火足50年!

50年似乎係好遙遠嘅事,但唔少玩開嘅牌子都有番咁上下年紀,例如美國的Hotwheels今年便慶祝50周年,慶祝又點少得特別版呢?廠方於是推出多個紀念系列等大家一同「分享」這份喜悅。

DSCN5730.JPG

介紹新車前少不免要拋下書包先,Hotwheels由發明家、火箭工程師及汽車工程師共同創立,並於1966年美國紐約玩具展上首次發佈,並推出基於真車啟發的原創系列Sweet 16,至於已推出逾20,000車款,總產量逾60億部。至今品牌年產量達5.2億部,即每秒生產16.5部,車轆年產量20億個,每年生產的招牌橙色賽道長度達9,656km,可以橫繞世界半個圈,並3次打破健力氏世界紀錄。官方公佈每個美國細路平均有50部Hotwheels車仔。多年來HW的產品一直與時並進,早於79年已推出Criss Cross Crash大型賽道,成為有央之來最好賣的賽道。81年HW於The HOT ONES系列換上薄軨,車仔走得以更快;88年推出遇水變色的變色系列。1991年紀錄廠方量達10億部推出特別版,其中一部更有印花換領真車;HW於2003件與DC合作,推出系列中首部蝙蝠車而大獲好評,10年跟迪士尼合作推出反斗奇兵系列,15年時曾生產一部1:1的68 Custom Corvette,到後來更踩過界推出Xbox+FORZA特別版套裝,風頭一時無兩。上面講開卡通車,大家又知唔知最受歡迎嘅人物車又係邊款?答案就係星戰嘅黑武士。除了傳統車款外,HW更推出日本街車、Magnus Walker、Fast’N Loud電視節目版本,為慶祝品牌生產第40億部,廠方更與知名珠寶設計師Jason of Beverly Hills合作推出特別版並收藏在夾萬中。HW與美國脫不了關係,Chevrolet是它首個合作品牌,因此每年都有新車款推出。

20180530_194729.jpg

Tomica講投資講得多,Hotwheels最值錢一部車原來係1969年Rear-Loader Beach Bomb,因屬HW殿堂級作品,全球只有40部,估價約150,000美元(約1,170,000元),而數最出名的收藏家非Bruce Pasca莫屬,他擁有的HW總值高達100萬元美元,足夠買一個新盤2房單位。

DSCN5679.JPG

講咗咁耐歷史,係時候介紹今次嘅主角Original Collection,一套5款包括Custom ’67 Mustang、Volkswagen Beetle、67 Camaro、1968 Cougar以及’68 Hemi Barracuda,全屬最初推出車款的復刻版本。這幾台車保留原來的厚軚設計,而且用上最Sharp的金屬色彩,車門上有50周年專屬字樣,加上復古包裝以及附送的50周年掛飾,個別車款如Camaro及Cougar更可以打開頭冚,收藏價值大增。廠方仲有以下幾個系列,部份未必引入本港,想儲齊都花啲功夫!

  1. Black and Gold Collection 7款
  2. Original Collection 5款
  3. Race Team Mini Collection 10款
  4. Track Starts 5-car pack 5款
  5. 50th Anniversary Favorites 11款
  6. Zamac Flames Collection 8款
  7. Starts and Stripes Collection 10款
  8. Camaro Collection 10款
  9. Throwback Collection 16款
  10. 50th Anniversary 10-car Pack 1款

HW18_5x7TearPad_R9_CMYK1.jpg

HW18_5x7TearPad_R9_CMYK2.jpg

Advertisements

狗仔都玩埋?

今年除車模外,場景、人偶市場亦愈來愈熱鬧,寫人偶也寫了好幾次。不過,今次除了人偶外,連警犬也一同參戰,這家來自南京的光影造物最近正式攻港,人偶、狗仔連同原來的場景、升降台等,玩法多元化,大眾又多一個選擇。

1.jpg記得去年逛淘寶時無意發現這家店,結果買了第一代升降台連輪胎架,不過因為車房不大沒有刻意拿出來拍照介紹。直至近期光影造物推出美國警察並由本地一家玩具店引入後獲高度關注,《手推車》當然第一時間跟負責人做訪問問過究竟。

2.jpg光影造物原本主要售賣小比例車模,2017年開始設計製作場景類產品,針對著重品質的中高端玩家。「與1/18、1/43比較,1/64更著重『神似』,而且因為體質較小更適合配合場景把玩。」光影造物負責人指出,精密細節和設計製作難以兩者兼得,「如果做得非常精細,那麼製作難度會大大提升,產品結構亦會變得脆弱。」其次是要考慮美感問題,「例如一款升降機,如果只是把真實升降機等比縮放到1:64,那可能是非常無趣。這都需要不斷嘗試,反復修改以達到一個最佳的平衡。」他表示第一款升降機設計大改4次,第二款升降機設計大改1次,每一處尺寸、厚度,都反覆校對調整,每款修改2至3個月以上,才最終定型。最新推出的警犬套裝,更是修改多達40多稿,才最終定型。

3.jpg現時光影造物的產品包括最新的美國警察警犬人偶、10款車模場景拍照紙板及2款車庫升降機(車模場景配件),一般產品開發時間在1至2個月左右。他表示產品選材比較隨意,不過個人較喜歡車庫類以及紐約題材的場景,「因為我是NYPD警車玩家和粉絲,出人偶搭配我的NYPD的自改車和自製場景,順造福其他美警玩家同好。」所以這套美國警察警犬人偶的出現可算是「純屬偶然」。至於在現時所有產品中,他最喜愛的莫過於「日本警察署」,設計這個場景的原因源於一位玩家提供模糊的日劇截圖,「難度在於把立體的建築轉換為平面的背景紙板設計,而又不喪失真實感和立體感」。

4.jpg「正是因為對細節孜孜不倦的追求,光影造物形成了相比其他量產品牌和手作品牌的獨特性。」負責人表示見過一些炒襲的作品沒有靈性,只是想走捷徑賺快錢,「而不是出於對小車的熱愛。」

5.jpg他又透露香港買家佔約15%。光影造物未來會繼續推出新的車模場景類配件,人偶方面也會陸續推出。

 

香港唔只得陳生

隨著近年1/64的收藏家愈來愈多,有關的配件如背板、建築、人仔等亦如雨後春筍般出現,除了曾經介紹的內地品牌拓意玩具澳門Zoomer Miniature Model以及本地薑Tiny微影外,最近還有作本地品牌FigureWorkShop,每款人仔產量甚少,但造型、動作方面較大品牌更有彈性,陳生終於都有個伴喇!

31143696_452639405167394_8602513078036201472_n.jpg經過三年秘密練兵,主打1/64人仔的FigureWorkShop於2017年成立,「早年已開始收集車仔,每次買完都會影相紀錄,但時間長咗覺得淨係車仔有啲單調,於是開始上網及四岀尋找合適的場景及人偶,但選擇非常少,也沒有自己真正滿意的款式,因而開始研究如何可以自行生產1/64場景及人偶,用了三年時間研究及開發終於生產出合適的1/64人仔。」FigureWorkShop創辦人彭先生指市場對精細人仔或有一定需求因此早年已經eBay出售產品。不過,因為屬業餘性質,創辦人可利用工餘時間設計及生產人仔,產量有限。

31120836_452639101834091_6205487135739346944_n.jpgFigureWorkShop與其他大量生產的人仔最不同之處在於它擁有不同的動作,而且部份更可與車仔互動,甚至坐在車廂中(需要拆車改裝),而非企定定喺度。到目前為止FigureWorkShop約有30款作品,大部份已經斷貨,「由於產品全部在電腦上設計及3D打印生產,數量不多,也不希望人仔過於平凡,希望經常作出新的轉變。」彭生透露平均每款人仔由構思到生產完成需時約一星期。正因為屬小規模生產及放於eBay上售賣,FigureWorkShop人仔的售價較大牌子略高,不過如最新推出的日本動漫女性人仔也是市場獨一無二,唔想成日都係陳生可以考慮一下。

下半年FigureWorkShop計劃開設自己的網店出售產品,並推出更精細的人仔,至於到時有甚麼?遲啲再話俾大家知!

一注獨贏

「我哋希望可以盡量入多啲1/64嘅牌子。」市場上開宗明義專做車仔嘅舗頭其實唔多,位於現時點嘅The Toysmart由最初乜到賣到而家幾乎獨沽一味賣車仔,負責人Charles幾年間見證了車壇嘅種種變化。

IMG_2326.JPGThe Toysmart大約5年前於皆旺商場開業,到近兩三年先進駐現時點,「以前賣多啲變形金剛、Figure等,直至Tiny微影推出雪糕車大收旺場就開始集中賣車仔,客源亦相對集中。」難怪舗面有唔少Tiny微影絕版車款,Charles更笑言唔少顧客出價洽購放喺陳列櫃入面套旋風軨車仔,但都俾佢一一拒絕。相對場內其他車仔舗,The Toysmart以款取勝,除咗Tiny微影外,Tarmac Works、Greenlight、Tomica、Spark以至比較少有嘅Johnny Lightning、AutoWorld都有選擇,嚟緊仲有MINI GT、One Model等牌子吸客。「我哋有班熟客由皆旺跟到嚟現時點,皆因我哋唔會炒車。」當然,炒車可以賺取更多利潤但會流失顧客,得不償失。

IMG_2330.JPG至於近年興起嘅Hold車現象,Charles表示無奈接受,「最難估客人幾時拎車,如果一直唔拎嘅話會壓貨。」他指行內競爭大,做得愈大Hold車愈多壓貨機會就更高,因此第一次喺The Toysmart需要先落訂,建立互信後就可以facebook留言hold車,「之後都係靠個信字。」

IMG_2328.JPG未來Charles希望可以引入更多1/64品牌,為車迷提供更多不同選擇。

為人民服務

舊年上淘寶無意中發現有套1/64中石化油站場景,原本以為係山寨OEM,點知原來係內地品牌拓意玩具,油站拎齊License之餘又可以著燈,成為RMZ City以外另一選擇。隨後廠方食髓知味推出馬路Mouse pad、地毯以至1/76油罐車,最新則有1/64內地交通警察及消防員人仔,價錢平香港成半,到底有無伏先?

DSCN4844.JPG現時1/64人仔市場由Tiny微影、Zoomer Miniature Models、Greenlight幾個品牌瓜分,Tomytec人仔通常要跟場景一齊買,選擇有限。拓意玩具受日本Tomy、香港Tiny微影啟發,加上內地未有1/64品牌,看好市地發展,儘管有生產1/32玩具車的經驗,但開發場景又是另一回事,開發第一款產品就用了一年時間,因為需要搞清楚每個步驟,加上授權問題,過程絕不容易。現時品牌已經設計及生產60款配件及12款人仔,未來更加有14種車型,未來會陸續推出貨車、特種車、商用車如金杯、捷達、五菱等。

油站仲未諗到擺喺邊所以未砌未影相,今次先介紹兩套人仔:一套四隻人仔清一色為交通警察或者消防員,各有不同姿勢及衣著,除了敬禮手勢那一款外,其他交警身上都有POLICE字樣的反光但背心,姿勢分別係攔截車輛、手持對講聲及擬似電筒等;消防員則分為消防官兵及專職消防員兩種,採用三企一跪設計,其中兩人手持消防喉及氧氣樽,一人佩戴氧氣面罩。人仔整體造工不錯,面目朦朧就預咗,或許因為腿部較粗的緣故,人仔容易企起,只有其中一個消防員因氧氣樽太重而經常向後翻。咁同Tiny微影同埋Zoomer Miniature Models比較又點?一泊埋去,拓意人仔明顯大一個碼,至於details位就Tiny微影略勝一籌,Zoomer Miniature Models則介乎兩者之間,不過拓意價錢只係人仔$59,折合港紙$70左右,比Tiny微影平近一半,市場自然容易消化。可惜內地交警消防較難配合香港場景使用,惟有期望廠方推出市民人仔夾埋一齊玩。

DSCN4748.JPGDSCN4742.JPG

玩乜Q?

記得舊年年尾亞洲玩具展,Tiny微影攤位重點推介嘅唔係1/64或1/76新車或者屋仔人仔,而係名為Tiny Q嘅Q版車仔,究竟呢批車仔有咩威力,足以挑戰Choro-Q嘅地位呢?

24837549_1278926085587001_877849037558332643_o.jpg

以往玩親Q仔幾乎只有Choro-Q一家玩晒,反而好幾個巴模品牌都有推出Q版巴士,直至去年打正旗號生產Q車的Tiny Q面世,並以港人熱愛嘅本田Civic EG6及EK9打頭陣,浩浩蕩蕩加入戰場。不過唔好以為Q車只不過係將常規比例車模搓圓㩒扁就係,「基於其獨特比例係由真車特徴顯生出黎, 創作每一架Tiny Q車其實比一般比例車製作及審批時間長1至3倍。」創辦人Wilson本身收藏Q車多年,他表示Tiny Q的車款、結構及包裝都與一般迴力車不同,以pro-series為例,除了有合金車底更首設轉向功能,本田Civic EG6及EK9 除側鏡、防滑車紋車軚及金屬色尾喉外,更擁有連1/64也未必配備的反光杯頭燈,車窗也跟真車一樣與車身水平一致,像真度更高。儘管合金車底幾乎部部一樣,但廠方刻意在車底刻有各車的型號,誠意十足。

為方便一眾改車人士,Tiny Q亦將車身分拆成多件,省卻噴油黐膠紙嘅功夫同時間。Tiny Q另一特點係每部車都會放進類似LEGO的Q-box,方便玩家將Q-box砌成不同形狀,廠方又用上金屬色卡紙包裝盒,並在上方留有空間滲透光線,即使唔拆package都可以多角度欣賞。

「自從Q車都要拎正規授權後成本高咗好多。」Wilson指過去車廠將像真模型車及Q車的授權分開,後者費用遠較前者便宜,以往Choro-Q售價都係幾十蚊有交易,但自從兩者合一後成本大增,現時的Choro-Q Zero定價逾百蚊一部,令消費者卻步。Tiny Q除本田外,仲會推出斷市多年嘅豐田Hiace、寶馬M3 E30以至拖車及海鮮車等,部份更設開門設計,玩味十足,加埋Tiny微影嘅唐樓街道亦為Q車車迷帶來驚喜。未來Wilson將專注於選車、開發及統籌生產工作,Tiny微影則負責申請車廠授權及銷售。

睇嚟呢一Q都玩得幾大。

20171214_214629

肥水盡流別人田

唔係長他人志氣消自己威風,但台灣7-ELEVEN至今已經推出過法拉利MINI Cooper日產GT-R保時捷911以至Ducati及寶馬電單車系列,但香港七仔仲係換緊LE CREUSET | LINE FRIENDS 「竹」福糖果盒系列,對手OK便利店都不過係Monchhichi 齊齊派對Party set,點樣唔叫人沮喪?難怪當有齊BUGATTI、PAGANI同McLaren車模嘅「全店三大極速超跑集點送」消息公佈後,大家紛紛搵代購或台灣朋友幫手入貨,肥水流晒別人田。

20180304_005127.jpg

台灣七仔今次又改玩法,終於唔使你飲咖啡飲到胃穿窿:由2月14 至3月25日,每消費滿50元台幣即可獲1點,儲滿6點再加79元台幣即可抽一款,或者儲滿8點免費換一部,即係最低成本為379元台幣,折合港紙約101元。今次BUGATTI、McLaren及PAGANI各有4部,總數12部,包括:

  1. BUGATTI Chiron
  2. BUGATTI Veyron 16.4
  3. BUGATTI Veyron 16.4 Super Sport
  4. BUGATTI Vision GT
  5. McLaren P1
  6. McLaren 650S Spider
  7. McLaren 540C
  8. McLaren 675LT Coupe
  9. PAGANI Cinque Roadster Fangio
  10. PAGANI Huayra BC
  11. PAGANI Huayra Roadster
  12. PAGANI Zonda Revolución

DSCN4606.JPG

其他可以換購的仲包括積木式旋轉收藏盒、McLaren西裝袋、手提袋及行李篋、TSM生產的1/18 McLaren P1、PAGANI Huayra BC、PAGANI側揹袋、掛鐘、BUGATTI雨遮及鎖匙扣等。不過大家焦點自然不過落於12部1/64車模身上。

DSCN4629.JPG

一如以往,12部車仔用上類似京商法拉利盒蛋的組合式設計、車身、底盤、軚盤、中控台、輪圈、輪軚均需要自行組裝,玩法與京商一模一樣,附盒附送說明書及螺絲批,砌車不假外求。今次車模終於剔走迴力車設計之外,更重要係BUGATTI及PAGANI的引擎蓋可以揭開,讓買家欣賞引擎構造,引擎亦經特別上色,造工細故。不過,BUGATTI及PAGANI處理手法不同,BUGATTI的開啟方法是將引擎蓋連車尾一同揭起,PAGANI則是將整個車尾與車頭分離,雖然無法做到與真車相同的後揭式設計,但仍可做到只有車頭、引擎裸露,這也是包括京商在內等其他品牌未曾達到的高度。曾炮製法拉利及MINI Cooper系列的GRANI & PARTNERS終於載譽歸來,取代生產日產GT-R的Zhuhai Jetsburg Exploitation & Making of Plastic Co Ltd,但包裝盒的中文說明指製造商是來自香港的恆業市場推廣有限公司,或者係中介人的關係,等我再索索料之後八俾大家知。

DSCN4620.JPG

同京商一樣,自行組裝嘅好處係基本上每部車都推得郁,今次12部車全部推得郁之餘上色、造工都好唔錯。車款方面,除了AUTOART BUGATTI EB 16.4 Veyron及京商OEM PAGANI Huayra BC外,BUGATTI以及PAGANI好多車款都係第一次推出,至於McLaren則因京商曾推抽獎車以及不能打開引擎蓋等原因而無另外兩個品牌般受歡迎。然而,呢批車都有唔少值得改善嘅地方,例如PAGANI系列經常出現車尾無法上緊及彈起嘅現象,BUGATTI則將尾冚上好後難以打開,最讓人期待的BUGATTI Vision GT藍色毫無反光效果,車身及底盤亦無法緊緊連接,令人失望;McLaren或者因為無乜活動組件,加上車身同底盤用兩粒螺絲上實(BUGATTI及PAGANI只有前面一粒),感覺最實淨,可惜珠玉在前,與京商比較的確佔不了太多優勢。

DSCN4278.JPG

整體而言,7-ELEVEN今次「全店三大極速超跑集點送」取得完滿成功,除了台灣本地居民外,香港、內地以至東南亞對這套車模的需求甚殷,再次證明只要質量過關,不愁沒有市場。唔知下一套又會係咩呢?

葛事訪問 – 4A like Black x Tarmac Works Art Car

上兩個星期Tarmac Works於柴灣總壇舉行了Art Car Exhibition展覽,展出與4A like Black主腦葛民輝(阿葛)聯乘的1/1 Audi R8 LMS賽車以及1/64 Area 64賽車場,三款聯乘的限量版賽車更火速售罄。究竟是甚麼原因促成這兩個風馬牛不相及的本地品牌合作?當中又有甚麼火花?

DSCN3868.JPG

「認真」做1/64賽車場

「最初以為火柴盒車仔只係玩具,但細睇又有鋼絲軨、輪胎又可以換,以往只有大比例模型車先有咁細緻。」阿葛從本地賽車運動員李英健(Marchy)認識Tarmac Works這個品牌,他眼見車模製作認真,於是產生聯乘的想法,「記得由去年暑假閒談時講起,既然Tarmac Works認真造車,不如like Black認真地幫忙做包裝、推廣,所以我提議做1/64賽車場供Tarmac Works試車,讓品牌每次展銷都有焦點。」這個名為AREA64的場景份量十足,面積較餐桌還要大,除了有賽道、維修區、隧道以至麥當勞外,更安裝多支針孔鏡頭,通過畫面讓人猶如置身賽場之中,「今次聯乘的切入點是『認真』,因為鮮見有品牌會認真製作賽車場場景擺放模型車,最多都是靜態場景,但我們目標不只如此,我們想將郁動賽車,然後大家可以在網站上看到賽時直播。」如果大家有留意德國漢堡的Miniatur Wunderland,大概可以想像完成品是甚麼模樣。

WhatsApp Image 2018-01-28 at 8.49.46 AM.jpg

阿葛為AREA64賽車場拍攝了25條花絮片段,每條縮時短片長約20至25分鐘,粗略估計用了至少260小時純粹安裝,包括鋪設草粉、連駁電線、上啤軨、界木板、開弧位等,同時因唔識接駁電線及計算電壓,最後有木工、持牌電工以至油漆師傅一同完成第一階段,「第二階段的動力組件如摩打等均未完成研發,我們希望能做到將磁石如迴轉壽司轉動,減輕重量之餘要唔貴,可惜市場上並無相關配件,跟道具朋友傾過佢哋都無辦法做。」阿葛坦言最喜出望外的是購自鴨寮街、每支約$200的針孔鏡頭,因為GoPro未法如針孔鏡頭輕易收藏在場景中,他沒想過鏡頭能夠調校焦距,但同樣地鏡頭也是他不滿意的地方所在,「鏡頭感光度不足時畫面會自動轉成黑白,加上每支鏡頭的色溫均有偏差,打燈時要逐支調校。」據知阿葛正努力趕工,希望在暑假前完成第二階段。

沒有「特色」的特色

「你怕唔怕到你個女嫁人後聖誕禮物都仲係嗰部車模?」阿葛對Tarmac Works首腦Felix笑言怕車模銷量欠佳,因此參考製作限量版Tee的經驗,一口氣推出3款不同顏色,「設計概念源自同一花紋,特色可以話係無。」不過,單單是披上4A like Black拉花就已經係最大賣點,「我份人比較心懶,全黑色就好,但黑色都有分深淺反光啞色,有啲質次會幾好睇。至於純啞色又太低調,最好都係黑底反白,形成強烈對比。」他透露曾希望用對比最高的黃色,然而好難控制,而紅色在4A like Black前作曾經用過,放在賽車上可帶出火辣的感覺,於是今次合作只推出黑、白及紅三款顏色。至於專屬貨櫃箱就希望重塑1/64的效果,因Tarmac Works原裝紙盒設計相對扁身,未能反映現實情況。膠貨櫃設有軌道可將車模連底座原架推入,前海面板亦可更換透明膠片作展示用途,一舉兩得。

被問及4A like Black會否與Tarmac Works作第二次合作,阿葛表示開放態度,「我們有好多概念,但最後是否成事卻要看大家配合,特別是開發情況及成本,甚至是時機是否適合或市場是否接受。」

DSCN3880.JPG

「係你玩車唔係車玩人你」

唔少朋友都知道葛文輝是愛車之人,但唔知模型車又是不是他的那杯茶呢?「我無刻意儲模型車,好多模型車買咗之後唔捨砌佢,因為唔去舊化、改裝就只不過係純粹測試模型是否可以結組合。退休後會的起心肝慢慢砌,以往買的模型全部擺放在貨倉之中。模型砌完之後要搵地方擺,需要好啲空間、時間去慢慢享受,與畫畫一樣。」阿葛直指只要模型車做得精細、線條優美就會購買,無特別傾向。以為阿葛對真車的要求嚴謹得多,他現時的座駕由97年開到現在,朋友也不斷叫他換車,「儘管沒有電門,但這個款式我覺得最順眼最耐看,反而現在的新車太科幻,好似過眼雲煙。」他對收藏都很長情,惟獨絕大部份是棍波型號,「愈簡單愈鍾意」,如蓮花的Elise及Exige,「車手感覺無得頂」,並笑言如果只得一個泊位的話他寧願放棄保時捷、日產GTR而保留一台fun car。不過,工作用車最重要的還是的乾淨企理、載客量大足時能夠載貨,代客泊車亦不會心痛。阿葛總結玩車的心得,「簡單、能和車手溝通、精神、唔易壞,唔係就係車玩你唔係你玩車。」

無論玩真車定係模型車,道理都是一樣吧。

2017年車壇大事回顧

仲有幾個鐘就踏入2018年,不如等我哋盤點一吓2017年嘅車壇大事。2017年可算係迎新不送舊嘅一年,除咗有新品牌磨拳擦掌打入市場,傳統大牌被迫積極回應,但QC(質量監控)、貨期仍然係挑戰。即刻盤點17年車壇大事:

簡報1.jpg

1) 車價大升上車難

20170910_160115

2017年,唔只樓價升物價升,連1/64車仔價錢都升咗唔少。新車價錢與往年分別唔算太大,高(Tarmac Works HOBBY64、Tomytec、京商)、中(Tarmac Works GLOBAL64、Greenlight、Tiny微影、Tomica Premium)、低(Majorette、Tomica、Hotwheels)三級壁壘分明,百貨應百客。反而中古車款價錢就幾級跳,今時今日是但買部中古CM’S、Hotworks索價閒閒地逾百,京商就更誇張,除咗盒蛋中不受歡迎嘅車款,中古車入場費差不多要$70,受歡迎嘅由$100起,部份經典款或罕有款如Lancia Strato HF、Maserati MC12等連盒索價$250以上,去到東京雖然車款較多車價較平,但亦較兩、三年前升一倍以上。部份鋪家指出近年來自內地、台灣、馬來西亞等地的買家持續掃車,未來經典車款易手價有機會再搭級上升,想入平車就更有難度。點解CM’S、Hotworks要摺得咁早呢?唉,18年都唔知點買,買新車似乎更抵玩。

2) 18年見真章 – MINI GT

25395778_1560678940681107_2062127379212073356_n.jpg

今年有多個新品牌加入戰團,講驚喜莫過於TSM以MINI GT加入戰場,受惠廠方坐擁多家車廠如美國Honda(Acura)、Ford、Maserati、McLaren、Jaguar、Bentley的CAD圖檔,因此MINI GT能於4個月內落實12個品牌、29款車模的版權,12月公佈時震撼車壇。MINI GT亦是少數使用合金車底的廠商之一,當然萬眾矚目嘅本田CIVIC TYPE R 2017 (FK8)及日產GTR R35將於農曆年前後派貨,屆時勢將與Tarmac Works正面對撼,呢場戲碼千祈唔好錯過。TOYSOUL期間MINI GT亦展出其他車款,但最吸引嘅吳莫過於Land Rover Defender,除咗Schuco部90之外基本上無對手,希望18年出得切。香港車款方面,應該會有,但未有期,繼續等。

3) 多線發展 – Tarmac Works

20171004_184933

繼年前車海攻勢後,Tarmac Works今年除了正式推出副線GLOBAL64及加入更多歐洲車款如Mercedes-AMG GT3、BMW M3 E30、外,更與多個品牌合作,如Cody Walker、Sony Playstation、Deep Lifestyles Supply Co、Initial P合作推出別注版車模以至Tee,實行多線發展,成功開拓東南亞市場。18年HOBBY64將會推出TCR、GT3等賽車,GLOBAL64則以歐洲車為主,街車、警車、Place Car、Safety Car等都有選擇。Tarmac Works來年會與葛文輝合作推出貨櫃箱,不難成為追捧對象。17年品牌受QC問題困擾並公開致歉,廠方指未來會加強抽檢工作及密度改善情況,亦歡迎買家將有問題的產品(非人為損壞)作更換。Tarmac Works對推動車仔文化嘅熱誠相信大家都睇到,希望18年QC質素續有改善,咁大家科水都會科得更爽手。

4) 法「動」驚喜 – Majorette

20171006_214403

2017年Majorette成功回歸香港,並帶來多款新車款以至地區限定版本,如年中的泰國、印度的士以至年尾的杜拜警車都廣受市場歡迎。不過儘管玩具反斗城、Aeon及各大小玩具店都有派貨,熱門車款如VW Polo R WRC及Subaru WRX STI等仍然影都唔多見,品牌同代理睇嚟都要諗諗計睇吓點樣可以解決呢個問題。另一個問題係車款更新速度唔夠快,暫時未可以好似Tomica咁每月幾款新車等粉絲月月買。至於車轆方面廠方開始陸續為新車換上新轆,儘管仲未換上軟軚,但賣相已經好得多,18年款嘅Audi R8 Spyder應該係首款新轆車,其他款可能仲要再等等。香港特別版方面唔知今年又有無機會呢?

5) 動作多多 – Tiny微影

25353948_1560548637360804_2911057511184540256_n.jpg

介紹Tiny微影其實有啲難度,雖然佢啲新車次次都好吸引,但係出街例遲同QC問題往往令人對佢嘅形象打折扣,當打過和。以最近嘅TOYSOUL為例,包括TVB採訪車、廣播車、韋川拖車、豐田Prado、電單車以至一系列貨車車仔讓人眼前一亮,Tiny Q亦首度登場,為人詬病嘅排隊問題也得到改善。不過每次訂車後都係漫長等待,QC亦往往成為網友熱話,結果好多時落門市買車都要即場拆盒驗車,無論係對品牌形象抑或係買家觀感都唔理想,不過呢啲都係老生常談,建議品牌適時公佈產品開發進度等,以及加強對廠方的監察,減低壞件率。坊間太多對Tiny微影嘅討論,我亦不必在此寫太多。總之香港品牌我一定支持,但絕非盲撐,希望品牌切記要對得住支持你嘅買家。

6) 東洋大軍 –  Ignition Models

24852319_889365514560884_5561098806215126268_n.jpg

12月Ignition Models公佈將首推1/64系列,並與Tarmac Works合作市場推廣及分銷事宜。IG的1/18、1/43車模有口皆碑,價錢亦非入門,1/64系列是廠方自家設計及生產,質素有保證,至於價錢呢?應該$200有找,18年率先推出的1/64 Rocket Bunny / PANDEM 豐田86及日產GT-R R35,要成為年度之車相信毫無難度。不過,AE86幾時出呢?

7) 澳門過江龍 – Zoomer Miniature Models

DSCN1199

今年上半年來自澳門的Zoomer Miniature Models走勢凌厲,推出多款包括福隆新街、澳門大賽車維修站、貨櫃場等場景及1/64 澳門治安警人仔打入市場,場景以厚卡紙製作較台灣作品更容易安裝及收摺,成為蝸居因物。然而踏入第三季後品牌未有新作消息,希望18年品牌能夠堅持落去,製作更多不同的場景,等我哋有多啲唔同嘅配搭。

8) Brand in China – 拓意模型玩具

TB2DAKtXvxNTKJjy0FjXXX6yVXa_!!83919010.jpg

話說年中上淘寶搵場景時竟然搵到有1/64中石化油站賣,仲要係拎Full License,原來呢間拓意模型玩具之前出過其他比例嘅玩具車,然後投身場景市場,「日本有Tomytec、香港有微影,內地應有自己的品牌,我們的目標是做內地的微影」,由授權、設計到生產用了差不多一年時間,並以二百多元的訂價成功搶灘,質量亦獲外界肯定。廠方食髓知味推出1/64公安、消防公仔以及鐵模1/76油罐車,未來會推出8款公仔、14款包括金杯、捷達、五菱等內地常見車型及更小巧的場景,「內地沒有企業做小車,對1/64的發展充滿信心。」雖然內地車型唔多熟悉,但場地同人仔值得留意。

9) 大失所望 – 7-ELEVEN保時捷經典911系列

DSCN1322

之前幾套都好哋哋,一掛京商牌頭就出事,仲要呢間京商同日本京商又有分別,呢套車淨係入咗兩部京商無出過嘅911 Carrera RS 3.8(964) (964只出過911 RS版本)以及911 GT3 RS(991/1),一部車太短另一部車轆太大,幾十蚊貨仔都唔預佢推得郁但QC(或者設計有問題)都唔好差成咁,之前累積落嚟嘅好評咁就一鋪清袋,唔知18年又係點呢?

10) 唔打香港市場嘅本地品牌 – RMZ City

IMG_0299

究竟香港市場係咪太細所以連香港品牌都睇唔上眼呢?呢個問題我唔識答,自從官網喺11月摺埋之後,買RMZ City城市套裝就只可以上淘寶之外我都諗唔到有咩辦法。其實幾十蚊套RMZ City城市套裝性價比唔錯,奈何香港竟然買唔到,有啲唏噓。

11) 法拉利隔周登場 – Ferrari GT Collection雜誌

DSCN2827

繼Rally Car經典收藏誌後,Pansing Hobby Shop 再接再厲,引入Ferrari GT Collection雜誌推1/43法拉利車模,大部份熱門車款如F40、450 Italia、360 Modena、Enzo Ferrari都有份,加上雜誌英文用字手淺白,自己睇或者買俾小朋友睇再自己抽起均可。踏入18年已經翻譯成中文的DeAGOSTINI 1/24 Ferrari經典收藏誌相信有機會來港,至於1/43 Formula 1雙周刊似無仲未有聲氣,惟有繼續觀望吓。

12) 紀律部隊生力軍 – AURORA

DSC04470

「瘦田無人耕,耕開有人爭」,以往紀律部隊車輛主要集中在1/76市場,但今年包括AURORA、Tiny微影以及新加坡Masterpiece Collectibles同時搶攻1/43消防車市場,獲EMS監修的AURORA除推出DENNIS Sabre泵車及警隊水炮車打響名堂,年中又公佈1/43平治519 CDI衝鋒車、交通部衝鋒車、機場警區警車以及警察全頻無線電干擾車,價錢仲要平消防車一大截,與Tiny微影嘅平治Sprinter系列分庭抗禮,大賣自然係意料中事。至於下款軌路兩用車就要等吓官方有咩update喇。

13) 捨易行難 – BusByBono

DSCN1429

巴模市場百花齊放,幾乎月月都有新車出,要脫穎而出惟有以質取勝。BusByBono捨易取難採用生產成本高、開發時間長的ABS注塑,精緻度更高之餘,同時能避免「谷模」、「起泡」情況,上油光澤度亦可媲美金屬。造功方面亦一絲不苟,每盞車燈也是人手裝嵌,為了達到最佳上色效果,某部分車身是用印刷機打印出來,因此線條會比較直和幼細,平均買家在2架內已經挑到心頭好。BusByBono更首創金属製QR code取代了紙製證書,QR code 是配對的,一個在車底、一個在展示座上,只要用手機 QR scanner app 便可以讀取模型資訊。儘管車價唔算便宜,但對有要求的收藏家而言,自然願意多付一點換取更佳的質素。

高度戒備

2017年已踏入尾聲,今年車壇有唔少生力軍加入。除1/64外,1/43市場同樣熱鬧,就如年頭推出DENNIS Sabre泵車及警隊水炮車的AURORA,年中就公佈1/43平治519 CDI衝鋒車、交通部衝鋒車、機場警區警車以及警察全頻無線電干擾車(ECM),為市場帶來驚喜。

DSC04455.JPG

乜AURORA唔係專做消防車架咩?「我哋無限自己只做消防車,一來題材較局限,二來市場太細。我哋一開始計劃係推出兩款消防車再出一款警車,希望先打好形象再推出更多特別車種滿足收藏家需要。」不過負責人Paul指論製作難度消防車明顯難得多,「車體外部比較多燈號及各式各樣裝備,特別係車頂同車尾兩條梯,唔用蝕刻件好難做到與真車相同的質感,然而每件蝕刻件都需由人手屈曲至同一弧度,有一定偏差,連包裝都要小心設計希望不會在運輸過程中脫落及損毀,極花人力、時間及成本。」警車方面需要考慮的部份比較少,相對四平八穩,因此兩者車價有明顯差別。

另外,AURORA警車每款產量只有200部,顯然不是走大眾市場,Paul亦明確表示車款出完不會翻出,亦避免與其他品牌做相同車款,「AURORA因為產量少及人手加工,著重精緻度,重質不重量。」他又透露會推出配件及水貼供買家自由發揮。暫時網友收車後反應正面,而一早遭訂購一空的警察全頻無線電干擾車(ECM)即將上市。出完兩款消防車及警車,AURORA下款大作將會是消防處軌路兩用車,查實呢部車較DENNIS SABRE更早設計,但因故需要延後,不過最終仍決定正式投產,廠方期望農曆年前出貨,值得期待。

AURORA憑出色造工及高性價比成功打進收藏家市場,然而其他對手亦絕非省油的燈,2018年相信會有更多款色更好的作品供市場選擇,不怕無得揀,只怕財力驚買唔晒。