飛去台灣買黃的?

早兩個星期去台中諗住買Tomica限量版豐田Wish台灣的士,點知黃的買唔到變咗買全家Welly Q版回力車。最終返到香港都要死死地氣「科水」。

DSCN8044.JPG

雖然台灣的士五花八門,但豐田 Wish始終佔大多數,MPV大尾箱設計就算一班人去旅行都唔駛分幾部車,加埋司機殷勤嘅態度,拎盡印象分,而白色頭尾泵把、群腳更成為台灣的士標記。

過往台灣Tomica代理曾經推出過新竹貨車、觀光巴士、高鐵接駁巴士等地區限定車款,不過大多係換張貼紙就算,今次代理為「2016多美小汽車節」活動特別炮製的豐田Wish的士車色除了忠於原著外,車身又有編號及「乘客四人」字樣,車頂燈箱也有「出租汽車」,等人一眼就能分辨出來,就算有右軚、Nets車章、錯體尾燈等問題都係濕濕碎。車模一推出已經大受歡迎,報導更指10分鐘內已經售罄,而且周圍都買唔到。當然,大家一聽就知係代理嘅marketing技倆,此車總有一日會成為恒常版本,正如本港的紅、綠Van一樣,但等幾耐就無人知,始終台灣代理積極程度同香港差得遠。至於萬信會唔會引入黃的入香港賣呢?有機會嘅,不過又係睇下等幾耐啫,而且價錢唔妨平,早買早享受,遲買平多你廿蚊啦。

DSCN8049.JPG

事實上,香港人真係幾鍾意台灣,機票平消費平樓價低美食多人善良,如果一年去幾轉台灣,搭黃的嘅機會隨時較搭香港紅的仲要多,黃的受港人追捧,不無理由,至於台灣人會唔會買香港紅綠藍的呢?呢個問題值得商榷。

Advertisements

當炒Tomica

遲咗成個月先寫Tomica遲唔遲啲?都唔遲嘅,正好可以夾埋8月新車偷跳事件一齊寫,花生味濃。

DSCN7886.JPG記得7月份新車本田Civic Type R初回版曾經炒到$299這個歷史高位,有無人接貨就不得而知,但破百成交的卻不乏其數,原因無非因為行貨遲遲未到港,結果日本水貨價節節上升,更出現要門口派籌賣車的奇特現象,炒風持續差不多整個月,至行貨派街價錢始回落至$30至$50水平,所謂鹹魚青菜各有所愛,但係呢部Type R究竟係咪得個名值錢呢?唔少師兄都批評此車欠缺獨立塑膠燈件、上色過厚、上色不均等情況,頭冚中引擎更是敷衍了事,絕對名過其實,如非缺貨根本唔應該有得炒,Type R效應似乎萬試萬靈,睇下下次NSX出貨會唔會有類似現象就知。

DSCN7857.JPG早兩星期Tomica 8月新車突然出現在各大水貨店的facebook專頁上,出貨日期較日本本土還要早幾日,結果引起軒然大波。要知道原因就必先知悉水貨車的營運模式,有別於我們螞蟻搬家般搜羅紅白盒,水貨商主要經日本當地的拆家拆貨,港、日才能同步發售新車,不過8月13至16日是日本三大節之一的盂蘭盆節,日本拆家因放假而提早拆貨,因此部份貨源率先抵達香港,或許因倉存成本高昂,部份水貨商收貨後即時推售,結果遭受同行投訴,導致日方不得不出手干預,逼使將Post下架直至日本出貨為止,或許豐田86、日產Serena對香港人的吸引力不及Type R,所以炒極都炒唔起。

據知代理早已向廠方要求大量76配額,但來港貨量不似如期,因此出現愈炒愈有的怪現象,唔知下一款熱門車又會唔會大炒特炒呢?「偷跳」事件則代理、店家均有責任,只要供應商足,炒價自然站不住腳,你睇而家嘅76就知啦,早買真係早享受,遲買真係可以平成舊。

呢隻老鼠真肥仔

儘管上海迪士尼樂園開幕在即,然而想起昔日香港迪士尼樂園開幕之初的亂象,還是讓白老鼠行先試先。究竟新老鼠樂園有無專屬Tomica?定係會同國產車仔品牌合作?過幾日就知。反正都係等,不如買東京迪士尼海洋(Tokyo Disney Sea)15周年特別版止住渴先(交住稅先都得)。

DSCN5891.JPG大家可能都知道日本迪士尼係授權經營,所以園內不少設計均與美國加州及佛羅里達州不同,2001年,日本更落成了全球第一座以「海洋」為主題的樂園 – 東京迪士尼海洋,其中又以眾多機動遊戲及Duffy熊最為人熟悉,繼東京迪士尼13年30周年(也是本欄開始的同一年)後,東京迪士尼海洋也踏入15周年,樂園以「美好心願年」為題,除了全新的「閃亮心願之旅」表演外,當然唔少230種「掠水」產品,連帶Tomica都唔執輸推出一系列15周年產品賺番筆,除了見慣見熟的園區巴士、帆船ウィング・オブ・ウィッシュ号及三合一米奇車禮盒裝外,今次更推出一套6卡的迪士尼單軌列車(Disney Resort Line),由4月起每月分別以米奇、高飛及布魯圖、唐老鴨、黛絲、鋼牙奇奇及大鼻帝帝及米妮做車身圖案,要儲齊幾乎要你月月入園買。

DSCN5907.JPG睇真啲幾部Tomica,迪士尼海洋15周年及東京迪士尼30周年基本上係同模,不過主色改為藍孔,連帶米奇同米妮都穿上海洋的專屬服飾,車頂唔少得15周年字樣;ウィング・オブ・ウィッシュ号細細隻,船頭有透明米奇就已經收貨,但求神似不求形似。至於重點單軌列車同樣用上迪士尼海洋拉花,暫時得一卡未睇到啲乜,等齊六部擺出黎應該幾過癮。至於點解我咁鍾意米奇老鼠呢個問題呢?仲問?

 

十隻手指都咁長

俗語有云「十隻手指都咁長」,真係?你睇吓今次Tomica推出嘅超跑抽獎車系列,幾乎款款都咁吸引,十隻手指一樣長,點搞?

DSCN5238.JPG

Tomica過去兩年抽獎車都係以警車做主題,除咗兩部林寶炒得起之外,其他車款大多吃之無味,棄之可惜,但不得不提第18彈嗰部綠色熊貓車,抽到真係火都嚟。今年Tomica以工作車輛做主題推出トミカくじ20 はたらくスポーツカーコレクション,一套十款清一式跑車,包括日產Skyline GT-R警視庁巡邏車、林寶堅尼LP-640Murcielago的士、豐田2000GT駕駛學院車、日產Fairlady Z牧場車、Ford Focus RS500偵探車、大發Copen蒿麥車、蓮花Evora GTE消防指揮車、光岡OROCHI市政府車、蓮花Elite Exige R-GT報紙車及Ford Mustang GT V8開鎖車,現實中究竟有邊個會真係拎部大牛做的士?認真就窮了。唔駃問今次焦點都係落喺部R-35警車同大牛的士上,原以為會好似前作部林寶炒到上$300,結果呢?炒價曇花一現之後訊速回落,同以前無得比。據知行貨只係俾水貨遲幾日到港,結果成套買都係$450左右,較同價但得8部車的第18、19彈抽獎車明顯有折讓,事實再一次證明只要貨源充足,人人都有平車買。不過有段小插曲,就係行版Box set驚見同款車重複出現的情況,結果鋪家接受客戶退貨,鬼咩?好學唔學學京商。

除咗兩部焦點車外,一身奶牛拉花的日產Fairlady Z牧場車都有驚喜,其他車款拉花都有心思,係得部Ford Focus RS500偵探車「流」咗啲,一舊豬頭骨又點會影響到大家嘅買車意欲呢?所以呢套抽獎車銷情相當穩定,長賣長有。

終於等到

最近不約而同聽到部份地產商及專家指,如果買樓自住的話只要計掂數就應該入市,不過就算負擔到都要值得「科水」先得,好似舊年年尾炒到上$300的Tomica 三菱FUSO Canter JAF拖車車價回落逾4成,結果諗都唔諗即時入貨,你話仲會趺?或者,但你仲搵到劈價貨先講。

DSCN5801.JPG

三菱FUSO Canter拖車唔係第一次推出,但用JAF日本自動車連盟就好似係第一次,加上特別樣式的紙盒,去年年尾甫推出旋即炒起,高峰期曾高見$300大洋,其後長期在$230至$240左右徘徊,唔少人都因高價卻步。然而,拖車近排高調現身並以炒價65至7折左右出售,結果出Post當日已全額獲得認購,風頭一時無兩。可惜貨源短缺,拖車市價並無因此回調,錯過今次減價的朋友或者要再等一會,價總會減的,只係唔知何時而己。

Tomica定時定候就會推出紅白盒或別注版JAF車輛,其招牌的藍白色車身相信大家都唔會陌生,除了藍白車身外,這台FUSO Canter拖車還有車頂警示燈、車頭及車側的JAF字樣、裙腳日本自動車連盟字樣,連同車尾黃色的可活動拖架,觀賞價值及好玩度甚高。

如果將來再趺價嘅話現時豈不是高位接貨?撈底考耐性考眼光,如果市場無貨嘅話價錢跌植有個譜,可惜同樓市唔同,我哋根本無從得知供應量,最後只能問自己一句:到底你願意付出幾多買呢部車,計掂數就扑鎚唔好再諗,同買樓好似?買Tomica唔駛首期嘛。

 

GT-R狂熱

又係GT-R?係呀,鬼叫呢兩年間間廠搏晒老命係咁出日產Skyline GT-R車模咩!Tomica、Tomica Premium、Tomytec、京商、Oversteer、RAI’s、Hotwheels、Matchbox、Greenlightt甚至F-toys都有選擇,普通版出完到特別版,然後再出Box Set,手法層出不窮,你今日買咗末呀?

DSCN4357將舊款車模以特別版、會場版及禮盒裝重新推出係Tomica的慣常技倆,延長鑄模的壽命之餘,亦讓玩家以平價購入絕版車款(收藏價值當然不能同日而喻),不過廠方推出GT-R的頻率高得讓人吃不消,特別是R35,推出紅白盒後就以トミカ博、Safety car、杜拜警車等新拉花登場,今次則以Skyline GT-R45周年的名義推出名為「栄光のGT-Rセット」的套裝,4款不同車模包括元祖PGC10、R32、R34及R35,老實講即係將4部紅白盒擺埋一齊就叫自己做Box Set,然後再賣貴幾十蚊又可以吸引車迷乖乖「科水」。

DSCN4351講造工,除了PGC10外,其餘三款車換上跑車軨之餘,車門均能打開,在新模因成本所限變得「百無」時,舊模自然「矜貴」得多,加上PGC10、R32及R34紅白盒已為絕版,此盒裝自然成為入場之選,然而因為產量眾多,升值潛力欠奉,如果不是粉絲的話更是雞肋,加上廠方未來必會翻出再翻出,錯過亦無妨。

早幾日日產終於喺紐約車展公佈換代前的最後一款R35,睇怕嚟緊兩年各大品牌又會鋪天蓋地咁出車模,你仲頂唔頂得順?

做到嘢!

繼玩具反斗城後,AEON終於引入日本Tomica AEON別注版,安排仲方便,抵讚!

DSCN4556.JPG

記得以前想買AEON、玩具反斗城車仔一係托人喺日本幫手買,一係喺香港買水貨,車價隨時較原價貴一倍(國旗車係絕佳例子)。不過舊年玩具反斗城與萬信合作引入Calsonic運輸車並在網站出售,突破水貨商獨大局面。但要推網上平台的又豈只反斗城?過年前AEON在網站首推Tomica Mazda CX-5安全車,呢部車水貨價一直逾百元,AEON網店賣$49.9/部簡直抵到爤,雖然都要信用卡過數,但就無設最低消費及可以到門市取貨(反斗城最討厭就係至逼你至少買幾多倍),結果即日賣出500多部,羿日再賣出逾千部,1,700幾部車兩日就賣晒。AEON食髓知味,再推Tomica 別注版Toyota 2000GT SCCA (Racing ver.),然而賣咗700部一改玩法,變成好似fanfare咁每日凌晨12點上網搶車(每日70部),計我話不如再入好啲貨好過。

講完個市,咁點解要搶別注版?Tomica與玩具反斗城、AEON合作推出的別注版多是紅白盒沒有的拉花,造工往往較普通紅白盒更好。以Mazda CX-5為例,紅白盒除了淨色外,就只有最近推出的警車版,披上全身賽車拉花及設警示燈的AEON版自然更受收藏家歡迎。唔知反斗城、AEON之後,代理幾時先會引入Tomica shop特別版返香港呢?

又Let it go?

電視台最近日播夜播《魔雪奇緣》(Frozen)既廣告,又搞埋啲互動遊戲,慌死人唔知佢地拎到播映權,不過講開又講,呢套卡通片上畫至今兩年,至今影響力仍舊歷久不衰,至少搭搭吓車仲聽到細路唱「Let it go, Let it go」,呢股熱潮唔只香港有,連日本都繼續Hit得起,東京迪士尼樂園1月至3月推出Frozen Fantasy主題限定活動,除了巡遊、表現外,更推出一系列精品如Tomica Frozen巴士,自己唔買都要買俾小朋友啦!

DSCN3905仲以為呢部Frozen巴士以真車為藍本,結果是‧沒‧有的,換言之呢部車係廠方「搵真銀」系列,不過唔緊要,靚就得。呢部單門巴士披上卡通招牌的粉藍色,左右側車身有小白(Olaf)同一眾小雪人在雪花中玩樂,車頂則是彩色雪花圖案,以及被冰皇冠圍繞的愛莎(Elsa)及安娜(Anna)頭像,及Frozen Fantasy 2016和東京迪士尼字樣,係人都知道係限量版!

DSCN3925同情人節Tsum Tsum一樣,買唔買唔係取決於閣下,而係家中一班「主子」,都係嗰句,「Let it go」啦!

甘心中伏

無論你想唔想都好,每年2月14日傳媒、商店、朋友、親戚總會不斷提醒你「情人節」的來臨,今年唔單止facebook,就連Tomica都玩埋一份,等你避無可避。

DSCN4108自從Tomica推出Disney Tsum Tsum聖誕特別版後,再推出情人節特別版已經係意料中事,My Tiny都有推情人節雪糕車,不過意外的是Tomica竟然繼續將Mickey同Minnie車模換色就算。事實上Tsum Tsum系列咁多車款,就算要用Mickey同Minnie,都可以梅花間竹地推出增加新鮮感。今次Tomica不禁讓人有「掠水」之感。

Tomica Disney Tsum Tsum情人節版分Mickey及Minnie兩款,Mickey是基座版(無耳)而Minnie是頂部版(有耳),Minnie能夠「站」在Mickey身上。兩台車均髹上淡淡的啡色、紅色衣服及粉紅色,車尾又有心心圖案及0214的車牌號碼,驟眼看起來如朱古力一樣。

既然咁唔鍾意又點解要乖乖「科水」?你懂的。

祝大家情人節快樂。

猴年乜乜乜

唔少朋友問我喺Yahoo!嘅專欄係咪「被消失」?係,變幻(不是亞視)如是永恆嘛。就嚟過年,不如講吓猴年有乜新搞作…

image

1)寫多啲稿:以前Yahoo!一星期一篇,而家自己blog反而懶咗
2)Facebook改介面:雖然幾乎日日有upload,但係好難入album搵返想睇條稿/車相,要認真搞搞佢。(朋友問點解唔開群組,第一無時間第二同第三都係無時間,無人manage只會雜草叢生)
3)入多啲車:而家主力買京商、Oversteers、Tomytec、CM等1/64車模,Tomica都係買每月新車同Tsumtsum算,好似寡得濟,嚟緊會搵多啲唔同車款介紹吓(重點繼續係京商,其他size無錢同無位擺)
4)多啲互動:不如大家話我知想睇咩,能力範圍內盡做

過年喺深水埗、銅鑼灣同淘寶入咗成千銀貨不幸被太座發現差啲入唔到境,之後要買番慢啲先得。不過有好嘢可以直接喺facebook話我知,等守衛鬆懈嗰陣再帶入境影相post上網。

祝大家猴年快樂,繼續買車!