趕科場

「有人辭官歸故里,有人漏夜趕科場」,唔少人都話玩具車呢行難做、競爭大,好彩市場仲有唔少有心人憑著心中一團火經營落去,好似舊年年尾先由深水埗搬去油麻地In’s Point嘅AutoGear Models,為收藏家提供多一個選擇。

20170429_171126.jpg

雖然舊年年尾先開舖,但AutoGear Models原來開咗3年有多,負責人Alex笑言當初開舖都係因為當時嘅女朋友,「我本身好鐘意車、揸車,幾年前揸車喺街見到巴士廣告寫住「化興趣為事業」,加上女朋友(而家已經係太太)因為我買車日哦夜哦,不如把心一橫開舖。」果然係怕老婆會發達,做吓做吓屋企人仲由反對變支持添。AutoGear Models由深水埗起家,主攻1/18及1/43罕有車模,但在生意漸上軌道之際遭業主大幅加租,「賣車仔利潤微薄,無可能支持新租約租金」。在Alex苦惱之際,他與友人逛In’s Point時留意到招租廣告,在友人極力從恿及家人支持下,最終於去年年尾搬到現址。

20170429_171139.jpg

驟眼睇AutoGear Models格仔櫃同櫥櫃幾乎係一半半,除咗1/43、1/64罕見車款、Zoomer場景外,仲有唔少寄賣嘅京商、Hotwheels,就連巴士模型都有,「開舖之後,好多車友同熟客都話有地方買車,無地方放車,面交費時失事又驚遇到驗屍官,所以咪加入格仔櫃方便車友。」與其他車仔舖唔同,AutoGear Models不時有車友專程來搵Alex吹水攞料,反而似交流平台多啲。「我哋想拉近同車友嘅距離,唔係你入哋買完就算,希望可以建立一種聯繫,可能將來放車時你會諗起我咃都未定。」

20170429_171149.jpg

然而,Alex亦慨嘆近年1/64愈來愈貴,車價動輒數百元,與1/43差無幾,故希望自家品牌可以針對中低價市場的空白,「我咃希望喺兩三年內有自己品牌,主攻港人熟悉的車款。」Alex指未來會引入更多罕有車款,以吸引更多人玩車,「最重要希望業主手下留情。」呢句,我都想同業主講。

集郵樂

記得我細細個好鍾意儲郵票,除咗去郵票展之外,仲會晨早流流去郵局門口排隊買小全張。不過大個咗就開始擺低咗呢個興趣,而家都唔知啲郵票擺晒去邊,事隔咁多年我又入手特別版郵票,不過就唔係去郵局買而係去模型舖買,鬼咩,點解?因為佢係本田NSX Type R囉。

DSCN9535.JPG

先旨聲明,我擺明醉翁之意不在酒,為就係為咗京商出部本田NSX Type R 1/64模型車。呢套名為「名車コレクションフレーム切手セット ホンダ NSX タイプ R 編」嘅特別版郵票由日本郵政發行,之前日本郵政出過日產Skyline 2000 GT-R、GT-R(BNR32),今次應該係第一次搵本田做主角,小全張於1月25日起於日本全國 122 間郵政局發售,限量6,000套,定價3,800 円(折合約$265),如果淨係計套郵票小全張當然唔平,打開包裝盒入面係一套10張嘅郵票,包括車身、引擎、軚盤、座椅大特寫,另一邊就有NSX Type R嘅介紹同埋部1/64模型車。

DSCN9525.JPG

不過呢款車模並唔係第一次推出,京商早於2011年推出的第47彈盒蛋中就已經有出過本田NSX Type-R,仲要有紅、黃、白三色車身(其實我更想該系列部CIVIC),不過條軨就唔同咗,舊版係五輻星型軨而郵票車則係7柱款式,所以可以明正言順買多部。造工方面,唔,一般啦,只因京商在處理白油上硬係有啲問題,呢部車雖然無一舊舊情況,但都睇得出層油都幾厚,而且車尾好似趺咗落去,應該係懸掛有啲事,但都係懶得整,有幾可拎出嚟睇吖?

DSCN9518.JPG

唔知日本郵政下次會唔會出CIVIC呢?反正京商咁多模都係得個擺字,拎嚟遁環再用咪幾好,不過大熱題係:套模究竟難咗未先?

DSCN9527.JPG

任重道遠

最近傳媒焦點都落喺美國大選同特首選舉上,車仔界同樣有大新聞,來自新宿的絕版Tomica車店Kenbox正式與本地薑Daboxtoys(DMC)合作,開設日本本土以外首間分店,引入大量絕版Tomica車仔,勢要扭轉現時鬥劈價、泥漿摔角的現象。

DSCN9271.JPG上周六(10月29日) Daboxtoys x Kenbox新店開張,店方請來兩位香港車手李英健及關兆昌擔任特別嘉賓,同場更有Kenbox運來的3,000部絕版Tomica及限量發售”daKenBox”版二次Tomica Mazda Roadster (MX-5) ,一如所料開張當日鋪內擠得水洩不通,《手推車》把握機會與DMC主理人Felix及Kenbox老闆坂詰健一做了簡單訪問,了解今次合作的緣由。

無心插柳柳成蔭
由網店走到今日擔任EBBRO的香港代理,甚至與Tarmac合作開發新車,DMC一直走別人沒有走過的路,主理人Felix指今次與Kenbox的合作可算是破天荒,同時帶點偶然成份,「我年多前第一次去新宿Kenbox時已被它海量收藏吸引,第二次才作自我介紹,直至第三次才傾談並邀請他們來港參與今年3月的活動。」3月份DMC幾乎借出整個鋪面供Kenbox舉行活動,排隊人龍更曾多達100人,Kenbox食髓知味,7月份香港玩具節與DMC再度合作,租用兩個攤位擺放日本直送產品,結果反應遠超預期,也為兩個品牌合作開店奠定基礎。

DSCN9284.JPG
Daboxtoys主理人Felix(左)及Kenbox坂詰健一(右)。

Kenbox老闆坂詰健一認同香港市場大有可為,「 (活動)證明市場對優質產品有強烈需求。」坂詰先生笑言港人對日產Skyline GT-R、本田Civic及MINI Cooper等情有獨鍾,未來將因應本地市場喜好而引入更多珍品。總結兩次經驗,新店將主打高端($1000以上)及低端(如無盒、瑕疵品)產品,中階貨品亦有引入,「好像演唱會最好賣的都是前排及山頂位置一樣。」

希望扭轉市場風氣
「我們希望藉這次合作逐步改善現時鬥平、鬥劈價的風氣。」Felix指在市場惡性競爭下,消費者難以覓得優品、良品,而KENBOX在日本薄有名氣,在日本直接入貨後定期輸往香港,較一般水貨店定期飛往日本入貨不同,(日本合作夥伴)貨源更多、更齊,同時吸引更多賣家主動放車。Kenbox及Daboxtoys將以daKenBox名義合辦活動及生產別注Tomica。坂詰先生希望新店站穩陣腳後再進軍東南亞市場。

除了daKenBox外,DMC將會與Greenlight、Tarmac繼續合作推出別注車模,而Yokohama x Greenlight GT-R更因應亞洲市場需要從3,000部增至5,000部,未來更計劃進一步開拓與車廠的合作,如辦團參觀Greenlight、EBBRO及Tarmac總部等,另尋求與更多品牌crossover,炮製更多與Yokohama、AAPE的特別車款。

後記:
由網店、天后店、南慶坊16樓到1樓新鋪,從代理到建立自己的品牌,Felix一步步實現他的夢想,而非單純賣車炒車賺錢就算,希望未來行內有更多有心人加入一齊做大個餅,人人都可以以合理價位入手心水好車。

繼續愛粉紅

年幾兩年前Tomica推出粉紅色豐田Crown時寫過篇《男人愛粉紅》,但識出姣車嘅又點只Tomica?京商上兩年都出過豐田盒蛋,然而造工馬馬虎虎,今年新廠Enif加入戰團,推出1/64 Crown Athlete,係掛羊頭掛狗肉定真心有驚喜?

DSCN7791無比較自然無進步,當時京商推出豐田盒蛋時已驚為天人,但廠方隨後推出價錢貴一截嘅精緻紙盒版,完成度高得多,不過一山還有一山高,Enif今年推出的1/64豐田14代皇冠,除咗粉紅色外,仲有新增嘅金屬藍及金屬綠色,只要將部車拍埋京商盒蛋,除了上色外,車身泵把、車轆更細緻,相反京商就猶如玩具車一樣,價錢賣到接近兩舊都物有所值。不過,我哋無從得知究竟Enif套模係咪京商流出,畢竟專出警車嘅RAI’s都係咁做。

DSCN7794有睇開本欄嘅讀者都知我對Crown有情意結,無他,因為佢係日本警視廳御用車款,我一向都有鋪警車癮,Crown自然係首選,不過,幾時先有14代Crown警車呢?唔通要DIY?

安樂窩

有時買Hotwheels、Matchbox、Greenlight、Siku心中不免掙扎一番,只因膠塑一拆就爛,又或者好似散裝京商得個底座同膠塑,近排濕度幾乎百分百,如何收藏「愛駒」更成為棘手問題,透明膠片盒同亞加力膠盒邊樣好?又有咩注意呢?

如果講容易收藏的話,Tomica幾乎獨佔驁頭,簡單買個實惠膠箱就可以層層疊起,相反Hotwheels、Matchbox、Greenlight及Siku拆開膠塑就無遮無掩等食塵,散裝京商因設底座導致的原裝膠盒上下大小不一,難以用盡空間。幸好坊間及網上都有鋪頭賣車仔膠盒,最常見就係全透明膠盒體積較車仔大小小,價錢由每個幾毫子至個幾不等,視乎物料厚薄而定。早排因為喺網上掃入一批Hotwheels車仔順便入埋盒,常見呎寸為82mm x 40mm x 30mm (長 x 闊 x 高),收納標準車模綽綽有餘,大一個碼的82mm x 43mm x 41mm則可以擺入高身車款,如SUV、貨車之類。因為價錢平,值得買多幾個看門口。呢款膠盒惟一壞處就係唔夠硬淨,受壓容易變形,建議垂直擺放(4隻角比較實淨)。

另一款亞加力膠盒幾乎係為京商而設,高窄下闊(100mm x 50mm x 60mm)設計可將車模連底座直接卡入膠盒之中,京商基座底部又可放入防潮劑,亞加力膠盒底則又設凹槽供層層疊起,收藏又得陳列亦得。不過體積大咗所需空間亦較透明膠片盒多一倍有多,將車仔從盒中取出又要花一番功夫,最重要係價錢貴透明膠片盒10倍,要平定要靚任君選擇。

 

拓海都賣樣?

印象中幾乎每間日本模型車廠都出過《頭文字D》別注版,就算漫畫一早大結局,動畫同商品仍然可以無限Loop,京商繼上年襯新劇場版《頭文字D》「Legend2-闘走」推出拓海座駕1/64 豐田Sprinter Trueno AE86後,今次又乘「Legend3-夢現」推出Box set及印埋拓海嘜頭嘅別注版FT-86,咁都得?係呀,賺錢嘛。

DSCN4013.JPG睇勻成套原著都唔覺有編號FT-86的新86出現,電視動畫結局僅僅有一幕拓海駕駛Subaru Impreza WRX STi時與橙色86相遇,Legend3-夢現的Trailer的有這一幕,唔通拓海轉揸新86?香港未上所以仲未知,不過京商又點會放棄掘金機會?廠方推出的Box set就將86與高橋涼介的萬事得Savanna RX-7 FC3S、高橋啟介的RX-7 FD3S及中里毅的日產Skyline GT-R R32放在一起,難免招人暇想。

雖然拓海應該無換車,但係電影公司去年就搵咗部86作為新劇場版《頭文字D》的宣傳車,而且參與2015年久万高原ラリー拉力賽的選拔賽。作為宣傳車,當然有咁搶眼得咁搶眼,除咗車身黑白拉花及藤原豆腐店字樣外,頭冚仲有拓海個嘜頭,慌死人地唔認得,惟一認到佢係賽車的關鍵就只有「24」賽車編號。嚴格嚟講京商並未如實反映賽車的種種細節,因車身欠缺了Yokohama、Emkel、Moty’s、Bride、WinmaX等贊助商貼紙,及參賽選手「藤原拓海」的玻璃貼,此外造工尚算不俗,白色未有出現「一舊舊」的滲線問題,頭冚似乎用了磨沙貼貼上拓海貼紙,唔需要太擔心會脫落或浮起。MIT_4087-thumb-700xauto-32283不過呢部車最大問題都係定價,2,160円(約$148)定價絕非便宜,返到香港更加唔妨賣得平,聽唔少鋪家講港人對《頭文字D》都有莫名奇秒的狂熱,我就唔覺喇,大家又點睇?

京商官網

平有平玩

攞命陳成日呼籲,買樓最緊要量力而為,計我話買(模型)車同買樓一樣,貴有貴買,平有平買,唔鍾意咪唔好買,百貨應百客嘛!

DSCN3889.JPG淨係睇段Lead唔明我講乜好正常,但睇埋張相你就會知我係講緊早輪抵港嘅F Toys 1/64 Super GT賽車系列(GT-R列伝2),係,即係做膠車同扭蛋間廠。系列有8部車,但一半係14款,一半係15款,但驟眼睇除咗S Road部車變咗拉花之外,其他好似Calsonic、Motul、D’station 14同15個款都差唔多,因為市場選擇唔多,定價800円(約$54.5)基本上無得輸,就算返到香港都係多30蚊到,燈油火蠟都喺度。

DSCN3882.JPG但係質素又點?遠睇的確誇啦啦,除了Calsonic隊花外,車身有齊贊助商貼紙,連輪胎都有Bridgestone、Potenza字樣,包圍、比例尚算準備。不過一拉近睇,除咗車身好「膠」之外,車身隻藍色似乎厚咗少少,幾塊膠片好似俾膠水「喇」到矇矇地,最大件事係隻側鏡甩咗(F Toys通病)、尾翼又係斜嘅,QC認真麻麻。

DSCN3887.JPG不過唔拍埋其實都接受到,一拍埋就出事。如果將F toys同賣貴佢兩倍幾嘅1/64 Kyosho Nismo Motul Autech GT-R (#1 Super GT 2015 launch version)比又拍馬都唔係嗰皮,因為車身用鐵造明顯墜手好多,同時上色均勻、拉花更見精細,高下立見。當然,價錢都反映咗分別。

DSCN3881.JPG咁係咪F Toys又好似大家講到咁一文不值呢?又唔係,有錢當然買京商,但如果平平地玩嘅話,F Toys都係入手之選,貴買貴玩,平買平玩,最緊要大家都有得玩。

 

既生瑜何生亮

繼之前Tomytec 日產Skyline GT-R絕殺延期多時的Oversteer版本後,同門殺戮再次上映,京商麥拿崙P1與CM(Colour Model)版本正面對陣,結果係點?睇落去就知。DSCN4994.JPG京商2月推出的麥拿崙系列一改玩法,原本以為玩抽獎會變得更難儲齊款,結果當然不似原期,早買真係會貴幾舊,唔少人因此損手。不過,論質素呢套麥拿崙卻是近年京商罕有佳作(法拉利除外),以P1為例,金屬橙車漆均勻髹上車模外,頭尾燈組、尾泵把、車頂部件線條亦造得一絲不苟,輪圈比例適中及能夠郁動值得加分(林寶系列簡直慘不忍睹),加上平易近人的定價,值得買返部看門口。DSCN5000.JPG咪住,同期CM都出咗部Baby Blue麥拿崙P1,應該點揀先?計牌子點計都係大廠京商秤先,CM呢部牌子真係少聽啲,可能係OEM廠都未定;不過最重要都係質素係點,如果將兩部車平排擺就會發現CM較京商大一個碼,導致車身唔夠貼地,車頂及車尾造工亦不算特別細緻(不過高尾泵把設計CM更似真車),車漆亦見略厚。咁CM即係輸足幾條街?非也,如果講輪圈CM明顯拋離京商,碳灰色輪圈不但有麥拿崙徽章,更能夠清晰睇到橙紅色卡鉗,價錢亦較京商有一定折讓,所以認真難揀。當然,一次過買晒兩部咪得囉,唔係既話睇怕都有排諗。

眾裡尋他千百度

不過係一部豐田Altezza,駛唔駛講到咁誇張呀?無誇張,只因我喺東京、大阪均遍尋不獲,最終竟然喺香港搵到,仲唔係眾裡尋他?

DSCN4949.JPG好多人都知凌志IS200同豐田Altezza係同門兄弟(Altezza馬力比行版IS200為大),憑藉房跑外貌、FR設計至今仍成為唔少P牌仔嘅入手首選,即使推出近廿年仍然有唔少喺街度行緊,易手價一直硬淨。記得多年前拎P牌後就心思思想入部IS200操車,但係車價貴放盤少,結果就此作罷,到今時今日負擔到,但車齡高,正版少又成為「上車」障礙,呢款車成為筆者小小的遺憾。既然真車買唔到,諗住入番部模型都好吖,點知模型一啲都唔多,1/43都係屈指可數,何況1/64呢?幸而京商多年推出過的豐田盒蛋有Altezza,所以每次去日本都會去二手店一碰運氣,秋葉原、梅田、日本橋等等都搵唔到,如是者幾年過去幾乎死心,點知近排香港有鋪頭竟然返貨,二話不說就已經Hold貨攞車,雖然唔係最原汁原味的銀色,但藍色已經收貨。

DSCN4940

因為屬京商早期出品,質素同近年法拉利、麥拿崙以至新一套豐田系列無得比,車頭同真車差少少(頭燈造型唔夠銳利、鬼面罩亦無咁圓)。不過抹去車身塵埃後,車模保養企理,四個車輪又可以推動,如果有埋TRD包圍的話就更形神俱備,然而呢部已經收貨。有時候,買車不單是購買模型本身,更是買回當年的回憶。回憶何價?你話呢?