十足十(車尾好似罟長),加上左右車門均可打開,如非仍然用上旋風轆,相信更受歡迎;雪山雪糕車為雀巢雪糕車的變奏版,雖然My Tiny隆重其事搵部真車返黎送雪糕,但因為年青一輩見都未見過,唔係人人有共鳴;平治救護車同天文台Sprinter雖然趕及上場,但係避震太冧導致車身側埋一邊,而天文台車因為成本問題選擇開門封窗的設計,可惜趟門打開的幅度不大,白白浪費了車櫳,惟有寄望下批Sprinter有充足的時間「執漏」。

DSCN7592.JPG
避震太冧導致車身側埋一邊

與一年前比較,今年My Tiny的造工、車款均有大躍動,早排部九巴Enviro400巴士更成為驚喜之作,證明My Tiny有能力做出叫好又叫座的作品,希望廠方能夠保持到質素,唔好因為密密出新款而忽略QC,等大家可以繼續「科水」支持港人港車港品牌。

Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s