一地眼鏡碎

台灣7-ELEVEN出過好幾套1/64車仔,好似法拉利、林寶堅尼、MINI Cooper同埋日產GT-R系列均叫好叫座,原以為今次套波子系刊有京商加持質素會更上一層樓,點知……

DSCN1323.JPG

今次7-ELEVEN推出嘅保時捷經典911系列除咗有包括10款1/64波子,包括

  • 550 Spyder (特別版)
  • 911 Turbo 3.3(930)
  • 911 Carrera RS 3.8(964)
  • 911 GT3 RS(997)
  • 911 GT2 RS(997)
  • 911 Carrera GTS(997)
  • 911 Speedster(997)
  • 911 Carrera S(991/1)
  • 911 Turbo(991/1)
  • 911 GT3 RS(991/1)

仲有拖車收藏盒同埋1/24 Porsche 911 GT3 RS(991/1),但焦點當然落喺車仔度,除咗剔除回力車之外,包裝盒上竟然有京商字樣,大家都喺度估究竟會唔會用返以前京商套模,其中京商以往6套波子系列均未出過嘅911 Carrera RS 3.8(964) (964只出過911 RS版本)以及911 GT3 RS(991/1)更備受矚目,就算要大家飲4杯咖啡加$20(台幣79元)換都無怨言。

因為之前入咗成套京商波子,今次我淨係買首次推出嘅911 Carrera RS 3.8(964) 同埋911 GT3 RS(991/1),包裝盒正面印咗911 GT3 RS(991/1)同911 Speedster(997),側面係10部車嘅截圖,背後則係安裝說明及生產資料,點解有安裝說明?只因呢套車同京商拉利系列一樣要自己上螺絲(連螺絲批),或者係拉利系列造得出色嘅關係,期望自然更高。單睇個殼其實都okay,上色無一舊舊,車燈車窗位都可以,係對側鏡好似就甩就甩,當然幾十蚊貨仔都唔會expect佢十完十美,但戲肉嚟喇,咦,點解964條尾軸擺唔落底盤度嘅?原來車軸插得太入車轆結果窄過底盤,拉極都拉唔返出黎,結果夾硬扭上去,唔駛自然一邊高一邊低,推唔郁真係預咗,咁就浪費咗個模。

輪到911 GT3 RS(991/1)又點?點解個轆咁大嘅?一上螺絲就出事,因為輪拱逼實套轆,前邊仲逼到拱起咗,唔好問推唔推到喇,唉!我唔知其他車款係咪咁,但單以我呢兩部車黎講就真係差過之前嗰幾套,掛住京商名都係咁?唔係掛?不過路邊社指此京商不同彼京商,即係好似Bandai有分日版國際版之類,所以直頭連模具都不唔同,係真唔係?唔知架,但今次真係差得難以置信,咁解法似乎有啲道理。希望下套做返好啲,同埋,唔好再掛京商牌頭喇。

Advertisements

戰神遲暮

早幾個月先換完套台灣七仔法拉利,點估七仔話咁快又同日產合作推出GT-R系列,仲要快過Tomica推出細比例(1/60)17年款R35,都咪話唔犀利,不過……

DSCN8717.JPG

話就話9月28日起開始換領,但呢套7仔呢套Skyline GT-R系列早喺月初日產台灣代理裕隆汽車首展17年款R35時已經率先登場,其中最矚目的莫過於與真車同樣披上橙色塗裝的2017年款GT-R (R35),或許是車廠刻意安排,連同17年款單是R35已佔4部,16年款、Nismo版本及杜拜24小時賽車各一,其餘4部車分別是68年SKyline 2000 GT-R、R32、R34及特別限量版、2002年全日本GT錦標賽JGTC 賽車Xanavi Nismo GT-R (R34),街車賽車特別版本包羅萬有。

DSCN8664.JPG

今次七仔又再玩法,與去年MINI Cooper系列一樣,想換購回力車的方法只有搏命飲咖啡,於9月28日至11月15日活動期間,只要購買中杯以上全品項CITY CAFE(含現萃茶)可得1點,集滿4點+79元(約20港元),或是集滿16點,就可以換到一部回力車,以最便宜的Americano(35元新台幣)為例,每部車基本消費就係35+35+35+35+79=219元新台幣,折合港紙約$55,仲未計你個飲到穿晒窿嘅胃,以為咁就可以換到心水車?當然唔係啦,同京商一樣,回力車一律紙盒密封包裝,連抽幾部同款都咪話唔陰功。

DSCN8600.JPG

17年GT-R R35成焦點
憑藉過去MINI Cooper及法拉利系列打響名堂,呢套日產Skyline回力車未推出已經備受海內外收藏家關注,但質素卻與注目度成反比,何解?今次8部車清一式都係回力車,與以往林寶堅尼、MINI Cooper系列7成車模、3成回力車唔同,為預留位置予回力裝置,車廂後方位置索性用黑色組件覆蓋,像真度略打折扣,儘管外型跟足真車,特別係17年款R-35,鬼面罩、頭冚、裙腳幾乎與真車同出一轍,前後塑膠頭尾燈、超巨型輪圈連橡膠輪胎,加上與京商法拉利系列相類似的組裝式設計,的確抵讚。

DSCN8705.JPG

換廠跌Watt
不過,僅此而已,或許是廠方將整成副心機擺落17年款R35,結果其他回力車都面對或多或少的問題,除了1/60蝦人儲外,因成本所限每部車四條輪胎闊度清一式一樣,結果Xanavi Nismo GT-R (R34) 套上前輪時會被輪拱「卡住」;GT-R Nismo GT# 2012 Dubai 24 Hours更出現側埋一邊突起的情況,必須用螺絲「逼死」車殼與底盤;R34則會出現胎邊過份突出的情況;GT-R NISMO、Skyline 2000 GT-R的白油略嫌過厚,跟法拉利幾乎一面倒好評有很大落差,主因或與7仔更換工廠有關,以往GRANI & PARTNERS SPA生產叫好叫座的MINI Cooper及法拉利系列,今次則改以名不經傳的Zhuhai Jetsburg Exploitation & Making of Plastic Co Ltd生產,翻查公司網站,未見廠方有任何生產模型車的經驗,這或可解釋系列「跌watt」的原因,若然無法全套入手,建議先入手最好樣的17年款R35,Xanavi Nismo GT-R (R34)、R34及R32等質素相對較好。

再接再厲
期望愈大,失望愈大。今次七仔日產系列滑鐵爐可算是非戰之罪,鬼叫之前兩套造我太好,結果大家都用京商標準看待這批贈品車才會感到失望,唔知廠方下套會唔會係本田系列呢?同埋經一事長一智,下次用返GRANI & PARTNERS SPA得唔得?等多幾個月咪知囉。

車款一覽

  • 1968 Skyline 2000 GT-R (C10)
  • 1990 Skyline GT-R (R32)
  • 1999 Skyline GT-R (R34)
  • 2002  Xanavi Nismo GT-R (R34) (特別限量版)
  • 2011 GT-R Nismo GT# 2012 Dubai 24 Hours
  • 2015 GT-R NISMO
  • 2016 GT-R (R35)
  • 2017 GT-R (R35)

 

 

 

相隔幾個月七仔又再出手

恨唔到咁多

又係外地的月亮特別圓?都係架,大家都係7-ELEVEN,我咃就得套Le Creuset餐具,但台灣7-ELEVEN出完林寶、MINI Cooper車仔後,最近就出到法拉利系列,質素仲拍得住京商,恨?唔恨得咁多架喇。

1.jpg記得舊年年尾去台中旅行先用抵價買入MINI Cooper抽獎車系列,估唔到半年後7-ELEVEN食髓知味推出7-ELEVEN×法拉利超跑精品系列」,而且一改MINI Cooper逼人飲咖啡伕飲死人的玩法,轉為以往一直用開的購物換點方式:消費滿79元新台幣(約19元),即可獲得1點,每增加35元(約8.5元)消費即可再免費獲得1點,儲滿6點就可以用79元新台幣(約19元)換到一套14款法拉利,平均每部成本333元新台幣(約79.2元)。

DSCN6364.JPG一如MINI Cooper系列,7-ELEVEN繼續委託GRANI & PARTNERS SPA生產此批車模,一套14款車仔更是歷來最多,以單一車模計更甚於大廠京商(每個批次約8款車模,各3種不同顏色)。14款車仔包括250 GTO、275 GTB 、365 GTB4、Dino 246 GT 、F355 Berlinetta、Scuderia Spider 、599XX、F12berlinetta、458 Speciate、FXX K、California T及488 GTB,另加兩部特別版458 Challenge EVO。

DSCN6368.JPG論質素,GRANI & PARTNERS頂多達京商法拉利系列8成,雖然大家同樣係金屬車身,也要自行組裝,但係質素仍然差少少:好幾部車都要用螺絲夾硬「逼實」車殼、底盤及車櫳;橡膠軚QC一般(有一部直頭俾少咗隻);F355 Berlinetta車轆比例太細;458 Challenge EVO尾翼側向一邊等。除此之外各車車身比例準確、上色均勻,設前後獨立燈組零件,而且每部車車轆都唔同,特別推薦FXX K、California T同Scuderia Spider,只因FXX K最罕有,京商炒到離晒譜;California T藍色車身特別之餘,啡色車櫳像真度極高;Scuderia Spider車身、車轆比例正確,整體更勝京商。想知每部車嘅特色可以繼續留意facebook專頁。

DSCN6369.JPG如何入手方面,除咗可以搵朋友當手信帶返黎之外,留意Y拍同淘寶都係唔錯選擇,今次呢套車就由台灣賣家直接用順豐運來香港,今日落單,聽日到,賣家仲寫信說明為了節省買家運費於是將其中兩部車擺埋一齊,感覺貼心,買咁耐車仔都未試過,又係嗰句,唔恨得咁多。

DSCN6355.JPG唔知下次台灣7-ELEVEN又會出咩車呢?