終於等到

最近不約而同聽到部份地產商及專家指,如果買樓自住的話只要計掂數就應該入市,不過就算負擔到都要值得「科水」先得,好似舊年年尾炒到上$300的Tomica 三菱FUSO Canter JAF拖車車價回落逾4成,結果諗都唔諗即時入貨,你話仲會趺?或者,但你仲搵到劈價貨先講。

DSCN5801.JPG

三菱FUSO Canter拖車唔係第一次推出,但用JAF日本自動車連盟就好似係第一次,加上特別樣式的紙盒,去年年尾甫推出旋即炒起,高峰期曾高見$300大洋,其後長期在$230至$240左右徘徊,唔少人都因高價卻步。然而,拖車近排高調現身並以炒價65至7折左右出售,結果出Post當日已全額獲得認購,風頭一時無兩。可惜貨源短缺,拖車市價並無因此回調,錯過今次減價的朋友或者要再等一會,價總會減的,只係唔知何時而己。

Tomica定時定候就會推出紅白盒或別注版JAF車輛,其招牌的藍白色車身相信大家都唔會陌生,除了藍白車身外,這台FUSO Canter拖車還有車頂警示燈、車頭及車側的JAF字樣、裙腳日本自動車連盟字樣,連同車尾黃色的可活動拖架,觀賞價值及好玩度甚高。

如果將來再趺價嘅話現時豈不是高位接貨?撈底考耐性考眼光,如果市場無貨嘅話價錢跌植有個譜,可惜同樓市唔同,我哋根本無從得知供應量,最後只能問自己一句:到底你願意付出幾多買呢部車,計掂數就扑鎚唔好再諗,同買樓好似?買Tomica唔駛首期嘛。

 

Advertisements

滄海遺珠

一提起「贈品」,正常都係「唔值錢」、「唔等駛」、「唔方好」等形容詞,不過又唔好一竹篙打一船人,只因贈品都好可以有收藏價值,甚至有價有市添,睇到呢度大家都應該估到我又介紹日本車,唔恨得咁多架喇。DSCN5779.JPG

點解贈品叫「贈品」?因為送出去通常一去無回頭,帶回來的生意寥寥可數,特別係今時今日經濟環境轉差,願意「科水」製作贈品做Branding的公司愈來愈少,即使係水源相對充足的汽車品牌都開始cut budget,莫講話係陳列室,就連新車發佈會都慳得就慳(當然有例外,以前賓利就重本打造皮製卡片套)。然而,日本陳列室好似寧舍多嘢送,或者可能係車廠直接銷售,唔似代理左度右度,所以推出的產品、贈品都零舍有心思,如豐田的1/30車模、Q版車仔,本田自然唔執輸,除了正規車模外,更推出了汽車形狀的鎖匙扣供準車主選擇。

跟汽車型的USB一樣,在外型這些鎖匙扣都造得一絲不笱,如小型MPV Freed,儘管車仔細細(應該係1/72至1/76之間),但比例準確,又設有橡膠輪軚,更重要係可以亮燈的頭燈,連改裝都慳返,如果可以著埋尾燈就更好喇,唔,似乎,諗多咗。至於值唔值比京商更高的價錢,鍾意就無法架啦。

 

東瀛咖啡特別香

老實講,罐裝咖啡一直唔係我杯茶,惟獨UCC除外,唔係佢啲咖啡特別好飲,而係隨咖啡附送嘅車仔質素愈來愈高,再唔係贈品咁簡單。

DSCN5792.JPG日本飲品五花八門,就算係咖啡都有十幾款,要脫穎而出自然要各出其謀,UCC耐唔耐就會同車廠crossover出贈品車,唔似京商要死抽爛抽,UCC直接將車仔扣在瓶身(或罐頂),睇中邊部買邊部,熱門車款基本即出即搶,剩低都係雞肋。呢套UCC x 日產的1/72「攻メノ日産名車 ”GT-R・FairladyZ BlackCarCollection”」其實有兩年歷史,一套8款包括Skyline GT-R R32、R33、R34、R35、Fairlady Z-L(S30)、300ZX(CZ32)、Z33同埋Z34 Nismo,全部清一式黑色車身。

手上呢部R34除咗頭尾燈雖然無獨立組件外,金屬車身已經贏咗F-Toys成條街,就算同Tomica比都唔係輸太多,特別佢用上軟軚車轆,較Tomica梅花硬轆優勝得多,別忘記佢只係一部贈品車,算係超額完成。如果佢換番獨立燈組嘅話,要擊敗Tomica絕非難事。舊年UCC再同日產crossover,推出1/64 UCC BLACK無糖×NISSANワークス PREMIUM Collection,質素直逼京商,廠方食髓知味,於今年4月19日推出的「メルセデス・ベンツPREMIUM Collection」,推出平治300SL #417 Mille Miglia、190E 2.5-16 EVOLUTION II、CLK DTM AMG、SLS AMG及AMG GT,用上獨立頭燈之外更首度加入側鏡,像真度更高。可惜香港無代理,睇吓到時邊間鋪會率先入貨賺頭水。

安樂窩

有時買Hotwheels、Matchbox、Greenlight、Siku心中不免掙扎一番,只因膠塑一拆就爛,又或者好似散裝京商得個底座同膠塑,近排濕度幾乎百分百,如何收藏「愛駒」更成為棘手問題,透明膠片盒同亞加力膠盒邊樣好?又有咩注意呢?

如果講容易收藏的話,Tomica幾乎獨佔驁頭,簡單買個實惠膠箱就可以層層疊起,相反Hotwheels、Matchbox、Greenlight及Siku拆開膠塑就無遮無掩等食塵,散裝京商因設底座導致的原裝膠盒上下大小不一,難以用盡空間。幸好坊間及網上都有鋪頭賣車仔膠盒,最常見就係全透明膠盒體積較車仔大小小,價錢由每個幾毫子至個幾不等,視乎物料厚薄而定。早排因為喺網上掃入一批Hotwheels車仔順便入埋盒,常見呎寸為82mm x 40mm x 30mm (長 x 闊 x 高),收納標準車模綽綽有餘,大一個碼的82mm x 43mm x 41mm則可以擺入高身車款,如SUV、貨車之類。因為價錢平,值得買多幾個看門口。呢款膠盒惟一壞處就係唔夠硬淨,受壓容易變形,建議垂直擺放(4隻角比較實淨)。

另一款亞加力膠盒幾乎係為京商而設,高窄下闊(100mm x 50mm x 60mm)設計可將車模連底座直接卡入膠盒之中,京商基座底部又可放入防潮劑,亞加力膠盒底則又設凹槽供層層疊起,收藏又得陳列亦得。不過體積大咗所需空間亦較透明膠片盒多一倍有多,將車仔從盒中取出又要花一番功夫,最重要係價錢貴透明膠片盒10倍,要平定要靚任君選擇。

 

無買錯,但有無買貴先?

「如果自用嘅話,幾時都係入市時機。」我明喎,但摸頂入貨又真係幾難受嘅,好似何文田有豪宅新盤一星期減價8%已有買家呻笨,更何況係劈價36%嘅Oxford Mercedes-Benz Sprinter消防處救護車呢?

DSCN5718.JPG如果有儲開巴士模型的話,相信對Oxford唔會陌生,只因這個英國品牌主力生產1/76車模(1/150亦係重要一環),除消防車及貨車外,Oxford亦是Jaguar、Land Rover、Bentley及MINI等英國品牌的捧場客。Oxford並非首次推出香港車款,早幾年廠方就已經推出過N Gauge的中巴塗裝 Queen Mary巴士,今次推出的平治Sprinter救護車又係一模多投,先有英國救護車,再換上香港消防處救護車拉花,相信日後會有推出更多不同版本印銀紙。

消防處網頁指現行香港救護車主要分平治516CDI、平治518CDI及平治519CDI三款型號,每款型號的車廂均可容納5名乘客加 1名臥床傷病者。儘管型號相同,然而香港救護車尾門一律採用左右打開的尾門,英國版則更進一步加裝摺疊式斜台方便擔架床、輪椅直接上落。Oxford選擇英國版為藍本,儘管車身拉花與真車幾乎一樣,不過因尾門與港版不同,加上車頂警示燈單單貼紙表達,遭扣去不少分數,至於早前有指後輪輪拱應是扁平而非圓拱型,翻查資料,這款救護車於08年抵港時的確採用圓形輪拱,惟後期已經轉換成今日模樣。整體而言,車模已經能夠表達港版救護車的精髓,但無法100%呈現真車細節,略見可惜。

記得早幾個星期這部救護車開售時已引來各方關注,可惜「航空版」約$150令不少人為之卻步,直至大貨(船貨)於個多星期後抵港,訂價隨即回落至$100內水平,減幅逾36%,惹來一眾「頭水」買家怨聲載道。另一方面,消息對準買家而言或是入市訊號。等等,會唔會再劈價先?我都唔知,但Oxford價位一直硬淨,減價後銷情有明顯改善,加上質素不俗,「有買貴,無買錯」,而且香港車款始終都有一班捧場客,想執「跳樓貨」睇怕都有排等。