讓奇妙繼續飛翔

「我哋嘅心態唔會停落嚟,會不斷試新嘢,好似超級跑車、SUV、貨車、電單車以至場景都屬於我哋考慮之列。」Tarmac Works剖析17至18年品牌企劃,「希望為這個沉悶的事市場帶來Magic(魔法)!」

20171004_185650.jpg

在不起眼的工廈門口背後,原來是Tarmac Works的總壇所在,寬廣的工作空間擺放了1:1的駿馬模型及賽車模擬器,然而重點當然是散落不同工作檯上的1/64鐵模,預告未來一季推出的新車及品牌企劃。品牌大腦Felix透露,「(品牌)推出一段時間,聆聽市場訴求後,新車推出周期將由20日增加至30日左右,每次推出的新車不多於4部,與Tomica相近。」未來每月新車將出現更多車款,一改現時一車多花的推車策略。

20171004_184933.jpg

18年新作陸續曝光

Tarmac Works早前直播時率先公佈將會推出本田Civic EK9及豐田Supra,「推出EG6後收到很多查明關於EK9消息,我們推出的EK9將偏向賽車版,唔會同Tomica正面對撼。至於Supra則會與Cody Walker(Paul Walker的弟弟)合作推出慈善版本,其他版本將於稍後推出。」Felix透露Civic Type-R(FK8)也在名單之上,但不急於一口氣盡推,「唔想不斷推本田車推死個市,將維持每隔幾個月推出一款本田車的計劃。」品牌近期推出Mercedes-AMG GT3、BMW M3 E30等,測試市場對歐洲車的接受程度,積極開拓新客源。除了日本車款外,短期內品牌將於澳門大賽車期間推出兩款特別版,未來HOBBY64將會推出TCR、GT3及超級跑車如Koenigsegg、Pagani等,其他如SUV、運輸車、車房及其他場景等都在考慮之列。至於入門級GLOBAL64則以歐洲車為主,街車、警車、Place Car、Safety Car等都有選擇。

驗屍官團隊

Tarmac Works的團隊中不乏儲車逾千部的專業車友,更有賽車的活字典,因此對車模都一絲不笱,製作部份就佔去6至7成時間,「賽車於排位賽、正賽時的拉花有可能有細微變化,每時出圖後同事會與真車圖片比較求證,淨係睇都睇幾日。」因車身大小有限制,贊助商貼紙會縮到幾乎睇唔到,但團隊反而會說服Felix如實印製,Felix笑言賽車拉花的滿意度有90分,「效果值得appreciate(欣賞)」。他們的執著同樣反映在質量控制上,試過有批1/43三菱Evolution X貼紙出現問題,Felix與同事去貨倉逐架驗車,結果向廠方成批退貨,導致交車時間大大延遲。「要對消費者負責任。」他指出車模有機會有一定比例的瑕疵品,谷油等屬個別事件,如非人為損壞均接受換貨。

Crossover誕火花

除了AAPE外,Tarmac Works更與多個品牌洽談合作,製作更多聯乘作品,「我們希望合作能夠製造火花,而非製造敵人。」因此除了車模之外,最近品牌更與服裝品牌Deep Lifestyles Supply Co合作推出品牌Tee及與Initial P推出手機殼,「市場有一群人願意俾錢買靚的車Tee及周邊產品,但以往日本車Tee價錢不是太貴就係只得一個Logo幫人賣廣告,所以希望為車友們提供多一個選擇。」除了首批EG6車款外,未來將推出灰色澳門賽車特別版以及Lancer Evolution V款式,務求一款車有一件專屬Tee。

至於剛公佈與Sony Playstation為Gran Turismo Sport推出的1/64別注版賽車更係一大突破,儘管不是與遊戲一同出售的同綑裝,但同樣需要獲日本官方及Polyphony digital認可,連創作人山內一典也要親自確認,咪話唔犀利!

「好多人都話(車模市場)好悶,我哋就係要將Magic帶俾大家!」

 

 

Advertisements

新‧東京攻略

記得幾年前去寫過幾篇東京攻略(),事隔幾年再去東京梗係學閃令令旅遊書咁Update吓啲入貨點同埋發掘一吓「新景點」(其實都唔算新)啦!

20170909_123236.jpg

出發東京前曾經問過多位網友有關東京的買車資訊,但因東京實在太大行唔晒,加上係家庭旅行,只可以安頓家人喺商場後極速搵車,所以後面所列嘅鋪頭唔係間間都去過,有啲係直接喺minicar magazine入面抄出嚟等大家參考一下,方便大家計劃行程。


Post Hobbyポストホビー新宿店

20170906_183435.jpg

因為喺新宿訂酒店,順理成章由新宿開始寫起,由原宿搬到Post Hobbyポストホビー新宿店主打1/18及1/43嘅模型車款,佢按真車生產商英文字母排列新車,所以如果搵特定車款嘅話呢度會比較容易,但價錢唔算親民,所以空手而回。

  • 優點:1/43款式多而且齊,另有1/18可供選擇
  • 缺點:1/64欠奉,價格不便宜
  • 貼士:因為入口位處冷巷唔易搵到,見到氣功招牌搭軨上3樓就係

Post Hobbyポストホビー新宿店

  • 地址:東京都渋谷区代々木2-11-20 新宿成和ビル3階
  • 營業時間:12:00-20:30(逢星期一休息)
  • 電話:03-6383-4255
  • 交通:JR、私鉄各線 新宿駅 南口より徒歩4分。

ヨドバシカメラ(Yodobaashi)新宿西口本店ゲーム・ホビー館

幾年前去大阪梅田Yodobashi買到一袋二袋,諗住東京店應該一樣,不過竟然大失所望,如果買鐵道模型都仲好啲,首先Tomica車仔選擇唔多,即月款全部售罄,1/43、1/18模型都係寥寥可數,反而1/24組合模型就有啲選擇,所以同Post Hobby一樣無貨執。

  • 優點:位置方便,除咗車仔之外仲有大量好似高達等玩具
  • 缺點:選擇不多
  • 貼士:新宿Yodobashi分好多棟,只有ゲーム・ホビー館係賣玩具,其他係賣家品、電器之類

ヨドバシカメラ(Yodobaashi)新宿西口本店ゲーム・ホビー館

  • 地址:東京都新宿区西新宿1-11-1
  • 營業時間:09:30-22:00
  • 電話:03-3346-1010
  • 交通:JR、私鉄各線 新宿駅西口

BICQLO BIC CAMERA 新宿東口店

20170904_161728

呢間BIC CAMERA其實都係因為去GU所以無意中上埋去6樓,但估唔到竟然佢竟然比Yodobashi更多車仔賣,單計盒蛋都多一大截,行開伊勢丹可以上去睇吓有無筍嘢買。

BICQLO BIC CAMERA 新宿東口店

  • 地址:東京都新宿區新宿3-29-1
  • 營業時間:10:00-22:00
  • 電話:03-3226-1111

Minicar shop GLOBAL

20170906_111156.jpg

Minicar shop GLOBAL位於JR山手線駒込駅旁邊,因為對正鐵路,就算喺月台都望得到,呢間舖頭唔少香港人都會去入貨,1/43、Tomica等車仔各佔一半半,另有貨車、巴士等另類選擇,格仔箱就乜都有啲。店舖門口有貨架擺放特價車款,結果就平買J Collection 豐田Crown的士同RAI’s 警車。值得一提,呢度啲RAI’s警車選擇比較多,鍾意警車嘅朋友建議嚟碰碰運氣。

  • 優點:價錢平選擇多
  • 缺點:分類有啲亂、除咗Minicar shop GLOBAL之外駒込駅側邊無嘢好行
  • 貼士:搵真啲可能有意外驚喜

Minicar shop GLOBAL

  • 地址:東京都豊島区駒込1-34-3 山中ビル1階
  • 營業時間:11:00-20:00(逢星期二、每月第3個星期一休息)
  • 電話:03-3941-3110
  • 交通:JR山手線 駒込駅出向左行

Mandarake中野 大車輪

20170906_124518.jpg

好多網友都話大車輪俾買手掃得七七八八無乜嘢睇,不過舖頭地下有幾盆京商,大部份都係法拉利同林寶堅尼,好此道者不妨過嚟行吓,我就喺度執咗部搵咗好耐嘅京商粉紅色Crown。另外1樓書局隔離間舖都有京商日產系列賣,門口貼晒價錢,明碼實價。Mandarake仲有唔少超合金、Figure可以睇,加上買滿5,400円可以退稅,變相抵上加抵。

  • 優點:價錢相對平、有京商1/64揀、可退稅
  • 缺點:啲貨亂咁擺,要時間搵
  • 貼士:店員英文水平唔錯,可以直接問佢有無心水車款。退稅Counter要上4樓。

20170906_124124

Mandarake中野 大車輪

  • 地址:東京都中野区中野5-52-15 ブロードウェイ BROADWAY 2/F
  • 營業時間:12:00-20:00
  • 交通:JR中野駅北出口步行5分鐘

Tomica Shop東京店

真係要講句喺香港買Tomica隨時仲易過去日本買,好似東京駅一番街間Tomica Shop都買唔到8月新車Mercedes-AMG GT R,Tomytec價錢亦貴過香港,除非你要買Tomica Shop車款、Tomica餐具、嬰兒服等周邊產品,唔係都唔需要刻意過嚟,隔離舗就主力賣PLARAIL火車。不過,東京駅一番街仲有好多好似比卡超、蒙面超人、Minions等卡通人物嘅精品賣,加上旁邊有大丸,一家大細都可以買到心頭好。

  • 優點:其實無乜,當潮下聖同買限定版Tomica
  • 缺點:款式唔多齊

Tomica Shop東京店

  • 地址:東京都千代田区丸の内1-9-1 東京駅一番街 東京キャラクターストリート Shop 7
  • 營業時間:10:00-20:30
  • 電話:03-5220-1351
  • 交通:JR 東京駅 八重洲地下街出口

Akibaリバティー秋業原11號店

幾年前東京攻略已經介紹過Akiba,但當年京商仲未炒起,唔少車款都可以用300至500円入手,今次去到京商1/64由1樓搬落地下,面積比以前大兩部,車款由F1、法拉利、林寶堅尼、蓮花、賓利、Subaru同AMG不等,但入場費由600円起,因為擺放無序,逐部逐部睇都頗花時間,今次就買咗Lancia同埋Alfa Romeo返去,或者之前買買埋埋都唔少京商,變咗今次去無乜驚喜。

  • 優點:款式極多
  • 缺點:罕有款式少
  • 貼士:1樓有鐵道模型、京商1/64如果要有紙盒價錢貴好幾倍

Akibaリバティー秋業原11號店

  • 地址:東京都千代田区外神田4-7-1(8号店となり)
  • 營業時間:11:00-20:00
  • 電話:03-5294-5661
  • 交通:地下鉄 東京メトロ銀座線末広駅下車1號出口

Tam Tam Hobby Shop秋葉原店

喺Akiba斜對面嘅Tam Tam Hobby Shop佔地兩層,一層賣高達、氣鎗,另一層就賣車模同埋鐵道模型。因為價錢唔算平,而且1/64車款好少選擇,每次嚟Tam Tam都係嚟睇嘅居多,唔知係咪我錯覺,硬係覺得鐵道部愈來愈大,車模就愈縮愈小。

  • 優點:地方大行得舒服
  • 缺點:價錢唔平、無乜1/64
  • 貼士:買車貼士就無,但Tam Tam對面有間牛かつ壱弐参嘅炸牛扒幾好食,成日都排長龍

Tam Tam Hobby Shop秋葉原店

  • 地址:東京都千代田区外神田6-14-2 さかい末広ビル4F、5F
  • 營業時間:11:00-PM9:00
  • 電話:03-5816-5668
  • 交逍:地下鉄 東京メトロ銀座線末広駅下車4號出口

IIADOアイアイアド・カンパニー

20170907_123355

去完築地食魚生之後有咩做好?有時間不妨行幾步過歌舞伎座旁邊嘅IIADOアイアイアド・カンパニー買車仔。淡黃的燈光加上悠閒的音樂讓這家店像Café更多於模型店,店內較多懷舊車仔、中古Tomica、Minichamps、Autoart的1/43都有唔少,京商1/64反而屬於少數,大多數散落在檯的不同位置,要花啲時間睇真啲。

  • 優點:多懷舊款式
  • 缺點:1/64選擇唔多
  • 貼士:建議最好12點後去,因為有網友報料11點去仲未開門

IIADOアイアイアド・カンパニー 【銀座本店】

  • 地址:東京都中央区銀座4丁目14-4 ファミールグラン銀座4丁目1F
  • 電話:03-5148-1582
  • 營業時間:(逢星期一休息)12:00-20:00
  • 交通:地下鉄日比谷線東銀座駅5番出口步行1分鐘

京商ビレッジ

喺台場除咗高達同埋豐田MEGA WEB之外仲有呢間位於VenusFont3樓嘅京商ビレッジ,過往聽朋友講試過半價買京商盒蛋,但今次去無呢隻歌仔唱,新Honda NSX同S660都以正價出售,另有法拉利及蓮花系列,可以買盒嚟抽一過手癮,以及精裝版模型。其他比例嘅京商模型價錢亦不吸引,或者廠方目的其實係主推遙控車系列,所以連賽道都砌埋出嚟。不過可以見到傳說中的1/64 Alfa Romeo 156真身總算不枉此行。

  • 優點:京商1/64全新盒、精裝版現場發售。可以一睇京商1/64盒蛋全車系列陣容
  • 缺點:價錢唔係特別平

京商ビレッジ(KYOSHO VILLAGE)

  • 地址:東京都江東区青海1丁目3番15号 ヴィーナスフォート(VenusFont)3F
  • 營業時間:11:00-21:00
  • 電話:03-3529-0941
  • 交通:海鷗線青海(あおみ)駅下車步行5分鐘

Grease

喺VenusFont隔離仲有History Garage等大家睇吓經典名車,樓下仲有間模型店Grease,不過價錢相當貴,都係留返時間睇真車好過。我去嗰陣隔離仲做緊WRC展覽,展出多部豐田、Subaru組典賽車,值得行吓。

20170907_163310

Grease

  • 地址:東京都江東区青海1-3-12
  • 營業時間:11:00-21:00
  • 電話:o3-3599-o6o1
  • 交通:海鷗線青海(あおみ)駅下車步行5分鐘

今次因為時間所限未能夠一一行晒咁多間模型車店,以下係整理名單大家可以參考一下,建議大家出發前再上網站更新一下營業時間及休息日以免白行一逛。

20170910_160115

其他東京玩具車店

SHU-STOCK(シューストック)

  • 地址:東京都港区南麻布5-5-9 ゴトウハウス2F
  • 營業時間:13:00-20:00(逢星期一休息)
  • 電話:03-3440-6035

DreamBox (ドリームボックス)

  • 東京都墨田区業平1-12-7 石塚マンション 1F
  • 營業時間:11:30~19:00(逢星期一休息)
  • 電話:03-3621-0238

Gulliver

  • 地址:東京都豊島区巣鴨1-15-2 アーバンハイツA棟 1階
  • 電話:03-3943-3286
  • 營業時間:11:30-21:00(逢星期二休息)

ミニカーショップ ケンボックス(KENBOX)

  • 地址:東京都新宿区西新宿7-23-9西新宿小林ビル1F
  • 電話:03-5348-7033
  • 營業時間:12:00-19:00(逢星期一休息)

minicar shop IKEDA (ミニカーショップ イケダ)

  • 地址:東京都荒川区西日暮里2-15-9 大藤ビル
  • 營業時間:12:00-19:00
  • 電話:03-3806-1219

Minicarshop KOJIMA

  • 地址:東京都品川区西大井6-9-3 ヴィラロトンダ1F
  • 營業時間:13:00-18:00 (逢星期二休息)
  • 電話:03-5743-7222

MODEL AUTO ENWA

  • 地址:東京都渋谷区渋谷3-10-1  渋谷MJビル8F
  • 營業時間:13:00-19:00(逢星期三、四休息)
  • 電話:03-5766-0188

サンハイム南青山

  • 地址:東京都港区南青山5-14-5 サンハイム南青山2F
  • 營業時間:11:00-20:00(逢星期二、每月第個星期三休息)
  • 電話:03-3498-9876

買拉花

話咁快2017年已經過咗4分3,但感覺上好似已經買咗舊年成年買嘅車仔,無他,Tomica轉強、Majorette重新供港、京商又再出車,再加埋Tarmac Works新車浪接浪,年尾埋數都咪話唔肉赤!

DSCN2211.JPG

以Tarmac Works為例,佢每次兩部兩部咁出,通常一部賽車花一部標準色,絕大部分車款我都係淨入賽車花,但最近推出嘅三菱Lancer Evolution X,淨色仲靚過ADVAN賽車花,兩部車連內裝都有不同,最後當然係兩部都帶晒返屋企。

Tarmac Works現時分高質HOBBY64及入門GLOBAL64系列,前者行精緻化路線,質素與大廠Tomytec有得fight,有齊頭尾燈、軟軚,不過車款多一大截,連Mercedes-AMG GT R、Audi R8 LMS、BMW M3等跑車都有涉獵,加上不時與AAPE等品牌及車手Crossover,吸引愈來愈多捧場客。今次推出嘅2008年JRC三菱Lancer Evolution X ADVAN賽車(九州唐津站)同埋Final Edition,前者一身招牌ADVAN紅黑拉花及Ralliart字樣,後窗則有車手奴田原文雄及領航員的姓名,賽車編號及贊助商則印在車門位置,前座設有五點式安全帶,上色、完成度及精細度都一貫的高水平,美中不足係後座未有換上Rally賽車的防滾架。藍色則屬於Evo X的最終版本,銀底藍的車色討人歡喜,除了在加入霧燈外,車櫳則換回標準座椅,輪圈款式亦有不同,但唔知係咪軟軚軚紋嘅問題,從車側睇埋去會以為用咗硬膠軚,不過對整體的影響唔大。就係因為種種分別,結果兩部都入晒,CIVIC Type R情況完全一樣,但拉花更多……

記得上次訪問官方提過會推出其他Evo型號,唔知而家進度點呢?

大軍壓境

人人玩場景唔通人人都想玩場景咩?當然場景定義人人唔同,有啲就咁部車加背景就叫場景,有啲一絲不苟到玩晒燈光街景人仔,以往人仔多數係外國廠出所以難夾香港街景,好彩最近有品牌推出1/64人仔系列,唔只香港警察,就連澳門治安警都有得玩,玩法自然更多元化!

DSCN1917.JPG

玩香港場景,唔少人首先會諗起本地品牌的唐樓系列,但有車有樓但無人始終欠缺靈魂,不過人仔模型多以1/87(H0)或者1/150(N Scale)為主,1/64則只有Greenlight及Tomytec可供選擇,惟前者偏向美式風格,後者則隨場景附送,價格不非。今年推出紙板澳門賽車、貨櫃場場景大獲好評的Zoomer Miniature Models最近踩過界,首推3套1/64人仔套裝,一套3隻1/64人仔,包括交通警、軍裝警察及市民,另外更有澳門治安警察塗裝,可以配搭品牌推出的福隆新街場景,不過要做到「人在人往」的效果,睇怕都要買到幾盒。

論質素,1/64人仔難以與1/43以至1/18比較,不過廠方以動作多多取勝,如交通警分抄牌及指揮交通兩種,路人則有截的士、商人、煙民3款造型,唔知係有心定無意,煙民左手支煙大到同隻手一樣粗,不過正因為動作多多,所以與背景、車仔有更多互動。惟憾的是Zoomer這套1/64人仔系列未能與比例可能是1/64或1/76的另一品牌紀律部隊人仔拍埋一齊玩,一拍埋高度即刻睇到有分別,可惜。未來Zoomer會推出如車房工人、賽道工作人員等人仔,屆時其他場景都有人可玩,連同其他如車床、金屬貨櫃等,仲唔係大軍壓境?

泰滋味

之前都寫過幾篇稿介紹法國車仔品牌Majorette,今次再寫,無非想讚品牌及代理火速將本土版泰田的士及篤篤(tuk-tuk)輸港,等大家有平車玩,抵讚!

DSCN1693.JPG品牌歷史可以睇返舊年條稿(《潛龍勿用上》/《潛龍勿用》下),但轉捩點卻喺今年更換代理後(《見龍在田》),新代理Asia Goal除咗將一系列新車如Limited Edition、Premium Cars派貨到反斗城、Aeon、奇趣以及各大玩具店,除個別車款好似VW Polo R WRC、Subaru Impreza外,其他車款如平治SLS AMG等都不難買到。然而,因為車款更新周期相對慢(Tomica一個月3至4款新車),話咁快大家都入晒貨,之後又買咩呢?

DSCN1701.JPG曾經寫過Majorette好興為不同市場製作當地版本,好似有杜拜超跑警車系列、德國警車、澳洲消防車等,而廠房所在地泰國理所當然推出周街都有嘅豐田Corolla的士同埋篤篤系列,豐田Corolla分三隻淨色(藍、粉紅、紅)以及三隻two-tone色(黃綠、藍紅、黃紅),雖然車色唔同,但每部車車門位置有的士字樣,車頂則有TAXI-METER仿頂燈塑膠件;篤篤則有分藍車黃框黃轆、藍車紅框錶轆、綠車黃框黃轆以及紅車銀框銀轆四款,比較明顯較Corolla大,車頭設車牌子車頂設TAXI膠牌。與其他系列比較,兩套泰國車造工一般,幾乎部部車啲油除咗偏厚外仲有不同程度嘅出界、Corolla車軸明顯過長、篤篤內櫳膠味濃等等。咁點解要買?一係套車算少有,記得本地別注車款幾乎唔不外銷,呢套車原本亦只在泰國7仔出售,未抵港前曾出現$270四部篤篤嘅驚人售價,結果代理定價$3X/部,炒價玩完;二係去泰國成日搭的士,熟口熟面有感情,平平買幾部擺下都唔錯;唔知代理會唔會考慮入埋杜拜警車呢?我無咁多朋友飛杜拜轉機喎。

 

去旅行 去到盡

睇到條題以為我幫網上訂飛平台賣廣告?非也。如果大家有印象嘅話,早排巴模品牌Model 1公佈咗一系列新車企劃,但係對象唔係巴士而係旅遊巴,嚟緊仲十幾款模型排隊出,今次仲唔係去到盡?

15167664_1335926103093781_8840447977431211933_o.jpg

最近幾乎每個星期都有新巴模登場,各大生產商務求搾乾市場最後一分購買力。即使貴為兩大品牌之一,Model 1也坦言市場已走向飽和,「現時巴士款式多而密,市場已經呈現吃不消之情況,加上預計市道疲弱及經濟環境轉差,我們現時考慮再檢視有關計劃之推出期及產量。」開拓旅遊巴市場正是其中之一,不過,同專利巴士模型做法唔同,旅遊巴唔單止款式多,同一個底盤可以配搭唔同嘅車身製造商,加上營運商都唔少,傾都有排傾,「我們已經與大部分非專利巴士公司及跨境巴士營運公司簽訂合同,以獨家生產權方式與巴士公司合作生產模型。」未來除了原有的MAN A91外,Mercedes-Benz、Volvo、Scania旅遊巴車款(包括左右軚款)將於未來5年陸續有來。唔好以為旅遊巴部部差唔多,唔同批次嘅車身甚至座位都有所分別,因此品牌將模型能否呈現每一款巴士及其不同批次之分別成為設計和生產時考慮的重點。除1/76外,今次企劃仲包括Q版車仔到多個不同比例模型,會唔會有1/43?未知,但可能性都大。

旅遊巴外,品牌更計劃推出行走Optare Solo 低地台專線小巴、柏麗灣的Young Man JNP6122GR2及MAN NL323、進智公交豐田Coaster專線小巴、三菱Rosa小巴、MAN A95水晶巴士及開篷巴士等等,總有一款等你乖乖進貢。

以質取勝

有人辭官歸故里,有人漏夜趕科場。除咗原有嘅兩大陣營之外,近幾年亦有唔少新面孔登場搶攻市場,如質素先決、採用ABS注塑造車的BusByBono

DSC_0331.JPG

市場巴模主要分為合金(Diecast)、樹脂(Resin)以及ABS注塑(ABS Injection)3種,三種方法各有優缺點,例如合金較重有手感,但有機會出現「沙洞」及長時間氧化發黑問題;樹脂起模時間短兼成本低,卻因膠制造生產模會縮水影響精細度;類似雙星模型車車身的ABS注塑生產成本高、開發時間長而且「輕手」,但精緻度更高之餘,同時避免「谷模」、「起泡」情況,上油光澤度亦可媲美金屬。2014年成立的BusByBono則捨易取難,追求真車的逼真感和精細度,因生產數量少及要求高品質,所以找不到合適的模具及生產供應商,最後使用瑞典精鋼模芯注塑模具制作,經過八、九個月開發,去年6月終於推出第一部巴士模型中巴DL2,每盞車燈也是人手裝嵌,為了達到最佳上色效果,某部分車身是用印刷機打印出來因此線條會比較直和幼細。因為BusByBono幾位合伙人都是巴士發燒友,所以推出的大多為巴士迷的童年回憶,主要是八、九十年代車款,如中巴DL2、Dennis Dart – Northern Counties Paladin等。

除了用料及造功唔同外,BusByBono更首創金属製QR code取代了紙製證書,QR code 是配對的,一個在車底、一個在展示座上,只要用手機 QR scanner app 便可以讀取模型資訊。品牌更力谷網上賣車,除咗將產品介紹到生產過程多方面公開讓巴士迷了解外,亦透過社交媒體收集車迷意見。當然,打鐵也要自身硬,平均買家在2架內已經挑到心頭好。

品牌最近推出首款打進英國市場的First Dennis Dart 40256,這款名為Barbie Pink的巴模,能處理車身漸變粉紅的暫時只有BusByBono一家,成功在英倫闖出名堂。BusByBono下一步目標是希望可以更靈活地處理生產數量和定價,同時建立BusByBono fan club 去加強品牌忠誠度,讓更多收藏家接觸到他們的模型。

DSCN1429.JPG

關於Dennis Dart – Northern Counties Paladin

關於Dennis Dart – Northern Counties Paladin嘅歷史大家可能俾我更清楚,網上搵到嘅資料顯示九巴曾經有批Northern Counties車身Dennis Dart(AA43-48)行走啟業 – 尖沙咀東 (循環線)的224X線及其他路線,後來除咗AA48(車牌GS9019)外,其他都賣俾皇巴士作過境巴士之用。巴模的車殼、車櫳及底盤都係以ABS注塑製造,鏡報、車軸則用上金屬物料,窗戶亦屬獨立設計需要人手裝崁,除了水箱、油缸蓋外,車窗有禁煙貼紙、車廂冷氣、扶手、海報、錢箱一應俱全,像真度高。

一地眼鏡碎

台灣7-ELEVEN出過好幾套1/64車仔,好似法拉利、林寶堅尼、MINI Cooper同埋日產GT-R系列均叫好叫座,原以為今次套波子系刊有京商加持質素會更上一層樓,點知……

DSCN1323.JPG

今次7-ELEVEN推出嘅保時捷經典911系列除咗有包括10款1/64波子,包括

  • 550 Spyder (特別版)
  • 911 Turbo 3.3(930)
  • 911 Carrera RS 3.8(964)
  • 911 GT3 RS(997)
  • 911 GT2 RS(997)
  • 911 Carrera GTS(997)
  • 911 Speedster(997)
  • 911 Carrera S(991/1)
  • 911 Turbo(991/1)
  • 911 GT3 RS(991/1)

仲有拖車收藏盒同埋1/24 Porsche 911 GT3 RS(991/1),但焦點當然落喺車仔度,除咗剔除回力車之外,包裝盒上竟然有京商字樣,大家都喺度估究竟會唔會用返以前京商套模,其中京商以往6套波子系列均未出過嘅911 Carrera RS 3.8(964) (964只出過911 RS版本)以及911 GT3 RS(991/1)更備受矚目,就算要大家飲4杯咖啡加$20(台幣79元)換都無怨言。

因為之前入咗成套京商波子,今次我淨係買首次推出嘅911 Carrera RS 3.8(964) 同埋911 GT3 RS(991/1),包裝盒正面印咗911 GT3 RS(991/1)同911 Speedster(997),側面係10部車嘅截圖,背後則係安裝說明及生產資料,點解有安裝說明?只因呢套車同京商拉利系列一樣要自己上螺絲(連螺絲批),或者係拉利系列造得出色嘅關係,期望自然更高。單睇個殼其實都okay,上色無一舊舊,車燈車窗位都可以,係對側鏡好似就甩就甩,當然幾十蚊貨仔都唔會expect佢十完十美,但戲肉嚟喇,咦,點解964條尾軸擺唔落底盤度嘅?原來車軸插得太入車轆結果窄過底盤,拉極都拉唔返出黎,結果夾硬扭上去,唔駛自然一邊高一邊低,推唔郁真係預咗,咁就浪費咗個模。

輪到911 GT3 RS(991/1)又點?點解個轆咁大嘅?一上螺絲就出事,因為輪拱逼實套轆,前邊仲逼到拱起咗,唔好問推唔推到喇,唉!我唔知其他車款係咪咁,但單以我呢兩部車黎講就真係差過之前嗰幾套,掛住京商名都係咁?唔係掛?不過路邊社指此京商不同彼京商,即係好似Bandai有分日版國際版之類,所以直頭連模具都不唔同,係真唔係?唔知架,但今次真係差得難以置信,咁解法似乎有啲道理。希望下套做返好啲,同埋,唔好再掛京商牌頭喇。

過大海

自從Zoomer Miniature Models推出澳門格蘭披治賽車車房場景成功彈出之後,出吓出吓仲有和式背景、貨櫃場同埋即將推出嘅1/64人仔系列,但論話題性點都唔夠呢套澳門福隆新街場景,即係明Sell咀香園嗰套呢………

DSCN1212.JPG

對唔少模型或場景生產商而言,起模唔難,最難係得到車廠、品牌授權,唔係隨時收律師信。今次得到品牌支持,還原度自然更高。不過,介紹呢套場景並非因為我鍾意食佢啲蛋卷,而係佢應該係Zoomer至今推出過最複雜嘅場景之一,唔好以為地板加幾棟樓咁簡單,雖然廠方一早已經摺好三棟兩層高舊樓,只要一拉出黎就自動成形,但係每棟樓前面兩條柱、上下窗口嘅簷篷通通都要自己DIY(其實都係摺返起個形,柱身有坑位有雙面膠),有啲似細過摺紙城堡咁,而且原裝已經預咗窗口位,輕輕一推就完成。

曾經係煙花之地嘅福隆新街又窄又長,兩邊都係石躉,只可容納一部車駛過,紙模型基本還原了其招牌紅色門面、木窗設計,印刷水平與以往幾套系列一樣咁高。當然現實中條街窄到無可能擺車影相,今次可以算係彌補現實中嘅缺憾。然而,大窗上的紅色簷篷感覺有點奇怪,拍攝時基本上會擋住屋頂,闊度不足亦影響拍攝角度,但唔影響場景的可塑性,如果有埋澳門警車、人仔就更好。話時話,呢套場景其實有無喺咀香園賣呢?「大家高高興興買手信,包你一定歡喜!」

打鐵還需自身硬

我認係對Tarmac Works偏心,只因佢哋擺心機落去造車,除咗積極開發新模外,水準亦愈來愈高,絕對係值回票價!

IMG_0829.JPG

Tarmac Works於香港玩具節推出的2015國際汽聯GT世界盃澳門站莫他拿戰車Audi R8 LMS,驟眼睇以為同舊模差唔多,但只要將兩部車拍埋一齊睇,「嘩,乜舊款好似泵漲咗嘅?」舊模車身較短且高,新模的頭冚、車尾長度均有增加,高度亦有所下降,比例上更貼近真車。頭燈組亦經過重新設計,尾燈位置也較以往為低,感覺更醒神。引擎艙則沿用透明設計,可以望到引擎及防滾架,誠意十足。

新車與真車一樣有紅白色的拉花,車身上除了賽事名稱、車手名字、賽車編號外,也有澳博及青島啤酒字樣及一系列贊助商圖案,連輪胎上也有Pirelli字樣,效果逼真。當然,上油及車貼仍有改善空間,相信未來新車會有所改善。

這兩年Tarmac Works的成績突飛猛進,除了推出大眾關注的車款外,重視消費者意見、日益提升的車模質素相信也是原因之一。打鐵還需自身硬,要人撐,都要自己爭氣先得!

IMG_0833.JPG