香港玩具節搶先睇

仲有唔夠一個禮拜就到「第三屆香港玩具節」,今年展覽移師到會展舉行,唔駛再喺九展門口排隊曬餐死,不過好多朋友經過舊年之後個心都十五十六今年去唔去好,《手推車》今期就介紹吓究竟玩具節有咩車仔賣,等大家掃貨前做足準備。(內容會持續更新)(部份圖片為網上截圖)

16487263_1826966744223355_2302073289795997115_o

或者為遷就會展檔期,今年香港玩具節提早至5月底舉行,展覽廳5F及5G相信較九展Star Hall一倍以上,換言之唔駛好似舊年逼餐死行都行唔到,而且今年連Hotwheels都入場一齊玩,即係同一個場你可以買到Tomica、Hotwheels、Tarmac、My Tiny同埋Greenlights等幾個大牌子,俾$30買飛入場應該無乜伏。

map

日期:2017年5月20至22日(星期六至一)
時間:10:00 – 21:00 (5月22日至19:00)
地點:灣仔香港會展覽中心展覽廳5F及5G
門票:即場發售HK$30
重點攤檔:Tomica (A01)、DMC(F08)、Tarmac (F09)、Hotwheels(R01)、My Tiny(V01)

18193307_1865348877051808_7545436898332042461_o


Tarmac Works/ DMC (攤位F08、F09)

重點:1/64 Honda Civic Type R FK2、Mitsubishi Lancer Evo X、Audi R8 LMS(新模)

過去一年Tarmac可算係大爆發嘅一年,首推1/64 Civic系列叫好叫座,今年廠方再接再厲,第一季已經公佈咗多款矚目新車,當中Honda Civic Type R FK2、Mitsubishi Lancer Evo X同埋換上新模嘅Audi R8 LMS將會即場發售,不過唔知夠唔夠貨派。同時Tarmac繼續與DMC合作推出香港玩具節限定車,Audi R8 LMS 2015 Macau – Mortara版本相信可如期登場,至於Type R Modulo Version以及Evo X Final Concept仲趕緊工,希望可以趕得切會期中開售。除咗現貨外,Tarmac x DMC仲會首展在底板配上Bathing Ape布料的新版Bathing Ape Ferrari 458 GT3並即場接受預訂,最後係幾款仍未公佈新車及新Line Global64嘅樣辦車款。Tarmac x DMC預計於20(六)及21日(日)早上11時有產品發佈會,屆時應該有更多新車公佈,值得留意。


Hotwheels (MATTEL攤位R01)

重點:Hotwheels K Case

18342449_2103816586511813_3767476939944489467_n (1).png

MATTEL今年首次參展即派強陣出擊,繼上次玩具反斗城活動反應理想,今次 MATTEL再下一城推出名為【爆箱!Hot Wheels全港首推~快閃優先購車活動】,只要擺低$500就可以喺15分鐘內即場拆箱擸走30部Hotwheels車仔,計落每部都係$16.7,官方指每場35個未開封箱入面會有一定數量嘅箱(K-case),究竟可唔可以喺15分鐘入面同其餘19個競爭對手搶到Tesla Model X、Ford GT40等大熱款就要睇閣下嘅運氣喇,MATTEL仲話參加者仲有神秘禮物,「隨時有機會得到全球限量或者絕版車款」,唔駛問,我都唔知。如果俾多$150仲有購買限量30件嘅Hot Wheels 香港版T- Shirt 1件,不過今次快閃活動每日只係得兩場,每場名額20個,手快有手慢無!反正都係搶車,梗係自己拆盒開心啲!


My Tiny (攤位V01)

重點:Tiny City 豐田Comfort市區的士(星群的士)、丹拿A型皇家香港警察訓練巴士、Dennis 消防泵車、大嶼山巴士勝利二型、埋豐田Hiace

18278785_1840969739454039_8968908401384887360_o

同往年一樣,My Tiny喺開show前陸續將新車圖片擺上官方fcebook fanspage,不過汲取去年排隊訂貨打蛇餅嘅經驗,今年My Tiny攤位現貨包括17款新車、3款新展會限定、4款VIP會員限定及1款新Boxset,因車款眾多,值得重點留意嘅Tiny City系列車款包括豐田Comfort市區的士(星群的士)丹拿A型皇家香港警察訓練巴士Dennis 消防泵車、大嶼山巴士勝利二型同埋豐田Hiace等,至於VIP車款除咗獨有工程車外,其他款式大多更換獨有拉花,又多個藉口買多一部。至於舊年12月ToySoul公佈嘅1/43、1/64人仔系列亦會同時出貨,連同其他現役車款,陣容鼎盛。至於新模暫時官方公佈嘅資料唔多,預計會展出嘅包括、精英號滅火輪BMW R1200R消防電單車轉角唐樓及開發中嘅Tiny Q系列,至於拖車會唔會趕得切喺呢幾日登場呢?繼續留意官方fanspage啦!


TOMICA(攤位A01)

重點:TOMICA香港的士(2017全新包裝版)、5月份新車

18121497_1420622381341917_7872513499732721014_o (1)

香港玩具節話晒都係Tomica半個主場,唔少車迷都期待佢哋今年會帶乜嘢特別版或者會場版作為重頭戲,唔少人更猜測代理會引入Tomica博新車現場發售,點知官方facebook只係公佈加入車迷會可以獲得2017年新包裝嘅TOMICA香港的士1部,好在有5月份TOMICA新車同步發售,希望過多幾日有好消息!不過,若果係同小朋友去嘅話TOMICA攤位仍然有大型TOMICA、PLARAIL及ANIA情景模型:今次TOMICA及PLARAIL情景模型設計將首次模擬東京JR山手線,面積達到9米x 3米,ANIA情景模型面積亦達到3米x 3米,有多款ANIA現實及史前動物,小朋友一定睇得好開心。

18121562_1420622384675250_5307979832424320944_o (1)

Advertisements

雞,全部都係雞

仲有幾日就過年梗係入鄉隨俗介紹吓啲應節嘢,唔知係咪索到陣徐,My Tiny過年節趕得切推出雞車款鐵罐龍鬚糖,有嘢食有嘢玩有嘢儲,出奇過出奇蛋。

DSCN0460.JPG

舊年年尾Toysoul My Tiny限量賣包括1/110利蘭勝利二型(雞車)在內的限量九巴Boxset,並預告年宵有售散裝雞車,仲故弄懸虛咁問大家點解雞車個紙盒咁細個,謎底查實係為咗同埋兩包龍鬚糖一齊塞入個鐵罐度,至於點解有今次嘅Crossover?我都唔明,部車吸引就得啦,係咪?

DSCN0463.JPG

今次先講個罐先,其實個罐比想像中細好多,但造工一啲都唔馬夫:車頂、車身突出骨線、車窗、電門、水撥亦用上凹凸設計,加上四條外露的「車轆」,手感十足,就算罐身無Logo,但單睇車身塗裝就可一眼認得出係邊間巴士公司,睇落好似部Cute版巴士咁。

醉翁之意不在罐,在乎罐中的雞車也。俾舊幾水又點只得個罐,隨罐附送嘅105號線利蘭勝利二型繼續採用易入塵嘅開窗設計,同時路線號碼下的線條、泵把設計與中巴款式有異,其餘部份大致忠於真車,造工應該係同級最好,不過唔駛講同1/76無得鬥然而以幾十蚊(套裝為$130、扣完兩包糖一個罐,至少都要幾廿蚊,就算部車有少少側埋一篇都可以接受。

雖然My Tiny打鑼打鼓話維園同荃灣年宵發售,但早兩日喺朗豪坊同葵涌廣場已經有售,唔駛打路買嘢逼餐死,難怪消息一出大家都搶住入貨。反而門市出貨較訂貨更早的問題卻引起激烈迴響,睇到有現貨但訂貨仲未出,似乎講唔過去,結果又係洗板式留言,何必呢?

兩包御軒嘅白芝麻黑芝麻龍鬚仲未食所以未評論,食完再擺facebook,但斷估你都唔會認為會好好食掛。下次又應該叫My Tiny搵邊部車搞crossover好呢?

我係Pizza仔

雖然唔係幾好聽,但叫Pizza仔始終比電單車薄餅速遞員嚟得啜核,我以前都係著住套風褸長褲Cap帽趕頭趕命送Pizza,見到My Tiny部Pizza車,認真百般滋味在心頭。

DSCN0124.JPG

好多人或者會以為做速遞員就係揸住部電單車周圍去好似好爽,查實仲有好多廚房嘢要做,雖然唔知今時今日仲係咪咁,但當時我地出車前都會幫手搓吓麵粉等發酵、切肉粒、煲吓湯同埋摺外賣紙盒等等準備一日嘅工作,然後再到車場check車正式開工。一般黎講晏晝其實唔多客,但一做就好大單,除咗出車之外,如果太近嘅話我地通常都做埋「步兵」,一口氣拎完幾個保溫袋其實都幾係野。

從傍晚開始就進入我地工作嘅高峰期,鋪頭通常有同事會幫我地pack好一個個保溫袋,擺入尾箱插咗個電熱插就扭油開車,一車都至少2、3單,一夜都要走差唔多十轉八轉,如果同事唔生性執漏單嘅話行多幾轉都試過。終於係時候介紹呢部偉士PX200,佢同大部份電單車唔同嘅地方係佢係行手波,一開頭需要時間適應,也因為汽油未經完全燃燒,廢氣特別多,不過佢勝在爆發力強,俾多油成部車就衝出去,燈位起步尤其明顯,初初俾錯油更試過起頭,同一時間PX200亦好易因轉數唔夠中途死火,上長命斜認真攞命。

講返份工,危險性一定有,返風落雨最麻煩,第一係要著住套焗到成身汗嘅雨褸雨褲揸車已經好唔舒服,橫風橫雨送郊外更加有難度,一係大雨大霧完全睇唔到條路,一係就係大風吹到你過對面線,周不時仲有野狗追車尾,試過部車喺村屋群同村屋群之間條小徑度跪低咗,用腳撻撻咗半個鐘先著車急急腳返鋪。最危險嘅反而唔係郊外而係市區,有前輩就俾的士撞到拋出車外,住ICU都住咗好幾個月,托賴我無乜經歷大意外,惟一一次係落雨喺迴旋處派牌(冼低咗),好彩後面部巴士煞得切部車,唔係我都無機會喺度寫文同大家介紹車仔。雖然工作一啲都唔輕鬆,但勝在店舖上下夠團結,所以大家都Work得好close,堅似係一個大家庭。所以話呢,呢部My Tiny Pizza電單車又豈有不買之理?

DSCN0111.JPG

如果你一心諗住睇Pizza secret嘅話可能會失望。最後想講句,Pizza仔又好,電單車薄餅速遞員都好,雖然係人工包埋,但同事們身水身汗將食物熱辣辣送上府上,就算唔俾貼士都語氣都可以客氣少少嘅。

黑天鵝

好多人都話英國脫歐(Brexit)係黑天鵝(Black Swan),然而宣佈公投開始留歐脫歐陣營戰況咬得很緊,如非選前的不幸事故,脫歐幾乎是毫無懸念。睇到呢度,你可能會問,「關我鬼事」,你啱,寫咁大段字無非為咗最近模型界的「黑天鵝」 – My Tiny KMB Enviro 400系列。DSCN6793.JPG車,個模出咗九世,駛乜你利思芸喺度指手劃腳?你又啱,身為一個一開波已經「科水」買晒成套MY車仔,然後覺得俾人搵笨嘅消費者來說,我對MY的態度和疑歐派一模一樣「得唔得架?」「個轆點解可以咁樣衰?」「求其出多隻色又想搵人笨?」「又要遲(出貨)幾耐呀?」今時今日,呢啲睇法一直無變,又咁講,除咗第一套車仔之外,之後幾乎一部MY車仔都無買過,雪糕電單車都唔例外。不過,今次見到呢部E400,「嘩!正喎!」

原來呢批E400終於更換MY一直被人詬病的「硬膠」轆,換咗橡膠軚之後,輪殼可以做得更細緻,像真度更高,加埋復古拉花,就算唔係巴迷都會受落。點解叫佢「黑天鵝」?無他,如果大家有埋之前幾款E400嘅話,可能會發現到藝術花、超人拉花巴士除咗用「硬膠」轆之餘,座椅仲係直一直怪怪地,去到金色九巴拉花座椅已經變得圓圓地,而家仲要用橡膠軚,呢個價位、呢個比例,仲點會有得輸?勢估唔到My Tiny造完一個模之後竟然仲肯一下一下咁提起品質,其他大廠認真睬你有味,今次認真可以用有買貴,無買錯形容呢批E400。

一直都講只要MY肯換轆,大家應該連惟一唔買嘅理由都無埋。據知嚟緊佢批Benz Sprinter警車、救護車、天文台車仔都係行橡膠軚,又係嗰句,你落咗訂未先?作為香港人當然希望香港品牌愈來愈好啦。不過,都係嗰句,唔好太貪心,做好一樣先到另一樣,唔係死一款車(好似初代紅綠Van)就足夠令到好多人觀望一排先再入場。今次,係得嘅。