香港玩具節搶先睇

仲有唔夠一個禮拜就到「第三屆香港玩具節」,今年展覽移師到會展舉行,唔駛再喺九展門口排隊曬餐死,不過好多朋友經過舊年之後個心都十五十六今年去唔去好,《手推車》今期就介紹吓究竟玩具節有咩車仔賣,等大家掃貨前做足準備。(內容會持續更新)(部份圖片為網上截圖)

16487263_1826966744223355_2302073289795997115_o

或者為遷就會展檔期,今年香港玩具節提早至5月底舉行,展覽廳5F及5G相信較九展Star Hall一倍以上,換言之唔駛好似舊年逼餐死行都行唔到,而且今年連Hotwheels都入場一齊玩,即係同一個場你可以買到Tomica、Hotwheels、Tarmac、My Tiny同埋Greenlights等幾個大牌子,俾$30買飛入場應該無乜伏。

map

日期:2017年5月20至22日(星期六至一)
時間:10:00 – 21:00 (5月22日至19:00)
地點:灣仔香港會展覽中心展覽廳5F及5G
門票:即場發售HK$30
重點攤檔:Tomica (A01)、DMC(F08)、Tarmac (F09)、Hotwheels(R01)、My Tiny(V01)

18193307_1865348877051808_7545436898332042461_o


Tarmac Works/ DMC (攤位F08、F09)

重點:1/64 Honda Civic Type R FK2、Mitsubishi Lancer Evo X、Audi R8 LMS(新模)

過去一年Tarmac可算係大爆發嘅一年,首推1/64 Civic系列叫好叫座,今年廠方再接再厲,第一季已經公佈咗多款矚目新車,當中Honda Civic Type R FK2、Mitsubishi Lancer Evo X同埋換上新模嘅Audi R8 LMS將會即場發售,不過唔知夠唔夠貨派。同時Tarmac繼續與DMC合作推出香港玩具節限定車,Audi R8 LMS 2015 Macau – Mortara版本相信可如期登場,至於Type R Modulo Version以及Evo X Final Concept仲趕緊工,希望可以趕得切會期中開售。除咗現貨外,Tarmac x DMC仲會首展在底板配上Bathing Ape布料的新版Bathing Ape Ferrari 458 GT3並即場接受預訂,最後係幾款仍未公佈新車及新Line Global64嘅樣辦車款。Tarmac x DMC預計於20(六)及21日(日)早上11時有產品發佈會,屆時應該有更多新車公佈,值得留意。


Hotwheels (MATTEL攤位R01)

重點:Hotwheels K Case

18342449_2103816586511813_3767476939944489467_n (1).png

MATTEL今年首次參展即派強陣出擊,繼上次玩具反斗城活動反應理想,今次 MATTEL再下一城推出名為【爆箱!Hot Wheels全港首推~快閃優先購車活動】,只要擺低$500就可以喺15分鐘內即場拆箱擸走30部Hotwheels車仔,計落每部都係$16.7,官方指每場35個未開封箱入面會有一定數量嘅箱(K-case),究竟可唔可以喺15分鐘入面同其餘19個競爭對手搶到Tesla Model X、Ford GT40等大熱款就要睇閣下嘅運氣喇,MATTEL仲話參加者仲有神秘禮物,「隨時有機會得到全球限量或者絕版車款」,唔駛問,我都唔知。如果俾多$150仲有購買限量30件嘅Hot Wheels 香港版T- Shirt 1件,不過今次快閃活動每日只係得兩場,每場名額20個,手快有手慢無!反正都係搶車,梗係自己拆盒開心啲!


My Tiny (攤位V01)

重點:Tiny City 豐田Comfort市區的士(星群的士)、丹拿A型皇家香港警察訓練巴士、Dennis 消防泵車、大嶼山巴士勝利二型、埋豐田Hiace

18278785_1840969739454039_8968908401384887360_o

同往年一樣,My Tiny喺開show前陸續將新車圖片擺上官方fcebook fanspage,不過汲取去年排隊訂貨打蛇餅嘅經驗,今年My Tiny攤位現貨包括17款新車、3款新展會限定、4款VIP會員限定及1款新Boxset,因車款眾多,值得重點留意嘅Tiny City系列車款包括豐田Comfort市區的士(星群的士)丹拿A型皇家香港警察訓練巴士Dennis 消防泵車、大嶼山巴士勝利二型同埋豐田Hiace等,至於VIP車款除咗獨有工程車外,其他款式大多更換獨有拉花,又多個藉口買多一部。至於舊年12月ToySoul公佈嘅1/43、1/64人仔系列亦會同時出貨,連同其他現役車款,陣容鼎盛。至於新模暫時官方公佈嘅資料唔多,預計會展出嘅包括、精英號滅火輪BMW R1200R消防電單車轉角唐樓及開發中嘅Tiny Q系列,至於拖車會唔會趕得切喺呢幾日登場呢?繼續留意官方fanspage啦!


TOMICA(攤位A01)

重點:TOMICA香港的士(2017全新包裝版)、5月份新車

18121497_1420622381341917_7872513499732721014_o (1)

香港玩具節話晒都係Tomica半個主場,唔少車迷都期待佢哋今年會帶乜嘢特別版或者會場版作為重頭戲,唔少人更猜測代理會引入Tomica博新車現場發售,點知官方facebook只係公佈加入車迷會可以獲得2017年新包裝嘅TOMICA香港的士1部,好在有5月份TOMICA新車同步發售,希望過多幾日有好消息!不過,若果係同小朋友去嘅話TOMICA攤位仍然有大型TOMICA、PLARAIL及ANIA情景模型:今次TOMICA及PLARAIL情景模型設計將首次模擬東京JR山手線,面積達到9米x 3米,ANIA情景模型面積亦達到3米x 3米,有多款ANIA現實及史前動物,小朋友一定睇得好開心。

18121562_1420622384675250_5307979832424320944_o (1)

工廈新勢力

觀塘工廈林立,除咗Outlet、樓上餐廳之外仲吸引咗唔少特色鋪頭進駐,賣巴士模型都有幾間,但打正旗號賣Tomica嘅,應該要數舊年年尾開業嘅Tomica Omocha,目標成為收藏家嘅聚腳地,「點只賣車咁簡單!」

20170201_140725.jpg
Tomica Omocha目標成為品牌、收藏家互相交流的平台

與私房菜、廣告公司同層的Tomica Omocha鐵閘有大大度隻紅色Logo,入到鋪內感覺開揚、光猛,而且唔似一般玩具店將貨品擺放得密密麻麻,大約800呎的鋪面主要分為兩邊牆身的陳列櫃、店中央的長檯以及水吧三個部份,方便顧客一邊飲嘢一邊睇車。陳列櫃亦不完全是中古Tomica、京商及My Tiny車仔,櫃內仲有Figure、LEGO甚至是日本迪士尼產品(如杯、袋及公仔等),「我哋唔想獨沽一味賣車仔,反而想成為樣樣玩具都有、類似百貨公司的綜合玩具店。」負責人阿業指除了現有的幾個品牌及產品外,未來會引入特別款式玩具、古董玩具等,更會為客人搜羅陳年玩具,冀吸引更多向隅客慕名而來,「駱駝漆大廈好似一座商場,有餐廳有Outlet,惟獨欠缺了一家玩具店,(我們)希望能填補這一片空白。」

20170201_141033.jpg
Tomica絕版車當然唔少得

做收藏者家唔難,但要從收藏家者成為老闆卻係另一回事,「因為拍檔幫囝囝儲Tomica車仔,久而久之產生咗開鋪嘅想法,我又好鍾意儲車仔,所以一拍即合。」阿業笑言小朋友儲車仔總比沉迷於電子產品好,而且更希望藉Tomica Omocha修補業內的關係,「儲車仔係值得鼓勵嘅嗜好,(業內)應該一齊做大個餅,好似日本唔同鋪頭之間都會守望相助,我哋希望能夠成為一個平台,吸引唔同嘅品牌、收藏家一同參與。」因此,裝修時店中央特設長檯、水吧甚至梳化,提供寬廣的空間作舉辦不同類型的活動如收藏家聚會、分享會之用,「希望(Tomica Omocha)為市場帶來一些改變。」希望改變的,又點止阿業一個?

20170201_140542.jpg
除咗Tomica外,仲有LEGO、Disney、Figure等不同產品,吸引不同顧客

任重道遠

最近傳媒焦點都落喺美國大選同特首選舉上,車仔界同樣有大新聞,來自新宿的絕版Tomica車店Kenbox正式與本地薑Daboxtoys(DMC)合作,開設日本本土以外首間分店,引入大量絕版Tomica車仔,勢要扭轉現時鬥劈價、泥漿摔角的現象。

DSCN9271.JPG上周六(10月29日) Daboxtoys x Kenbox新店開張,店方請來兩位香港車手李英健及關兆昌擔任特別嘉賓,同場更有Kenbox運來的3,000部絕版Tomica及限量發售”daKenBox”版二次Tomica Mazda Roadster (MX-5) ,一如所料開張當日鋪內擠得水洩不通,《手推車》把握機會與DMC主理人Felix及Kenbox老闆坂詰健一做了簡單訪問,了解今次合作的緣由。

無心插柳柳成蔭
由網店走到今日擔任EBBRO的香港代理,甚至與Tarmac合作開發新車,DMC一直走別人沒有走過的路,主理人Felix指今次與Kenbox的合作可算是破天荒,同時帶點偶然成份,「我年多前第一次去新宿Kenbox時已被它海量收藏吸引,第二次才作自我介紹,直至第三次才傾談並邀請他們來港參與今年3月的活動。」3月份DMC幾乎借出整個鋪面供Kenbox舉行活動,排隊人龍更曾多達100人,Kenbox食髓知味,7月份香港玩具節與DMC再度合作,租用兩個攤位擺放日本直送產品,結果反應遠超預期,也為兩個品牌合作開店奠定基礎。

DSCN9284.JPG
Daboxtoys主理人Felix(左)及Kenbox坂詰健一(右)。

Kenbox老闆坂詰健一認同香港市場大有可為,「 (活動)證明市場對優質產品有強烈需求。」坂詰先生笑言港人對日產Skyline GT-R、本田Civic及MINI Cooper等情有獨鍾,未來將因應本地市場喜好而引入更多珍品。總結兩次經驗,新店將主打高端($1000以上)及低端(如無盒、瑕疵品)產品,中階貨品亦有引入,「好像演唱會最好賣的都是前排及山頂位置一樣。」

希望扭轉市場風氣
「我們希望藉這次合作逐步改善現時鬥平、鬥劈價的風氣。」Felix指在市場惡性競爭下,消費者難以覓得優品、良品,而KENBOX在日本薄有名氣,在日本直接入貨後定期輸往香港,較一般水貨店定期飛往日本入貨不同,(日本合作夥伴)貨源更多、更齊,同時吸引更多賣家主動放車。Kenbox及Daboxtoys將以daKenBox名義合辦活動及生產別注Tomica。坂詰先生希望新店站穩陣腳後再進軍東南亞市場。

除了daKenBox外,DMC將會與Greenlight、Tarmac繼續合作推出別注車模,而Yokohama x Greenlight GT-R更因應亞洲市場需要從3,000部增至5,000部,未來更計劃進一步開拓與車廠的合作,如辦團參觀Greenlight、EBBRO及Tarmac總部等,另尋求與更多品牌crossover,炮製更多與Yokohama、AAPE的特別車款。

後記:
由網店、天后店、南慶坊16樓到1樓新鋪,從代理到建立自己的品牌,Felix一步步實現他的夢想,而非單純賣車炒車賺錢就算,希望未來行內有更多有心人加入一齊做大個餅,人人都可以以合理價位入手心水好車。

飛去台灣買黃的?

早兩個星期去台中諗住買Tomica限量版豐田Wish台灣的士,點知黃的買唔到變咗買全家Welly Q版回力車。最終返到香港都要死死地氣「科水」。

DSCN8044.JPG

雖然台灣的士五花八門,但豐田 Wish始終佔大多數,MPV大尾箱設計就算一班人去旅行都唔駛分幾部車,加埋司機殷勤嘅態度,拎盡印象分,而白色頭尾泵把、群腳更成為台灣的士標記。

過往台灣Tomica代理曾經推出過新竹貨車、觀光巴士、高鐵接駁巴士等地區限定車款,不過大多係換張貼紙就算,今次代理為「2016多美小汽車節」活動特別炮製的豐田Wish的士車色除了忠於原著外,車身又有編號及「乘客四人」字樣,車頂燈箱也有「出租汽車」,等人一眼就能分辨出來,就算有右軚、Nets車章、錯體尾燈等問題都係濕濕碎。車模一推出已經大受歡迎,報導更指10分鐘內已經售罄,而且周圍都買唔到。當然,大家一聽就知係代理嘅marketing技倆,此車總有一日會成為恒常版本,正如本港的紅、綠Van一樣,但等幾耐就無人知,始終台灣代理積極程度同香港差得遠。至於萬信會唔會引入黃的入香港賣呢?有機會嘅,不過又係睇下等幾耐啫,而且價錢唔妨平,早買早享受,遲買平多你廿蚊啦。

DSCN8049.JPG

事實上,香港人真係幾鍾意台灣,機票平消費平樓價低美食多人善良,如果一年去幾轉台灣,搭黃的嘅機會隨時較搭香港紅的仲要多,黃的受港人追捧,不無理由,至於台灣人會唔會買香港紅綠藍的呢?呢個問題值得商榷。

當炒Tomica

遲咗成個月先寫Tomica遲唔遲啲?都唔遲嘅,正好可以夾埋8月新車偷跳事件一齊寫,花生味濃。

DSCN7886.JPG記得7月份新車本田Civic Type R初回版曾經炒到$299這個歷史高位,有無人接貨就不得而知,但破百成交的卻不乏其數,原因無非因為行貨遲遲未到港,結果日本水貨價節節上升,更出現要門口派籌賣車的奇特現象,炒風持續差不多整個月,至行貨派街價錢始回落至$30至$50水平,所謂鹹魚青菜各有所愛,但係呢部Type R究竟係咪得個名值錢呢?唔少師兄都批評此車欠缺獨立塑膠燈件、上色過厚、上色不均等情況,頭冚中引擎更是敷衍了事,絕對名過其實,如非缺貨根本唔應該有得炒,Type R效應似乎萬試萬靈,睇下下次NSX出貨會唔會有類似現象就知。

DSCN7857.JPG早兩星期Tomica 8月新車突然出現在各大水貨店的facebook專頁上,出貨日期較日本本土還要早幾日,結果引起軒然大波。要知道原因就必先知悉水貨車的營運模式,有別於我們螞蟻搬家般搜羅紅白盒,水貨商主要經日本當地的拆家拆貨,港、日才能同步發售新車,不過8月13至16日是日本三大節之一的盂蘭盆節,日本拆家因放假而提早拆貨,因此部份貨源率先抵達香港,或許因倉存成本高昂,部份水貨商收貨後即時推售,結果遭受同行投訴,導致日方不得不出手干預,逼使將Post下架直至日本出貨為止,或許豐田86、日產Serena對香港人的吸引力不及Type R,所以炒極都炒唔起。

據知代理早已向廠方要求大量76配額,但來港貨量不似如期,因此出現愈炒愈有的怪現象,唔知下一款熱門車又會唔會大炒特炒呢?「偷跳」事件則代理、店家均有責任,只要供應商足,炒價自然站不住腳,你睇而家嘅76就知啦,早買真係早享受,遲買真係可以平成舊。

唔係猛龍唔過江?

image

繼Network Shuttle Diecast成功進軍銅鑼灣後,話咁快又有新鋪登場,而且仲係話題多多嘅玩巨帝國,夠膽逆市擴充,果然心口掛住個勇字。

image

以往喺港島區買Tomica唔係去灣仔太原街就係去筲箕灣,今次由深水埗殺入老銅難免俾人覺得擺明「挑機」。負責人解釋話係太多客覺得過海好遠,所以想試下新地點,剛好發現新鋪位置方便、客人容易拎貨所以就正式扑鎚,搞足半年終於正式開張。據知新鋪除咗新車之外,仲會有更多中古美品出售添,負責人仲話開張會有優惠,不過問極都唔肯講係乜,惟有希望唔好太流,關公已經夠晒忙。

image

好喇入戲肉,點解要創先河玩「Hold車」先?負責人就話方便大家容易買到新車,唔駛左撲右撲,加上大多數情況每人限購一部,儘量以公平為主,當然亦有一定比例於門市出售。對於近年愈來愈多人入場賣Tomica,負責人話多人就證明產品受歡迎,不過憂慮如果業界爭相劈價的結果可能導致選擇減少。

「瘦田無人耕,耕開有人爭」多咗選擇,對消費者黎講都係好事,對另一半就未必係…

呢隻老鼠真肥仔

儘管上海迪士尼樂園開幕在即,然而想起昔日香港迪士尼樂園開幕之初的亂象,還是讓白老鼠行先試先。究竟新老鼠樂園有無專屬Tomica?定係會同國產車仔品牌合作?過幾日就知。反正都係等,不如買東京迪士尼海洋(Tokyo Disney Sea)15周年特別版止住渴先(交住稅先都得)。

DSCN5891.JPG大家可能都知道日本迪士尼係授權經營,所以園內不少設計均與美國加州及佛羅里達州不同,2001年,日本更落成了全球第一座以「海洋」為主題的樂園 – 東京迪士尼海洋,其中又以眾多機動遊戲及Duffy熊最為人熟悉,繼東京迪士尼13年30周年(也是本欄開始的同一年)後,東京迪士尼海洋也踏入15周年,樂園以「美好心願年」為題,除了全新的「閃亮心願之旅」表演外,當然唔少230種「掠水」產品,連帶Tomica都唔執輸推出一系列15周年產品賺番筆,除了見慣見熟的園區巴士、帆船ウィング・オブ・ウィッシュ号及三合一米奇車禮盒裝外,今次更推出一套6卡的迪士尼單軌列車(Disney Resort Line),由4月起每月分別以米奇、高飛及布魯圖、唐老鴨、黛絲、鋼牙奇奇及大鼻帝帝及米妮做車身圖案,要儲齊幾乎要你月月入園買。

DSCN5907.JPG睇真啲幾部Tomica,迪士尼海洋15周年及東京迪士尼30周年基本上係同模,不過主色改為藍孔,連帶米奇同米妮都穿上海洋的專屬服飾,車頂唔少得15周年字樣;ウィング・オブ・ウィッシュ号細細隻,船頭有透明米奇就已經收貨,但求神似不求形似。至於重點單軌列車同樣用上迪士尼海洋拉花,暫時得一卡未睇到啲乜,等齊六部擺出黎應該幾過癮。至於點解我咁鍾意米奇老鼠呢個問題呢?仲問?

 

十隻手指都咁長

俗語有云「十隻手指都咁長」,真係?你睇吓今次Tomica推出嘅超跑抽獎車系列,幾乎款款都咁吸引,十隻手指一樣長,點搞?

DSCN5238.JPG

Tomica過去兩年抽獎車都係以警車做主題,除咗兩部林寶炒得起之外,其他車款大多吃之無味,棄之可惜,但不得不提第18彈嗰部綠色熊貓車,抽到真係火都嚟。今年Tomica以工作車輛做主題推出トミカくじ20 はたらくスポーツカーコレクション,一套十款清一式跑車,包括日產Skyline GT-R警視庁巡邏車、林寶堅尼LP-640Murcielago的士、豐田2000GT駕駛學院車、日產Fairlady Z牧場車、Ford Focus RS500偵探車、大發Copen蒿麥車、蓮花Evora GTE消防指揮車、光岡OROCHI市政府車、蓮花Elite Exige R-GT報紙車及Ford Mustang GT V8開鎖車,現實中究竟有邊個會真係拎部大牛做的士?認真就窮了。唔駃問今次焦點都係落喺部R-35警車同大牛的士上,原以為會好似前作部林寶炒到上$300,結果呢?炒價曇花一現之後訊速回落,同以前無得比。據知行貨只係俾水貨遲幾日到港,結果成套買都係$450左右,較同價但得8部車的第18、19彈抽獎車明顯有折讓,事實再一次證明只要貨源充足,人人都有平車買。不過有段小插曲,就係行版Box set驚見同款車重複出現的情況,結果鋪家接受客戶退貨,鬼咩?好學唔學學京商。

除咗兩部焦點車外,一身奶牛拉花的日產Fairlady Z牧場車都有驚喜,其他車款拉花都有心思,係得部Ford Focus RS500偵探車「流」咗啲,一舊豬頭骨又點會影響到大家嘅買車意欲呢?所以呢套抽獎車銷情相當穩定,長賣長有。

終於等到

最近不約而同聽到部份地產商及專家指,如果買樓自住的話只要計掂數就應該入市,不過就算負擔到都要值得「科水」先得,好似舊年年尾炒到上$300的Tomica 三菱FUSO Canter JAF拖車車價回落逾4成,結果諗都唔諗即時入貨,你話仲會趺?或者,但你仲搵到劈價貨先講。

DSCN5801.JPG

三菱FUSO Canter拖車唔係第一次推出,但用JAF日本自動車連盟就好似係第一次,加上特別樣式的紙盒,去年年尾甫推出旋即炒起,高峰期曾高見$300大洋,其後長期在$230至$240左右徘徊,唔少人都因高價卻步。然而,拖車近排高調現身並以炒價65至7折左右出售,結果出Post當日已全額獲得認購,風頭一時無兩。可惜貨源短缺,拖車市價並無因此回調,錯過今次減價的朋友或者要再等一會,價總會減的,只係唔知何時而己。

Tomica定時定候就會推出紅白盒或別注版JAF車輛,其招牌的藍白色車身相信大家都唔會陌生,除了藍白車身外,這台FUSO Canter拖車還有車頂警示燈、車頭及車側的JAF字樣、裙腳日本自動車連盟字樣,連同車尾黃色的可活動拖架,觀賞價值及好玩度甚高。

如果將來再趺價嘅話現時豈不是高位接貨?撈底考耐性考眼光,如果市場無貨嘅話價錢跌植有個譜,可惜同樓市唔同,我哋根本無從得知供應量,最後只能問自己一句:到底你願意付出幾多買呢部車,計掂數就扑鎚唔好再諗,同買樓好似?買Tomica唔駛首期嘛。

 

GT-R狂熱

又係GT-R?係呀,鬼叫呢兩年間間廠搏晒老命係咁出日產Skyline GT-R車模咩!Tomica、Tomica Premium、Tomytec、京商、Oversteer、RAI’s、Hotwheels、Matchbox、Greenlightt甚至F-toys都有選擇,普通版出完到特別版,然後再出Box Set,手法層出不窮,你今日買咗末呀?

DSCN4357將舊款車模以特別版、會場版及禮盒裝重新推出係Tomica的慣常技倆,延長鑄模的壽命之餘,亦讓玩家以平價購入絕版車款(收藏價值當然不能同日而喻),不過廠方推出GT-R的頻率高得讓人吃不消,特別是R35,推出紅白盒後就以トミカ博、Safety car、杜拜警車等新拉花登場,今次則以Skyline GT-R45周年的名義推出名為「栄光のGT-Rセット」的套裝,4款不同車模包括元祖PGC10、R32、R34及R35,老實講即係將4部紅白盒擺埋一齊就叫自己做Box Set,然後再賣貴幾十蚊又可以吸引車迷乖乖「科水」。

DSCN4351講造工,除了PGC10外,其餘三款車換上跑車軨之餘,車門均能打開,在新模因成本所限變得「百無」時,舊模自然「矜貴」得多,加上PGC10、R32及R34紅白盒已為絕版,此盒裝自然成為入場之選,然而因為產量眾多,升值潛力欠奉,如果不是粉絲的話更是雞肋,加上廠方未來必會翻出再翻出,錯過亦無妨。

早幾日日產終於喺紐約車展公佈換代前的最後一款R35,睇怕嚟緊兩年各大品牌又會鋪天蓋地咁出車模,你仲頂唔頂得順?