新氣象

不知大家有沒有發現今年中國內地好像崛起了不少新品牌主打1/64人仔、場景以及車模,憑油站成功「彈起」的拓意玩具繼油車後終於推出首批1/64車仔搶客,以自家品牌對抗國內外對手。

DSCN5961.JPG大家有玩場景的話對拓意玩具應該不會感到陌生,因為除了油站外,早前品牌亦推出內地公安、消防員、維修員人仔系列,成功入屋。但識造人唔一定代表識造車,拓意此前只推出過1/76油罐車,轉玩1/64未知反應如何。為此,品牌負責人早前曾攜模具赴港收集零售商意見,幾個月後就是首批「我為中國造」車仔系列。

DSCN5950.JPG首批車款配上城管塗裝,包括五菱宏光、現代Elantra、VW Jetta以及金杯海獅四款內地或合資車廠生產的車款。作為首次生產車仔,拓意可算是相當認真:合金車殼、四輪避震、橡膠輪軚、獨立膠件頭尾燈、警燈等一應俱全,四款的輪圈造型亦不相同,銀底白油更超越不少廠商,紙盒上除了有車款圖像外,更有該車的詳盡介紹,感覺上有點Tiny微影的感覺。不過,這批車仍然有不少地方有待改善,如水貼黏貼欠佳、膠件燈螺絲位亦相當窒眼、側鏡、輪圈精細度及比例亦有可以改良,四車中以VW Jetta以及金杯海獅賣相及造工最為討好,鬼面罩造工細緻,但是若以訂價29.9元人民幣(約34港元)來看,同級對手為Tomica、Siku、 Hotwheels及Majorette等,紙盒包裝的只有拓意及Tomica,後者車款多價格合理,但細緻度卻不及拓意,然而最近車款都是公安、特警、法院、檢察等政府機關,主要是塗裝及燈組不同,幸好民用版車款陸續登場。

據了解拓意正嘗試生產更多不同品牌及車款,相信未來1/64車仔市場會有一番新氣象。

 

Advertisements

2016年(我認為嘅)車壇大事回顧

去到2016年最後一日不如盤點一下今年(我覺得)車壇發生過啲乜嘢大事,大家又係咪咁睇呢?

簡報1.jpg

1. My Tiny疑似走數事件
20161217_181251
作為呢兩年冒起得最快嘅香港品牌,加上7月香港玩具節前一輪facebook攻勢,一口氣展出逾30款新車,包括賣近$3,000的1/18救護車,導致大量買家排幾個鐘隊買/訂車,結果俾人插到開花變成關公災難。不過訂到都唔好開心住,因產能不足以及QC問題,「交車」日期一拖再拖,幾乎每個Post都有「苦主」留言聲討,至剛過去的ToySoul終於主打現貨,加上陸續交貨,負評數先開始回落。不過My Tiny年內不乏佳作,如星群的士除咗有橡膠輪圈外,尾門更可以打開放下斜板將行李送進車櫳,造工精細認真,屬年度佳作。銳武、利蘭勝利二型等亦獲外界好評。2017年到底交唔交得切貨?唔知架,希望在明天吖嘛!

2. $299買本田Civic Type R
DSCN7888
論轟動,相信今年無一部Tomica可以媲美7月推出的本田Civic Type R,因前期貨源稀少,因此同是紅白盒的初回版炒價高見$299,平極都要逾百,甚至出現排隊拎籌買車嘅離奇情況。點解咁好炒?只因行貨遲足水貨一個月,加上本田Civic Type R效應自然任何離奇事都可以發生。原以為年尾部本田NSX都有得炒,結果行貨大貨壓境,結果價錢郁都無郁過,希望2017年代理可以保持供貨量穩定。

3. Rally Car經典收藏誌抵港

20161214201313_00001
繼千歲鷹及打火機後,代理Pansy Hobby Shop大膽引入120期Rally Car經典收藏誌,附雙周刊附送1/43 Rally車模以測試市場反應。首期以$59發售掀起一陣熱潮,不過個別期數車模QC不濟招惹批評,幸好近幾期造工回穩,銷量轉趨穩定。Pansy Hobby Shop原想將Deagostini迪亞哥最新推出的1/43 Formula 1賽車雙周刊引入香港,然而坊間有本地店舖率先開放預訂,中文版第四季才抵港似乎食唔到頭啖湯,睇嚟引入機會唔大。

4. Tarmac Works 首推1/64本田Civic
dscn8825
2016年Tarmac Works與本地薑Daboxtoys(DMC)合作,推出一系列1/64本田Civic EG6車模,除咗純色外,更有Spoon、JTCC、出光等十幾款賽車拉花,一推出就幾乎被掃得一乾二淨。2017年Tarmac Works仲會出埋DC2同DC5,想唔跌錢都難。同時DMC穿針引線促成Greenlight x Advan Crossover GT-R R35,黎緊仲會有一系列如R8 LMS、AMG GT3等排隊登場。

5. Kenbox搶灘銅鑼灣
dscn9284
講開DMC不如講埋今年佢同新宿Tomica車店Kenbox合作開設日本本土以外首間分店,從日本直送中古Tomica到港,價錢由幾十到逾元不等,究竟改唔改變到現時鬥平鬥劈價嘅現象暫時未知,但至少已經吸引到一批收藏家定期上去尋寶。

6. 台灣7-ELEVEN搶閘推2017 GT-R
dscn8717
原來鍾意日產Skyline GT-R嘅朋友唔只香港,台灣都有唔少鐵粉,呢套7-ELEVEN就選擇喺8月台灣預展時隨2017年款GT-R真車同時現身,連同其他GT-R,旋即吸引大量買家飲咖啡換點。可惜除17年GT-R外,其他車模均不值一曬,跟年初法拉利系列無得比。都係嗰句,台灣7-ELEVEN特別香,唉……

7. 台灣黃的一搶而空
DSCN8044
8月份台灣舉行「2016多美小汽車節」活動並推出首部豐田Wish台灣的士別注版Tomica,即時遭搶購一空,香港亦一度出現炒價,幸好代理火速引入行貨,結果大家得以買平車。

8. Majorette熱潮曇花一現?
DSCN7429
記得年中上過Majorette香港總壇「潮聖」,見到最新車款如Porsche 918 Spyder、Mercedes-AMG GT、VW Polo WRC、Jaguar F-Type Coupe、Bentley Continental GT V8S、Citroen C4 Cactus、Alfa Romeo Giulietta同Land Rover Range Rover Evoque都值得入手,廠方指會積極拓展香港市場,然而零售點雖有所增加,但唔夠貨派情況嚴重,每間鋪都係得幾部賣剩蔗,結果買家喺買唔到車嘅情況下惟有轉投其他牌子,希望2017年會有改善,唔係真係恨鐵不成鋼。

9. UCC質素直逼京商
DSCN6036
除咗台灣7-ELEVEN有抽獎車外,日本UCC今年推出套平治系列同樣獲車迷熱捧,只因平治300SL #417 Mille Miglia、190E 2.5-16 Evolution II、CLK DTM AMG、SLS AMG同AMG GT造工相當精緻,加上側鋼及上色,精緻度直逼價錢貴一截嘅京商,不過佢下一套出咩仍然未知,令人期待。

臨尾香

香港玩具節及ToySoul亞洲遊戲展堪稱玩具界的春秋二祭,不過前者針對細路後者就係成人收藏家,各有千秋,但今年似乎……

20161217_181251.jpg

如果有去ToySoul的話,相信都忍唔住「嘩」出黎,因為成個場冷冷清清,係PlayStation因為有機買有VR試玩叫做多人啲,另一邊StarHall人流疏落,同舊年差好遠。一如以往,我主要都係去My Tiny同埋Daboxtoys入貨兼四圍八,八吓下一年有咩新搞作。

20161217_181238.jpg

先講Daboxtoys,今次重點都係事先張揚嘅Tarmac Works 1/64 Audi R8 LMS Nurburgring Test Car限量版,同時展出本田Civic Type R FK2個3D模,到底趕唔趕得切仲係未知數,惟有睇住部排隊出嘅Castrol EG6先,負責人Felix仲話黎緊仲會有AMG GT3、Lancer Evolution同Honda Civic FD2,而且仲會開咗條平價系列,睇黎2017年應該繼續食住個勢。不過計我話橫掂出幾平都係會俾人一踩再踩,不如用返而家口價再提升造工仲好。

至於My Tiny呢,唔好講粗口住,自從7月香港玩具節後幾乎每個post都俾人留言要求「找數」。作為長期苦主之一,其實都對佢哋delay都習慣晒,或者俾人鬧得多,今次基本上大部份都以現貨為主,焦點在於會員版煞神(計落要成舊水一部,加多張會員卡)、Pizza電單車、牛下套裝同埋套香港情Roadshow boxset九巴,雞車(利蘭勝利二型)更加是星中之星,不過大家似乎都未解開點解散買仲會平過Boxset呢個謎團。

聽Steve講雞車於年宵中開售,仲話到時有驚喜,唔緊要,繼續聽住先。新貨唔算太多,包括1/43、1/6X人仔套裝、Hino貨車系列(有拖車,預計第二季出)、八佰伴拉花丹拿珍寶、1/18新模平治救護車同警車、1/18大白鯊紅的、1/18、1/43升降台、機場巴士、1/43唐樓場景同埋街道組合、飛行服務隊美洲豹直升機、黑鷹直升機(diecast,但唔知點解有支火神炮)、海洋公園纜車等,出貨日期仍然未知,但起碼唔會通通收訂已交貨無期。至於幾時先找得完條數,我都已經無諗呢個問題。

另一邊廂係引入Rally Car收藏誌嘅Pansing Hobby Shop,除咗現有系列如Rally Car、日本自衛隊、陀錶、打火機系列外,代理仲帶來林寶1/10遙控油車,睇落似乎唔錯但要買齊咁多期先有得玩似乎窄啲,至於1/24法拉利系列呢,接受到Bburago嘅話就去馬啦。早前引來哄動,坊間進口店率先開訂嘅1/43 Formula 1系列亦有登場,然而代理指中文版至少要9月後才有機會抵港,睇怕會俾人搶食頭啖湯,唔知將來有無機會剩係買本雜誌呢?

寫完ToySoul又係時候寫2016年大事回顧……

不甘平淡

無論係食肆好、Pop-up store又好抑或手機app都好,過咗頭幾個月後自然會歸於平淡,Rally Car經典收藏誌亦唔例外,能夠支撐下去,車款、QC、內容缺一不可,今次附書附送部Lancia Stratos HF,又會唔會有驚喜。DSCN9758.JPG或者咁啱得咁蹺,早排Tomica Premium先出完Lancia Stratos HF,呢頭Pansing Hobby Shop就引入1/43版本,仲未計成功炒起嘅京商及Tomica藍盒版,點解呢部車咁特別?只因它是Lancia專門為Rally設計的專屬賽車,外觀由著竹的Bertone炮製,加上一副來自法拉利Dino的2.4升V6引擎,擊敗大熱的Fiat 131 Abarth,連續3年取得蒙地卡羅拉力賽冠軍,也讓Sandro Munari順利摘下1977年的FIA車手冠軍,除了輝煌戰績外,它扁平的車身造型、車頭四盞射燈以及綠色的Alitalia拉花也讓它別樹一熾。在模型上除了有賽事及編號外,Alitalia意大利航空、Carello、Pirelli等贊助商圖案隨處可見。

不過部份地方有上色有出界問題,天線亦有屈曲情況,美中不足。第六期雜誌介紹在Rally賽事中的女車手以及1971年揚威賽場的Ove Andersson。

如果Tomica Premium車仔索價$70,用不足一倍價錢就買到部1/43車模連雜誌,相當合理。

20161214201313_00002.jpg

業主好頭痕

首先要同大家講聲唔好意思,最近因搬屋所以少咗時間寫稿,希望月底回復正常。不過話時話,唔係因為執嘢都唔知自己都揸住好幾層「樓」……

DSCN9640.JPG

如果大家有follow《手推車》facebook專頁嘅話唔難發現影車場景幾乎全部都係灰色底,呢個幾年前訂落嘅發泡膠灰色車房手工可算係唔錯,內籠又有USB拎電的LED燈條,RMB100唔駛真係唔知去邊度搵,所以而家仍然係影車嘅主力。除咗灰色車房外,當時我仲買咗個兩邊中空嘅車位,炒就炒唔起,但可以影到其他場地做唔到嘅角度,所以相對少用。

DSCN9642.JPG

另一間近排常用的是台灣DXTOYS出品的紙工廠場景,雖然係1/60,但無論係夾1/64、1/76甚至最近1/43 Rally都無大問題,不過黏合時就要啲技巧,對於由細到大美勞都未試過合格嘅我黎講,黏斜咗幅牆已經好小事,綠色仿草更加搞到一撻撻,然而勝在價錢平,整花都唔心痛。

DSCN9600.JPG

介紹完平嘢,當然要講下貴嘢平衡番,My Tiny出品嘅唐樓連馬路系列推出時引起哄動,連對手都要急急腳迎戰,有街燈有屋燈有紅綠燈,仲可以點?不過價錢唔平以及大大盒導致收藏困難,結果我連條樓梯都要拆走收埋,唔夠原汁原味,識玩,應該好似紅磡黃埔新邨間茶餐廳將幾set擺入櫃中,幾可亂真。仲有另外一點,My Tiny場地背景好花,拍攝時要下一番苦工。

另一套貴嘢係TLV推出的Bayside Motors(橫山自動車)二手車場,隨盒附送一套整車零件同人仔一個,而且呢個人仔唔似Greenlight要用底座,單用兩隻腳就企得起。但係因佔地甚廣,加上要再砌背景(藍天),結果擺喺度鋪塵鋪到而家,希望新居有位擺佢入去,但係逐棟逐棟拎permit,睇怕佢最後都係不見天日居多,牛下同1/43車房都仲未到,點算好?

信者恆信

Rally Car經典收藏誌已經出到第五期,基本上已儲落一班捧場客,以及一班反對派,「信者恆信,不信者恆不信」,如果未揸定主意,或者可以睇吓望吓參考吓再決定都未遲。

DSCN9604.JPG繼上期Audi後,今期又重回日本車的懷抱,今期附送的是1990年WRC雅典衛城站(Acropolis Rally)冠軍戰車1/43豐田Celica GT-FOUR,並協助西班牙籍車手Carlos Sainz取得全年度車手總冠軍及豐田取得車隊亞軍,為豐田皇朝揭開序幕。一如其他車模,賽車車身除有巨型車廠、TTE車隊字樣外,更有Repsol、Fujitsu Ten、Pirelli、O.Z.輪圈等贊助商名稱,更特別是後窗及尾玻璃均用上與雅典衛城站同樣的單面玻璃 (模型用上反光貼紙交待)及單側鏡設計,白色車輪像真度較高。然而因為煙草廣告的問題,真車車門前及泵把的煙草商廣告消失得無影無蹤(試車、樣辦車則在頭冚),連如第二期的Lancer的紅白色位置都沒有,反而賽事相片幾乎張張都有,認真奇怪,此外滲線有輕微出界情況,其餘造工中規中矩。值得一提是今期附車附送三角形螺絲批,拆車唔駛再用鉗。

講返本書,第五期介紹豐田Celica GT-FOUR外,還探討是WRC副車手的角色,儘管他們的名氣比不上主車手,然而他們卻同時擔任領航員、維修技師、軍師等不同角色,對賽事舉足輕重:越野車歷史則回顧70年代的3 Season如何發展成車廠賽事及世界賽。

老實講,如果閣下由第一期開始買書的話,都係時候要諗諗如何收藏的問題,代理Pansing Hobby Shop同步引入了專用收藏匣,可以收藏20本雜誌,換句話說即係大約一件先買一個。使用時首先打開雜誌中間兩頁,然後將附匣附送的膠條分別從上、下插入匣盒即可,就係咁簡單。

20161125190614_00004.jpg

此賽不同彼賽

今日澳門場FIA GT World Cup(國際汽聯GT世界盃)選拔賽Audi出師不利,澳門先生Edoardo Mortara一起步就已經炒車墮後,另一台由Nico Muller駕駛的R8 LMS更兩度撞欄退賽,唔知聽日澳門先生可唔可以最後一次以Audi Sport Team WRT車手身份再踏頒獎台?但講多災多難,怎能不提80年代Audi征戰WRC賽事連番失利,7屆賽事中僅得24場分站冠軍,最後兩年更是一場都無贏過,取得最後勝利的,就是這台Sports Quattro E2。

DSCN9568.JPG儘管Audi是第一家採用4WD賽車的車隊,於81年出賽技驚四座,期間Michele Mouton更成為首位嬴得WRC的女車手,更為Audi嬴得82年車隊總冠軍名銜,然而面對福特及標緻卻沒有太大優勢,當其他車廠均踏入4WD時代,標緻205T16以更短、更靈活的車身讓Audi陷入困境,至85年Audi改以馬力達600匹的Sports Quattro E2取得Sanremo站最後一場分站冠軍,此後便無以為繼。

第四期Rally Car經典收藏誌就附送由Walter Rohrl駕駛的Rallye Sanremo冠軍車Sports Quattro E2,也是系列中首台歐洲車廠WRC賽車,車身除了Audi標誌及分站號碼外,亦有不同贊助商如Michelin、Recaro、speedline、Bosch貼紙,車櫳則有防滾架及桶椅等,造工方面,車側跟真車一樣設黑色防撞膠、白軨造工也較早兩期Evolution為好,惟獨尾燈竟然黑膠取代,要略為扣分。

今期雜誌除咗Audi Sports Quattro E2外,仲有介紹Rallye monte-carlo的緣由、發展及受歡迎的原因,同時說明了由60年代開始Rally賽規的進化,一如以往,本書的確更吸引。不過如果大家最近有行7-Eleven的話,原來擺Rally Car經典收藏誌的位置而家擺埋本同樣由Pansing Hobby Shop代理的《古の時計》喺度,一本賣車一本賣陀錶,大小通吃。

唔知Mortara聽日又可唔可以反敗為勝呢?

20161115203602_00004.jpg

巴士也點燈

舊年年中寫咗篇《玩物不喪志 玩遙控巴士玩到做博士》,主角阿培預告今年會出1/24中巴,結果等到英國脫歐、特朗普做埋美國總統,終於都等到5部12米巨鷹登場,仲要玩埋遙控點燈,等耐啲都值。

DSC_8087.jpg

關於阿培嘅憤鬥史可以睇返舊年條稿,但係巨龍同巨鷹咪差一隻門,好似無乜突破喎,「呢部巨鷹係喺巨龍基礎上改良而成,除咗得一隻中門外,車門同車窗都可以打開,而車身塗裝同座椅都換返中巴顏色。」仲有呢?「遙控燈組都係一個突破,前後高燈低燈左右指揮燈都可以遙控開關,尤其1/24車身細,線路唔容易收藏,好考功夫。」單係開發就用咗9個月,其他改動仲包括咗更堅硬的3D打印底盤及膠片車身,不過睇怕今次都唔會再拍撞擊測試,好呢味嘅朋友可能會失望。

今次呢批巨鷹同上次一樣,是限·量·的,5部車仲要抽起一部唔賣,所以市場應該賣少見少。咁即係飛機稿?又唔係,阿培手上有兩個新遙控巴士企劃,其中一個睇完都嘩一聲,到底係乜?到時話你知。

 

文字有價

自從第二期Rally Car經典收藏誌回復正價$139後,市場反應兩極,收藏家批評車模唔夠精緻,但從讀者角度評價相當正面,出色的雜誌內容為盒裝書加咗唔少分數,唔知第三期反應又會如何?

DSCN9490.JPG雜誌創刊號以Subaru Impreza WRC 2003打頭陣,估唔到代理Pansing Hobby Shop隔咗一期後再安排Subaru登場,不過與上次顛峰之作唔同,今次的Impreza WRC2008卻是廠方退出WRC賽事前的最後一擊,只因Citroen、Ford Hatchback賽車憑藉高靈活力壓「笨重」的四門Impreza,結果廠方與Prodrive車隊合作開發新一代戰車,然而因調校問題,賽車經常壞車退賽,曾於03年擊敗Sebastien Loeb的Petter Solberg及Phil Mills始終無緣頒獎台,更甚者廠方因金融海嘯撤出WRC賽事,讓人不勝唏噓。

今次附書附送的1/43 Impreza WRC2008是第13站法國的Tour de Corse 5號戰車,除了大大個廠徽外,車身兩側及頭冚均印有賽事名稱,Denso、Pirelli、Motul、BBS等贊助商圖案則見於輪拱及泵把位置,C柱及尾翼則有Kenwood等字樣,水貼貼得相當精細,煞車碟、五點式安全帶、防滾架及後備輪圈均清晰可見,以這個價位而言造工已對得住定價,硬要將IXO Models與價位高一截的Minichamps或京商比較未免不公平,但QC方面的確可以做得更好。

除車模外,第三期Rally Car經典收藏誌剖析了拉力車隊的人員編制,亦解釋了為何比賽動輒有百餘個工作人員,另外也亦介紹50年代Rally賽事如何從業餘進化成各大車廠逐鹿的舞台。此雜誌的出現,無疑填補本地車書關於Rally部份的空白,除台式中文外,日系的排版及豐富的相片有助讀者進入Rally世界,但值唔值得呢口價呢?都係嗰句,如果當買書送模型的話可以照入,調番轉如果一心買模型收藏的話,不如俾多幾舊水買EBBRO、京商、Sparks之類,咁就皆大歡喜。

陀衰家

上篇北國攻略介紹完去北海道邊度買車,今次不如集中介紹吓戰利品 – DeAGOSTINI珍藏法拉利系列(レ・グランディ・フェラーリ・コレクション),每期書賣成$337(4,490 円),究竟係咩胡蘆賣咩藥?又值唔值得「科水」?

DSCN9365.JPG除咗Rally Car經典收藏誌及法拉利系列外,DeAGOSTINI仲推出過唔同嘅盒裝書,由黑膠碟、盤栽、戰機戰艦到3D打印機、機械人以至睡公主城堡通通都有,但講貴嘅話(每期計)法拉利系列可算係數一數二,除咗創刊號1,990 円($150),第二期已經提價至3,480 円($261),第三期打後則回復正價,以60期計算,總成本達265,890円($19,942),較Rally Car經典收藏誌($16,600/120期)更襟計。

究竟本書貴喺邊?咪就係佢送嗰部1/24法拉利合金模型囉,自8月30日出版以來,每期書分別附送F40、LaFerrari、Enzo Ferrari、F12 Berlinetta、Testarossa及F50模型,而當期書就會介紹該款真車的開發經過、技術、機械設定、外觀設計以至賽車相關資訊,因獲廠方授權,因此雜誌內不少珍貴相片及史料,加上排版甚靚,可讀性甚高。

講咁耐,部模型點先?講真,拆盒後發現係Bburago代工的確有啲愕然,自從佢從Hotwheels手上接過生產權後,除咗1/18較可取外,其他產品均獲外界一致劣評,所以Bburago加持可謂是「死亡之吻」。然而日本公司出名嚴謹,今次又會唔會有例外?外觀而言,車體比例準確、上色自然,而且廠方如實將散熱網、引擎、車櫳細節以至煞車碟呈現,每部車亦有不同的活動組件,如F40及F12 Berlinetta可以開門、LaFerrari則可以打開尾冚露出引擎,其實既開門又打開引擎蓋不是更好嗎?要對得住這個價格,自然唔可以交行貨。反而車轆係敗筆,輪拱同車轆間的虛位部部唔同,有啲太多似SUV,有啲就太少,再者1/24真係好難儲,平時儲開1/18、1/43,突然放幾部1/24就真係蝦人儲,始終同一價位已經可以入到部唔錯嘅1/43,加埋Bburago倒米效應,相信除了首刊號及個別車款賣得唔錯外,其他車反而危危地,任憑賣幾多電視廣告、文教堂宣傳都無乜用,車模本身先係最重要。

眼利嘅讀者可能發現我無購入Enzo Ferrari,只因尾輪刮埋沙板,睇見都唔開胃,你又會唔會俾3舊水買佢呢?但又代唔代表我唔繼續買呢?又唔係,睇啱都會照買,好似F430、458 Italia、FXX K、599 GTO睇落都唔錯。至於會唔會有中文譯本?或者有,但就算有都唔會平,代理都要計數,反而睇吓DeAGOSTINI之後會唔會出1/43、1/64好過,當然,搵邊間廠造都好重要,今次教訓仲唔夠咩。

DSCN9378.JPG

20161024_201832.jpg
DeAGOSTINI珍藏法拉利系列放在書店當眼位置