不過係一部豐田Altezza，駛唔駛講到咁誇張呀？無誇張，只因我喺東京、大阪均遍尋不獲，最終竟然喺香港搵到，仲唔係眾裡尋他？

好多人都知凌志IS200同豐田Altezza係同門兄弟(Altezza馬力比行版IS200為大)，憑藉房跑外貌、FR設計至今仍成為唔少P牌仔嘅入手首選，即使推出近廿年仍然有唔少喺街度行緊，易手價一直硬淨。記得多年前拎P牌後就心思思想入部IS200操車，但係車價貴放盤少，結果就此作罷，到今時今日負擔到，但車齡高，正版少又成為「上車」障礙，呢款車成為筆者小小的遺憾。既然真車買唔到，諗住入番部模型都好吖，點知模型一啲都唔多，1/43都係屈指可數，何況1/64呢？幸而京商多年推出過的豐田盒蛋有Altezza，所以每次去日本都會去二手店一碰運氣，秋葉原、梅田、日本橋等等都搵唔到，如是者幾年過去幾乎死心，點知近排香港有鋪頭竟然返貨，二話不說就已經Hold貨攞車，雖然唔係最原汁原味的銀色，但藍色已經收貨。

因為屬京商早期出品，質素同近年法拉利、麥拿崙以至新一套豐田系列無得比，車頭同真車差少少(頭燈造型唔夠銳利、鬼面罩亦無咁圓)。不過抹去車身塵埃後，車模保養企理，四個車輪又可以推動，如果有埋TRD包圍的話就更形神俱備，然而呢部已經收貨。有時候，買車不單是購買模型本身，更是買回當年的回憶。回憶何價？你話呢？